-
عن البطاريات نتحدث !
ازيكم يا شباب اخباركم ايه؟!
يارب تكونوا بخير جميعا
المهم يا رجالة انا الحمد لله عربيتي خلاص على وشك الاستلام ممكن على اخر الاسبوع او اول الاسبوع القادم
بطاريتي اللي فيها Ac Delco 55 امبير جايبها في شهر 8/2012
لحدا يوم ما وديت العربية تتصلح كانت شغالة زي الفل
انا وديت العربية من يوم 20/6/2013 وطبعا مركونة لحد دلوقتي داخلالها كدة في 3 شهور ولا حد شغلها ولا حتى فصلوا الكابلات بتاعتها !
السؤال هنا هل البطارية دي هتتشحن وتقوم تاني واللا الله يرحمها كدة ؟!
مع العلم اني لما وديتلهم العربية البطارية كانت مشحونة تماما !
ولو كانت الله يرحمها !
اجيب بطارية ايه ومنين وبكام ؟!
سمعت عن انواع كتير اي سي ديلكو وهانكوك وانير جيزر وهيجل وسوبريم وحجات كتيرة موجودة
انا مش مركب حاجة في العربية غير اني مغير اللمبات وعاملها كتاوت ومركب سنتر وانذار بس مش عامل حاجة تانية ومش ناوي اعمل حاجة تانية ! فهل امشي زي مانا متعود 55 امبير واللا اجيب ال 70 !
أفتونا أفادكم الله :]
-
-
هات هيجل تركى وهتدعيلى 55 امبير وب 370 بالقديمه
من عند ريمو كار فى احمد حلمى قبل محطة الاستوديو
البطاريه دى عن تجربه مرتين..رائعه
-
اشحنها وان شاء الله تشتغل
انا مرة سبت العربية من غير ما افصل كابلات البطارية فترة 3 اسابيع رجعت لقيت البطارية مافيهاش فولت واحد
حتى الزق والرمى ماجبش معاها حاجة
رحت شحنتها عند الراجل وركبتها فى العربية والبطارية رجعت تشتغل طبيعى جدا ولمبتها نورت اخضر كمان
-
السلام عليكم
يوجد الأن تكنولوجي جديد في البطريات تسمى كالسيوم أو كالسيوم بلس ويوجد من هذه في الأتي
1- بوش أس3
2- هانكوك كالسيوم و كالسيوم بلس
3-أطلس كالسيوم و كالسيوم بلس
البطارية البوش غالية 70 أمبير ب650جنية
البطارية الهانكوك أو الأطلس 55أمبير ب430جنية
وعن تجربة في عربيتين(سكودا فورمان و تريوس 2007) وتجربة 4 بطاريات هانكوك كالسيوم بلس ممتازة
-
صديقي المواطن
إشحنها وحتشتغل معاك عادي ولكن بطاريتك صغيرة ولا يعتمد عليها حاول تجيب 66 أمبير أو 74 أمبير فارتا جاف فقط لا غير وخد بالك فيه بطاريات إسمها 70 بس قلي وريني الأمبير مكتوب كام أحيانا بيطلع 62 أمبير فخد بالك لازم تقره كلمة أمبير جنب الرقم ودمتم للنضال إوعه تركب 55 تاني خد الغالي تمنه فيه
-
اشحنها وهتشتغل تانى ان شاء الله ............
-
يا مسهل يعني احتمال تقوم وتدب فيها الروح تاني
انا اتمنى والله :d
ربنا ييسر ولو مقامتش هشوف اقتراحاتكم وياريت لو حد ليه تجربة معينة يقول بس كله في اطار الجاف مش ناوي على سائل ابدا تاني :]
-
حضرتك اعملها وصله من أي بطاريه و خاليها ديرة نص ساعة البطاريه بتعتك جديدة و ان شاء الله هتشتغل المهم تمشي بيها مشوار و كل ساعتين ولا حاجة تدور العربيه لحد ما ترجع زي الاول
-
أشكركم جميعا يا شباب
الحمد لله البطارية طلعت صحتها زي الفل واتشحنت وقايمة على حيلها وفيها نفس :d
السؤال دلوقتي:-
انا محتاج بطارية لمدة 5 ايام تقريبا اشغل بيها عربية تانية معايا
هل فيه حد بيبيع بطاريات مستعملة امشي بيها حالي واللا اجيب بطارية سايلة جديدة وامري لله وابيعها لما عربيتي تيجي واللا اعمل ايه ؟!
ايه رأيكم ؟!
Content Relevant URLs by
vBSEO 3.6.0 PL2