استشارة بخصوص بيع الالنترا فى السعودية او مصر

**ferrari1500** · 14-09-2013 11:34 PM

السلام عليكم اعضاء المنتدى الكرام

بصراحة وبدون كلام كتير انا كنت اشتريت النترا ٢٠١٢ من حوالى ١٠ شهور بالسعودية وكانت مواصفات خاصة وعملت عليها تقرير من حوالى ٦ شهور بمناسبة ٥ الاف كم

http://www.nilemotors.net/Nile/340401-2012-5000-a.html

ومن ساعتها واستخدامى البسيط وصلت ل ١٠٥٠٠ كم فقط واضفت ليها عن اللى كان موجود زينون و عازل حرارى اصلى 3M بتكلفة ٤ الاف جنيه تقريبا كريستالين ٧٠ ٪ شفافية عشان مصر وكنت مقرر استخدمها هنا كمان سنة على الاقل وانزلها مصر لعدم وجود مواصفاتها سواء بعد كده فى السعودية او مصر
لكن ملاحظتى على العربية فقط هو نشفان العفشة واللى انا عارف انها رياضية وكمان انها سيدان وانا كنت راكب ٥ سنين قبلها برادو ومعرفتش اتكيف عليها
فكده كده هبيعها وقررت اشترى فى مصر ix35 او سبورتاج او قاشقاى الجديدة
فقررت اعرضها للبيع
فهل لو جابت هنا ٥٠ الف ريال حوالى ٩٥ الف جنيه ابيع ولا ممكن تجيب فى مصر اكتر ولا تنصحونى بإيه لانى كده كده هابيعها
وكمان مش عارف الجمارك دلوقتى كام
فارجو النصيحة وسعرها ممكن يجيب كام فى مصر نظرا لخبرتكم فى اسعار المستعمل بمصر عشان لو كده اشحنها بعد ١ اكتوبر وانزلها مصر وابيعها لان بصراحة الاسعار هنا بتقل جامد فى المستعمل ولو مجابتش سعر كويس ابيعها هنا واخلص

العربية فابريكة بالكامل بإستثناء الباب الخلفى يمين تم رشه بدون سمكرة بالوكالة نتيجة حكة بسيطة بالباب طبعا على حساب التأمين
قيمة العازل والاكسسوارات الاصلية اللى راكبه مكلفانى ٧ الاف ريال فوق تمن العربية
وشكرا مقدما على النصيحة

**eng.salama93** · 15-09-2013 12:05 AM

سعر الشراء كام ؟ و السعر الحالي ف الجديد كام .؟
و يفضل برضو انك تبيعها عندك لأن جمارك الرينو سانديرو ب 52 ألف جنيه
فا هيبقي حرام برضو

**ferrari1500** · 15-09-2013 01:23 AM

انا شارى العربية ب ٦٠ الف ريال ومع الاضافات عاملة ٦٧ الف ريال
ومن ناحية الجديدة هنا مفيش زيها لانها بتنزل هنا ب ٦٥ فل اوبشن بدون مكيف الكترونى ولا abs ولا كاميرا ولا مراية تعتيم وب ٢ ايرباج بس وجنوط ١٧ وزيادة عنى فتحة بس
سعر عربيتى جاب هنا دلوقتى ٥٠ الف ريال
فهل ابيع ولا لو نزلتها هتكون مرغوبة فى مصر ولا هتبقى اقل مع اضافة الجمرك هى دى الحيرة اللى انا فيها
اما الجمرك كل شوية اشوفله رقم فى الاهرام مرة ٦٣ الف جنيه ومرة ٦٥ ومرة ٦٨ الف ومرة ٧٢ الف ؟؟؟؟؟؟؟؟؟؟

**bassemali** · 15-09-2013 01:24 AM

في مصر ممكن تجيب 140000 جنيه على الأقل .. بس إنت هتدفع لها جمارك لاتقل عن 50000 جنيه .. فيبقى الافضل إنك تبيعها ف السعوديه بدل من إنك تنزلها مصر وممكن تتبهدل منك ف الجمرك لانها هتبقى بنفس السعر بعد ماتدفع الجمرك أو على أقصى تقدير هتزيد 10000 جنيه .. مش مستهاله يعني .

**eng.salama93** · 15-09-2013 01:33 AM

نصيحة ... بيع ف السعودية

**ferrari1500** · 15-09-2013 02:13 AM

فعلا يا جماعة كده يبقى ابيعها هنا افضل لان الجمرك اعتقد هيوصل ٦٠ الف مع شحن كمان ب ٢٠٠٠ ريال فابيعها هنا افضل بدل وجع الدماغ والجمارك والمصاريف التانية واللف على الورق والترخيص

**profimh** · 15-09-2013 02:20 AM

المشاركة الأصلية كتبت بواسطة bassemali

في مصر ممكن تجيب 140000 جنيه على الأقل .. بس إنت هتدفع لها جمارك لاتقل عن 50000 جنيه .. فيبقى الافضل إنك تبيعها ف السعوديه بدل من إنك تنزلها مصر وممكن تتبهدل منك ف الجمرك لانها هتبقى بنفس السعر بعد ماتدفع الجمرك أو على أقصى تقدير هتزيد 10000 جنيه .. مش مستهاله يعني .

ده كلام مضبوط 100x100