جيب سوزوكى فيتارا 1999 ب 25 الف جنيه

السلام عليكم ورحمة الله وبركاته

اعضاء المنتدى الاعزاء حابب اخ رايكم فى حاجة

معروض عليا عربية جيب سوزوكى فيتارا 4x4 v6 مستوردة ومقطوع الشاسيه وملحومة موتور 2000 سى سى
حالتها ممتازة ممتازة ممتازة
حالة الموتور ممتاز والكاوتش ومفيهاش اى رش زجاج ومرايات كهرباء تكييف وكل حاجة
معروضة عليا ب 25 الف جنيه ومعاها افراج جمركى كابينه وموتور بس الشاسيه طبعا مالوش افراج جمركى

فى ناس بتقولى انى ممكن اشترى اى جيب سوزوكى(انا لقيت واحدة على 10 الاف جنيه) عاملة حادثة او قديمة واعمل لها جواب تعديل من المرور

وبعد كده اخد رقم الشاسيه بتاع العربية القديمة دى او اللى عاملة حادثة وفى ناس بتعمله دق على الشاسيه بتاع العربية الجديدة وبتدخل المرور بس بشوية وسايط على فلوس

ايه رايكم فى الموضوع ده ومدى صحته وهل فيه اى خطورة عليا
ياريت اللى عنده خبرة بس يرد عليا
او اللى يعرف حاجة موثوق منها

المواضيع دى ليها ناسها خلى بالك قصة قصع رقم الشاسية ونقلة على عربية تانية دى جناية وفيها حبس يعنى موضوع مش سهل

وليه الافلام الهندي دية وحتلاقيك دفعت تمن وحدة كويسة في الاخر ؟؟ خدها كويسه من الاول وريح راسك وابعد عن الشر وغنيلوا

اقتباس:

---

المشاركة الأصلية كتبت بواسطة aboomar22

المواضيع دى ليها ناسها خلى بالك قصة قصع رقم الشاسية ونقلة على عربية تانية دى جناية وفيها حبس يعنى موضوع مش سهل

---

الراجل اللى هيبيع لى العربية
بيقولى انه يعرف ناس بتعمل موضوع الشاسيه وبيعملوه دق مش قطع ولحام ده على حسب كلامه

ويعرف اللى فى المرور اللى هيخلص موضوع العربية بس الواحد خايف الدنيا تعك والبس فى جناية خصوصا ان الورق طبعا هيبقى باسمى

بس الاغراء فى الموضوع :
جيب سوزوكى فابريكة كل تكلفتها
25 الف سعر العربية + 9 الاف سعر العربية القديمة +4 الاف مصاريف وخلافه = 38 الف جنيه

فى عربية تمنها اغلى من كده بكتير

اقتباس:

---

المشاركة الأصلية كتبت بواسطة فبريكا

وليه الافلام الهندي دية وحتلاقيك دفعت تمن وحدة كويسة في الاخر ؟؟ خدها كويسه من الاول وريح راسك وابعد عن الشر وغنيلوا

---

الموضوع مغرى

جيب سوزوكى فابريكة كل تكلفتها
25 الف سعر العربية + 9 الاف سعر العربية القديمة +4 الاف مصاريف وخلافه = 38 الف جنيه
فى عربية تمنها اغلى من كده بكتير

ولا اغلى ولا حاجة بلاش مخاطرة احسن وبعدين دور هتلاقي معروض ب 45 لحد 50

بسم الله الرحمن الرحيم
المواضيع دى مش ليا
فى تجار و سمسارة للمواضع دى
بلاشها احسن
احنا شقينين بالقرش دة

اقتباس:

---

المشاركة الأصلية كتبت بواسطة ahmedzizo131

بسم الله الرحمن الرحيم
المواضيع دى مش ليا
فى تجار و سمسارة للمواضع دى
بلاشها احسن
احنا شقينين بالقرش دة

---

الله ينور عليك قلت اللى ف نفسى

الموضوع هيقرفك كل ما تيجي تجدد أو تفحص او تبيع أو تنقل ملكية.

كل ما هيتعمل مطابقة بصمة .. الرقم هيبان انه مدقوق .. مش الأصلي بتاع العربية.

لو دخلت أي مرور هتلاقي عربيات كتير بي ام دبليو و جولف و باسات و جيب مركونه أو بالأصح مرميه و عليها تراب و مكتوب عليها بالدوكو "بدون ورق" .. أو "مخالفة شاسية" .. دي بتاعة ناس افتكروا نفسهم أذكياء و عملوا الموضوع ده و اتكشف.

هات حاجه على قد الفلوس اللي معاك بدون مشاكل أفضل .. حتى لو حبيت تبيعها .. تبيعها بسهوله.

اقتباس:

---

المشاركة الأصلية كتبت بواسطة kar!m

الموضوع هيقرفك كل ما تيجي تجدد أو تفحص او تبيع أو تنقل ملكية.

كل ما هيتعمل مطابقة بصمة .. الرقم هيبان انه مدقوق .. مش الأصلي بتاع العربية.

لو دخلت أي مرور هتلاقي عربيات كتير بي ام دبليو و جولف و باسات و جيب مركونه أو بالأصح مرميه و عليها تراب و مكتوب عليها بالدوكو "بدون ورق" .. أو "مخالفة شاسية" .. دي بتاعة ناس افتكروا نفسهم أذكياء و عملوا الموضوع ده و اتكشف.

هات حاجه على قد الفلوس اللي معاك بدون مشاكل أفضل .. حتى لو حبيت تبيعها .. تبيعها بسهوله.

---

الراجل دة بيتكلم صح حتى لو حتعرف تسلك نفسك فى المرور لما تجي تبيعها الى حيشتريها منك حيعمل ايه؟ حتيجي على دماغ حد فيكيوا وممكن يتلط معاك الي عملهالك كبر راسك وخليك في السليم يا باشا من غشنا ليس منا احسبها صح تعشها صح

انت هنا بتسأل اهل خبره "متزعلش منى" فحاول تاخد بكلامهم ومتسمعش كلام حد بره
العبد لله مشيت فى ورق بى ام دبليو الفئه السابعه واشتريت الورق والقطمه وخلصت كل حاجة انت هتعملها ورحت للمرور اللى انا مظبط كل نجمه فيه وفى الاخر العربيه اتعرف انها مضروبلها ورق وانا لبست فى الحيط ومهما هتاخد حذرك مش خيكون زيي ولكن ربنا ستر والواسطه نفعت فى شيل المصيبه فقط
وبالنسبه للمخاسر فدى ربنا يعينى عليها
"متسمعش كلام حد بيقولك انا هخلصلك الموضوع ده ولو حتى ببلاش"
اللهم قد بلغت اللهم فأشهد

اقتباس:

---

المشاركة الأصلية كتبت بواسطة taswos

انت هنا بتسأل اهل خبره "متزعلش منى" فحاول تاخد بكلامهم ومتسمعش كلام حد بره
العبد لله مشيت فى ورق بى ام دبليو الفئه السابعه واشتريت الورق والقطمه وخلصت كل حاجة انت هتعملها ورحت للمرور اللى انا مظبط كل نجمه فيه وفى الاخر العربيه اتعرف انها مضروبلها ورق وانا لبست فى الحيط ومهما هتاخد حذرك مش خيكون زيي ولكن ربنا ستر والواسطه نفعت فى شيل المصيبه فقط
وبالنسبه للمخاسر فدى ربنا يعينى عليها
"متسمعش كلام حد بيقولك انا هخلصلك الموضوع ده ولو حتى ببلاش"
اللهم قد بلغت اللهم فأشهد

---

كتر خيرك وربنا يجعلها فى ميزان حسناتك
انت فعلنا لخصت الحوار معايا واديتنى المفيد وعن تجربة

ولا اغلى ولا حاجة بلاش مخاطرة احسن وبعدين دور هتلاقي معروض ب 45 لحد 50 وف الامان

كل اللي قالوة كوم وانها فيها من 3 الي 7 سنين سجن كوم تاني
عارف يعني ايه سجن وتلبس ازرق وتدخل مع اشكال ضالة وفئات قذرة عشان كنت عاز تركب عربية
اكيد مش مستاهلة

اقتباس:

---

المشاركة الأصلية كتبت بواسطة karim_monir

كل اللي قالوة كوم وانها فيها من 3 الي 7 سنين سجن كوم تاني
عارف يعني ايه سجن وتلبس ازرق وتدخل مع اشكال ضالة وفئات قذرة عشان كنت عاز تركب عربية
اكيد مش مستاهلة

---

ربنا يكرمك يا عم كريم

انا كل اسبوع فى السجن صدقنى بس زيارات مش مسجوووون هههههههههه

بنزور مع جمعية بتساعد الناس الغلابة
اللى منهم داخل علشان عليه قسط تلاجة واللى داخل علشان عليه فلوس استلف علشان يجوز بنته

وبرضو باشوف الاشكال الضالة بتاعت المخدرات والقتل والسلاح
وعارف يعنى ايه سجن من مجرد حكايات الناس اللى بازورها ويعنى ايه اول ما تدخل يبقى ليك 40 سنتيمتر بالطول تنام فيها وتحط حاجتك فيها وكل حاجة فيها
ويمينك يبقى واحد مش بيستحمى وشمالك واحد لا مواخذة عنده مرض جلدى
وما تقدرش تفتح بقك وتقول بم
ربنا ما يحكم على حد

لا أنصحك بالدخول في هذه المتاهة والراجل صاحب العربية لو بيعرف اللي بيدق الشاسيه وكمان بيعرف بتاع المرور اللي هيخلص - كان عمل كده وخلص العربية وباعها بالسعر اللي عايزه