الموضوع: التقرير المبدئى لاستخدام زيت ماتور زادو xado، ابيزا 94

مهندس ايهاب، مهندس محمد سيد، أنا مش مصدق نفسى، بيردوا على موضوعى، نورتونى والله يا حبايب، وان شاء الله سيتم التحديث المستمر عشان يكون مرجعية لحالة مثل عربيتى...

وبخصوص الزيت انا ركبته فى مركز عندنا فى الشيخ زايد لان كل البنزينات رفضت، عشان مش الزيت بتاعهم، أى ميكانيكى كويس هيعرف يغيروا، بس نصيحه بسرعة يا باشمهندس ايهاب لأنى مشيت ع الزيت اللى قبل ده، 6000 وهو كان 5000 فقط ونزل اسود ومحروق، والله بدون مبالغة تحس انه بترول خام اسوووووووود.

وبخصوص الأسئلة بتاعتك يا بشمهندس محمد، محدش يسأل الأسئلة دى الا واحد ما شاء الله لا قوة الا بالله، خبرة جدا وبيحب المنتدى جداً.

- طبيعة استخدامى للعربية يومياً هادى وسريع ومبحبش الإنتظار، من آخر الشيخ زايد لأول مدينة نصر، رايح جاى، يعنى يومياً بعمل بمعدل 90 إلى 100 كيلو غير المشاوير الداخلية فى الشيخ زايد..

- المحور بجرى فيه بسرعة ممكن تصل لــ 150 دلوقتى، وبعد كده بهدى، لــ 120 وممكن أمشى عليها بمعدل 7 كيلو تقريباً، وبفرمل ممكن فجأة لو لاقيت المحور وقف فى مكان مش معتاد عليه، والعادى انى مبقلش عن 100 او 110 ومع مراعاة وجود ارتفاعات فى بعض الأماكن كانت فى الأول العربية سحبها يضعف جدا وينزل بسرعة الآن بفضل الله أصبحت السرعة تنزل تدريجياً وتثبت ومتنزلش عن 80 بعد سرعة 100.

- نيجى للحركة الديناميكية، التسارع والتباطؤ وده بيبقى فى وسط البلد من ميدان لبنان وعندك لحد مدينة نصر وكوبرى اكتوبر والعكس لحد ما استلم المحور، السرعة من20 او 40 لحد 80 لحد 100 بالكتير .. وفى ظروف حرارية صعبة جدا، وتوقف مفاجئ وانطلاق مفاجئ بسبب الميكروباصات والعوامل الأخرى.

يا ريت لو بعد ما خلصنا التقرير كاملاً لو ينفع نضيف المعلومات المهمة فى الموضوع نفسه، وموضوع طريقة السواقة ده يبقى خير جدا لانى مجاش على بالى وانا بعمل الموضوع.. وانا ان شاء الله هحديث تحديث مستمر، وادعوا انه يبقى زيت كويس عشان نستريح من باب شاغل كتير من اصحاب السيارات.