حسبي الله و نعم الوكيل في الشرطة .

السلام عليكم و رحمه الله و بركاته ...

على الرغم من احترامي الشديد للشرطة المصرية خصوصاً بعد موقفها العظيم في ثورة 30 يونيو ...
الا انه حصل النهاردة موقف زي الزفت خلتني حنفجر من الغيظ ...
انا والدتي سيدة مسنه عندها 70 سنه ومريضة بمرض السكر و الضغط , النهاردة الصبح تعبت اوي والسكر زاد عليها وكان حيوصل لغيبوبة سكر بس الحمد لله ربنا ستر ووديتها للدكتور بتاعها في مستشفى القاهرة اللي في روكسي .
واحنا راجعين و معايا امي وقاعدة قدام ومراتي و بنتي الرضيعة , ومعدي ناحية سنترال مصر الجديدة في اتجاهي للتجنيد , لقيت لجنة واقفة بتبص على العربيات المفيمة , انا مفيم العربية كلها Light Black دخلت اللجنة و فتحت ازاز العربية الامامي , وانا متأكد ان اي امين شرطة او ضابط اول ما حيشوف امي و هي تعبانة كده اكيد حيعديني بسرعة ....
اتفجأت الاقي امين شرطة بيقولي رخصك و اركن على جنب , نزلت وحت معاه للضابط وبقوله يا فندم انا مفيم مش عشان اتعايق بالعربية انا مفيم عشان والدتي ست مسنه وكبيرة ومريضة و الشمس بتضايقها اوي وبرضه معايا بنت رضيعة ولسه جايين من المستشفى ووالدتي تعبانة جدا .
تخيلوا ردوه كان ايه ؟؟؟
والله العظيم الاقيه بيقولي لو تعبانة ماتجبلها الدكتور لعندها .... ما انا امي تعبانة و مسنه برضه .
يا تدفع خمسين جنيه يا تشيل الفامية يا ناخد الرخصة .
مفيش لحظة واحدة والاقي الجنان مسكني وصوتي ده بقى مسمع مصر الجديدة بحالها ....
والله العظيم مش فاكر ولا كلمة من اللي قولته عشان دمي بجد كان محروق جدا .
وربنا لو كنت لوحدي ما كان همني وكنت شيلت الفامية على طول من غير مناقشة بس اللي يحرق الدم كمان الاقي امين شرطة جاي بيقولي معلش انت عارف حال البلد دلوقتي فيها مشاكل والفامية ممكن بيخبي حد جوه العربية ...
طبعا ضحكت منه بسخرية وقولته طب خلي الكلام ده لما تلاقوا كذا راجل في العربية ومفيمنها غامق ... مش واجل و ست مسنه ومراته و بنت رضيعة ومفيم تفييم خفيف .
المهم مارضيتش ادفع حاجة و قولتله مش حشيل الفامية ولو عايز تاخد الرخصة خدها مش عايزها ....
وسبته و امركت قدامه من غيظتي ومشيت .
دلوقتي هو ادني وصل ... اجيب الرخصة منين ؟؟

من دراسة او شوف حد قريبك واصل يجبهالك قبل ما توصل علشان المتخشش في حوار

تخلع الفاميه وتفحص العربيه وتروح المرور تستلم الرخصه
بس برضه انا مش فاهم الشرطه غلطانه فى ايه مع حضرتك
هى مصايبها كتير بس فى موقف حضرتك ممكن يكون سوء تقدير انما مش غلط

الف سلامة للوالدة و ربنا يطمنك عليها......استهدى بالله و هدى اعصابك

تقدير المواقف الانسانية بيعتمد على اللى بينفذ القانون..... لو هو انسان متفاهم يبقى ممكن يتفهم الوضع و يعديك..... لو هو انسان معندوش استعداد للتفاهم و عايز يطبق القانون و خلاص يبقى هيغلس..... و فى الحالة دى كنت اديتهم الخمسين جنيه و خلاص خاصة ان غلاستهم فى موضوع الفيميه ده معروفة

الشرطة لا ملايكة و لا شياطين..... بشر عاديين زينا فيهم الكويس و الوحش و الفاسد و اللى بيسئ استخدام منصبه و هكذا..... زيهم زى اى فئة فى مجتمعنا كله

الشرطة مصايبها كتير فعلاً ايام مبارك وايام ثورة 25 يناير وبعدها وايام مرسى وبعد مرسى ولحد دلوقتى
مصممين يعيشوا دور البشاوات ومش عاوزين يطهروا نفسهم من المرتشين ومن الواسطة والمحسوبية ومن المنظرة
ومش عاوزين يطبقوا القانون إلا على الضعيف واللى ملهوش ظهر

بس بصراحة ضابط الشرطة اللى قابلك عداه العيب ومفيش اى غلط عليه
حط ادامك كل الخيارات

يا تدفع خمسين جنيه يا تشيل الفامية يا ناخد الرخصة .

انت اللى غلطان

وألف سلامة على والدتك ... ربنا يشفيها ويقومها بالسلامة
بس ده مش مبرر لمخالفة القانون
والاصرار عليه
والعند مع اللى بيحاولوا يطبقوه
وبتصرفك ده هتتعب نفسك

ألف سلامة للست الوالدة متعها الله بالصحة والعافية

بس بصراحة انت اللى غلطان..القانون قانون..والناس بشهادتك لم يسيئوا اليك بحرف..ومافيش حاجة اسمها أنا مفيم عشان والدتى أو مفيم عشان أروش..الفاميه ممنوع قانونا..حتى لو ده مضايقنا بس قانون..وكلنا تعرضنا لمواقف مشابهة....أنا مرة ركنت صف تانى عشان أدخل بنتى بسرعة معمل أشعة ورجعنا لقيت العربية متكلبشة رحت للظابط وقلت له من فضل حضرتك أنا اضطريت عشان كذا..طلع راجل ذوق وقال لى ألف سلامة عليها و ربنا يخلليهالك وبعت العسكرى فك الكلابش من غير مادفع حاجة ..شكرته ودعيت له..ومرة تانية نفس الحكاية فى مكان تانى عشان أدخل مراتى مستشفى العربية اتكلبشت والظابط قال لى ماليش دعوة ..دفعت له 40 جنيه وخدت الرخصة ومشيت من سكات

لكن اللى حضرتك عملته ده غلط وحايعقد الموضوع لو ظابط مفترى حاتتعذب عشان تاخد رخصك ده غير ان فى أبسط الأحوال حاتضطر تدخل فحص تانى وتشيل الفاميه بالعافية وحاتدفع قد كده .. كنت استعوضت ربنا فى ال 50 جنيه وخلاص

أنصحك كأخ لو تقدر ترجع له دلوقتى وتهدى الجو وتدفع الفلوس وتاخد رخصتك يبقى أحسن حل

شيل الفيمية و ركب ستاير كبس

انا معاك ان انت فى موقف صعب عشان تعب والدتك... بس فى نفس الوقت راعى ان كل واحد الضابط دة بيوقفة بيعملة فيلم و قصة طويلة عريضة عشان يهرب من المخالفة فا الراجل الى حد ما معذور

MMamdouh

الشرطة مصايبها كتير ومش حتتعدل ولا فى الأحلام حتى
لكن فى موقف حضرتك أنا مش شايف أى غلط من الشرطة وعامة لو رحت جبت الرخصة ولقيته عاملك مخالفة فامية بس يبقى الظابط ده قمة فى الإحترام لآنه ممكن يلبسك كام مخالفة كده ع الماشى على اللى عملته معاه ( ده لو معندهوش ضمير )

ياباشا أنا متعاطف معاك ، بس الشرطة همحتاجة فنيك وجاز وشوية منظفات عشان تتطهر وتنظف بجد.
يا سيدي شفا الله والدتك وأكرمها شفاء لا يغادر سقما.
وصدقنى هناك مواقف تعرضت لها وسمعت من كثير ، مواقف يندي لها الجبين،، وحسبنا الله ونعم الوكيل.

الضابط ده المفروض أنه إنسان ، يعنى شايف ظروف سيدة مسنة ومريضة والموضوع محتاج تقدير للموقف ،، يبق ازاي مش غلطان ، ده غلطان وبن ولا بلاش ، ربنا ينتقم من كل واحد بيفتري .

(خصوصاً بعد موقفها العظيم في ثورة 30 يونيو)
مش فاهم اية الموقف العظيم اللى كان فى 30 يونيو .... هى بس كانت بتستعيد عرشها من تانى ..
ومع ذلك الظابط يعتبر تعامل مع حضرتك بمثالية غير معهودة من رجال الشرطة وحضرتك عارف انك مخالف فكان اسهل تدفع خمسين جنية وتخلص والف سلامة للوالدة

الف سلامه على الحاجه
بس انت غلطان كنت دفعت 50ج وخلاص
الرخصه هتروح المرور بتاعك وهتشيل الفاميه وهتفحص وتدفع 100ج :uuuup:مخالفه وخلاص

انا مش شايف اى غلط ياباشا مع احترامى لحضرتك

-الناس كلموك بكل زوق

- قانون المرور فى بلدك بيمنع الفامية الا بوجود تصريح

- انا شايف ان حضرتك اللى غلطان , ماتزعلش منى , لان الناس كلمتك بكل هدوء وزوق وادب , وانت زعقت فيهم

وكان المفروض تدفع ال50 جنية وتروح المرور تحاول تشوف واسطة تعمل الزجاج فامية , غير كدة مافيش ياباشا

انا أيضا لا أجد أي خطأ من الشرطة مع سيادتك
بالرغم من وجود كثير من أفراد الشرطة فاسدين ومرتشين
إلا أن هناك الكثير أيضا منهم أولاد ناس ومحترمين
شأن اي مهنة اخرى فيها الصالح وفيها الفاسد
ما رأيك في الاطباء الفاسدين؟ صدقني أن ابني توفى نتيجة فساد الاطباء
وأنا على وشك الموت حزنا عليه ، فقد أصابني السكر والضغط والكوليسترول نتيجة هذه الصدمة
تحياتي

-لو كنت وكيل نيابة او ضابط كنت هتعدي ....القانون يطبق على عامة الشعب فقط

اقتباس:

---

المشاركة الأصلية كتبت بواسطة hilal

انا أيضا لا أجد أي خطأ من الشرطة مع سيادتك
بالرغم من وجود كثير من أفراد الشرطة فاسدين ومرتشين
إلا أن هناك الكثير أيضا منهم أولاد ناس ومحترمين
شأن اي مهنة اخرى فيها الصالح وفيها الفاسد
ما رأيك في الاطباء الفاسدين؟ صدقني أن ابني توفى نتيجة فساد الاطباء
وأنا على وشك الموت حزنا عليه ، فقد أصابني السكر والضغط والكوليسترول نتيجة هذه الصدمة
تحياتي

---

لا إله إلا الله
قدر الله وماشاء فعل
البقاء لله
ربنا يعوض عليك خير ان شاء الله
ويشفيك ويعافيك ويزيح عنك

اقتباس:

---

المشاركة الأصلية كتبت بواسطة elawany13

لا إله إلا الله
قدر الله وماشاء فعل
البقاء لله
ربنا يعوض عليك خير ان شاء الله
ويشفيك ويعافيك ويزيح عنك

---

جزاك الله خيرا أخي الكريم
ولا نقول غير إنا لله وإنا إليه راجعون

حضرتك بسهولة وبدون والله ماقرا التعليقات والله من بعد ماقريت كام سطر وعرفت المشكلة
حضرتك بسهولة انا كنت نفس ظروفك بدون والدتك ربنا يخلهالك معايا حماتى ومراتى واتنين اطفال
الفكرة بكل بساطة قاللى دى عشان اول مرة بس حاعديك من غير ماخد منك غرامة بس حتشيلها
قولتله خلاص وشكرا
سلام عليكم عليكم السلام
الموضوع باختصار حضرتك داخل عاللجنة وانت متعصب ومتضايق لظروف والدتك المرضية ومش طايق كلمة من حد
وبصراحة الظابط بجد كحترم مشوفتش انه عمل غلط
وملحوظة لو حضرتك بتحب البلد دى اول واحد ابتدى بنفسك وطبق القانون حتلاقى نفسك متعايش مع ظروفها وافضل من كتير بيخرقوه علأقل حتحترم نفسك وذاتك قدام نفسك !

صديقي المواطن
مش عارف إنتو بتفيموا العربيات وتاعبين نفسكم.ليه وفي بدايل أشيك ركب ستاير تفصيل يا صديقي الوطني تحس نفسك راكب عربية.رئاسية وريح بالك من مشاكل الكماين وقماش الستاير يكون مخرم تخش الكمين يقلك حاجة إفتحه وكمان دلوأتي الستائر على الزجاج الخلفي بقه كهربا ب 275 جنيه ودمتم.للنضال

لو عايز الصراحة حضرتك غلطان انا طالب حقوق و بقولك ان القانون قانون ايا كانت ظروفك معلش يعنى هوا الضابط بينفذ وبس

اولا الحمد لله على سلامه الحاجه , ثانيا انت معاك حق في الي عملتوا معلش لو الناس بتتكلم في القانون وكدا يبقى يتطبق بحزافيروا يعني تدفع الغرامه بس الشرطه بتسكت لان 90% منهم راكبين عربيات مخصصه للمعاقين ومرخصه كدا بس ضابط, وبردوا مفيم واستحاله حد يكلموا معلش في الكلمه ------- وانا اعرف منهم من الرائد لللواء وقرايبي والحمد لله متبري منهم مش علشان ضابط , وانا دلوقتي بعمل زيك واكتر والله كتير بمشي واسيب اللجنه ولو وقفني بجري علشان عدت عليا مواقف زباله معاهم

قبل اى شىء الف سلامه على والده حضرتك و ربنا يقومها بالسلامه
الموضوع والله بدون اى تحيز .... انت طلعت غضبك من الضغط العصبى الى انت فيه على الظباط ... و هو الصراحة مغلطش معاك و طرح كل الخيارات لحضرتك علشان تختار و ده تصرف نموزجى ... بس حضرتك كنت مش مستحمل و حصل الى حصل ... اهم حاجة على بعد بكره تروح المرور الى انت تبعه و تدفع الغرامه و تدخل فحص و تاخد الرخصه و تتوكل على الله ...

انا مقدر موفقك بصراحة ومعاك
بس حاول متتعصبش خصوصا ان في ناس مش بتقدر طول الوقت

الف سلامة للوالدة و ربنا يطمنك عليها .............. عاوز أقولك نصيحة أخوية ومتزعلش مني

امشي عدل يحتار عدوك فيك ...... انتا غلطان علشان عامل فامية أيا كان درجتة طالما مش مثبوت على الرخصة تبقي مخالف واديت لواحد فرصة انه يوقفك ..... انا ماشي بالمبدأ دة رخصتي ورخصة العربية فى جيبي والعربية تمام من غير فامية ولا اي حاجة لو حد اتكلم معايا بعرف ارد عليه كويس ........ تحياتي

انا كنت عاوز اعرف ليه يعنى الفاميه هو اللى غلط و ستاير الكبس بيعدوها عادى مع ان الستاير برده بتخبى يمكن اكتر من الفاميه الخفيف و مع ذلك بيعدوها
ثانيا انا مفيم خفيف و كنت بروح وسط البلد بئوم فاتح الشبابيك الاربعه خوفا من اى ضابط و مفيش اكتر منهم هناك
بعدين بئيت افتح الامامى بس
دلوئتى بقفل الاربعه والحمد لله ربنا بيستر
هو بيفرق معايا فى الشمس كتير ونفسى يبئى مثبت فى الرخصه ومش عارف امتى بيسمحو بكده فى المرور و ايه هى الشروط و الاوراق المطلوبه ولا بالواسطه بس
و عاوز اعرف هل لو سبت الضابط يسحب الرخصه و روحت اشيله و اعدت الفحص هل بيبئى فى غرامه ولا طالما شيلته يبئى خلاص و اخد الرخصه تانى؟

انا شايف ان الراجل مش غلطان هو بيطبق القانون

معا احترامى لحضرتك الظابط ولا كلمه الضراحة غلط هنا فى السويس وصلت غرمات الفاميه ل 600 جنيه وبصراحه معاهم حق الى مفيم بيبقى مشبوه هنا ومش اصدى انو بلطجى او حرامى لا حاجات تانيه وبصراح الى بيعملوه فى الفاميه مع الناس معاهم حق بس اهم حاجة الاحترام منهم للناس وتحياتى

لو عاوز الفاميه هات عربيه نازله زجاجها فاميه وحط صباعك في عين التخين زي الفرنا والانوس وعربيات تانيه كتير

سلام عليكم
يمكن انا على عكس حضرتك واخد موقف من الداخلية لأسباب كتير
لكن في موقفك الظابط مش غلطان
هو خيرك تدفع المخالفة او تشيل الفيميه , كان عادي انك تدفع , هي في الاول و في الآخر مخالفة و لازم هاتدفعها او تشيله حتى لو كلهم عاملين عربياتهم فيميه و ماشيين وقشطة (و ده من اهون اسباب اني واخد منهم موقف )

حاول تركب عازل حراري عالجناب بس حتى و ريح دماغك , و ربنا يطمنك عالوالدة ان شاء الله

اضافة : هما للصراحة بيطبقوا الموضوع بغباوة و بيعتبروا اي فيلم ملزوق ممنوع مع ان المفروض يعني انه اللي بيحجب رؤية الداخل بس

مش فاهم برضه - ايه الخطاء ؟؟؟
الشرطه ليها بلاوى - لكن القانون قانون برضه
و لا احنا اتعودنا نقيم الامور من وجهة نظرنا الخاصه فقط بدون اى تقدير لقانون او خلافه

هل هو طبق القانون صح ؟؟
هل انتا اتبعت القانون صح (حتى لو فى حاجه هايفه) ؟؟
جاوب على السؤالين دول بدون مبررات

الضابط مش غلطان وإنت الغلط راكبك من ساسك لراسك
انا مبطقش بتوع الداخلية بس هو مش غلطان المرة دي
واحب اسمعك
[youtube]http://www.youtube.com/watch?v=VBjyZizxQb0[/youtube]

بس واضح فعلا احترامك لشرطة 30 يونيو هههه

وعلى فكره لو معندكش قريب رتبه هتروح هتلاقي نفسك لابس قضيه إعتداء على ظابط
أو كسر لجنه والإتنين أقل عقوبه حبس
مبروك عليك انقلاب ال ٣٠ حرامي

الشرطة المصرية محترمة خصوصاً بعد موقفها العظيم في ثورة 30 يونيو ... ؟؟؟؟؟يا راجل حرام عليك دى الحاجه الوحيدة اللى مش موجودة فى الشرطة الاحترام ....
على العموم سيبك الف مليون سلامة على السيدة الوالدة