مستعمل تقسيط

**fisha** · 17-09-2013 02:13 PM

السلام علكيم

مفيش مكان اقدر اجيب منه عربية مسعملة قديمة قسط فى حدود 30 الف يعنى ادفع جزء و اكمل الباقى انا عارف ان 30 الف مش كتير بس مش متوفر معاية كله دلوقتى و انا محتاج العربية ضرورى
فا لو فى حل ياريت حد يقولى

**I10** · 17-09-2013 02:46 PM

والله انا افضل انك بلاش تقسط وتجيب حاجه على قد الفلوس ال معاك
العربيات فى مصر سعرها بيبدا :- من 3 تلاف جنيه ( فيات 126 و سيات 133 ) بس من رائى بلاش
ممكن تجيب فيات 127 عربيه كويسه و بيتعمل فيها تظبيط بيخلى شكلها حلو سواء فيات 127 توب او العاديه

قول انت معاك كام وهتلاقى حاجه على اد فلوسك احسن متجيب حاجه مستعمله وبالقسط وممكن لاقدر الله متقدرش تسد القسط وتجيب وجع الدماغ لنفسك

تحياتى

**fisha** · 17-09-2013 02:49 PM

انا عايز حاجة كويسة فى حدود ال30 انا فى دماغى كذا عربية و لو على القسط انشاء الله هيدفع مش مشكلة بس انا عايز اعرف لو فيه مكان
شكرا ليك

**lidosasa** · 17-09-2013 03:23 PM

البنوك والشركات اللى بتقسط عربيات مستعملة بتشترط بعض الشروط وأهمها موديل السيارة ميكونش فات عليها 5 سنين أو ست من تاريخ الإنتاج وبالمبلغ اللى مع حضرتك مضافاً إليه فؤائد البنك مستحيل تلاقى عربية لم يمر على إنتاجها 5 سنوات بالسعر ده
الحل إنك تاخد قرض نقدى من البنك بالمبلغ اللى باقى ليك على شراء العربية لآن الضمانات اللى بياخدها البنك فى الحالتين واحدة بس حتفرق إنك بالكاش حتشترى عربية على مزاجك ومفيش عليها حظر بيع لصالح البنك وتقدر تبيع فى أى وقت وكمان مفيش تأمين شامل على العربية