الطريق من كارفور المعادي لموقف سوبرجيت ألماظة والعودة

السلام عليكم ورحمة الله وبركاته

الحقيقة ,, انا استفدت باكتر من طريقة
في منتدى نايل موتورز
من غير ما اكون عضوة فيه
ولما لاقيت أنى كل ما أعلمل بحث على أى حاجه
خاصة بالعربية أو بالطرق
يحولنى على المنتدى
حبيت اشترك فيه
أسجل أعجابي بخدمات الأعضاء لبعضهم البعض
والموضوعات المفيدة
أنا كونت مثلا معلومات مهمة عن البطاريات لما أدبست أنى اشتري بطارية
وحسيت أن معاملة البياع اختلفت لما عرف أنى فاهمة شوية
كمان استفدت من معرفة أكتر من طريق ووصف أركب أيه أو اومشي أزاى على الطريق
لذلك شكرا للقائمين على المنتدى
وللأعضاء الأفاضل

ثانيا ,,, عاوزة أعرف أروح ازاى من كرافور المعادي
لموقف السوبرجيت في الماظة -- وأرجع تانى لنفس المكان
مع العلم أنى مش من القاهرة
فمعلش دلونى باى شئ في الطريق معروف أو مشهور
وأن شاءلله ربنا معايا
شكرا لكم

اسهل طريق انك تفضلى ماشيه فى الدائرى ناحيه طريق السويس و تعدى نفقين التجمع و بعد كده هتلاقى موبيل على ايدك اليمين و بعديها منزل طريق السويس، هتسيبيه و تنزلى اللى بعده ب500 متر و ده هيبقى هيخدك ناحيه المطار و مضر الجديده. هتفدلى ماشيه طوالى و هتطلعى كبرى الجيش و تنزلى و تكملى لحد لما تلاقى كوبري فوق الطريق بالعرض تدخلى اول يمين بعديه و اخر الشارع ده هتلاقى موقف الماظه على ايدك الشمال.

بالنسبه للرجوع فا هو عكس كده بالظبط، هيبقى الموقف على ايدك اليمين فا تفضلى ماشيه لاخر الشارع لحد لما ياخدك يمين فى شارع الثوره، هتاخدى او u-turn شمال و ترجعى و تفضلى ماشيه علاطول، هتعدى تحت كوبري بالعرض و بعد كده هتطلعى كوبرى الجيش و تكملى علاطول لحد لما تلاقى كوبرى تانى فوق الطريق ده كوبرى الدائرى هتاخدى اول مطلع و ده اتجاه المعادى علاطول و هتنزلى نفقين و تفضلى كده حوالى 15 دقيقه لحد لما تلاقى كارفور على شمالك هتلاقيله مدخل يمين بيلف على نفق عشان تطلعى على كارفور على طول و بس كده.

سواقه ولا مواصلات؟
مواصلات يبقى تاكسى
لو سواقه هتطلعى من عند كارفور ائرى اتجاه التجمع ... طوالى هتنزلى نفقين و شويه هتلاقى بنزينة موبيل على اليمين فيها on the run و بعدها فندق jw mariot هتلاقى بعده منل ريق السويس اتجاه السويس تفوتيه و تنزلى المنزل التانى (طريق السويس اتجاه الماظه) المنزل هيلف بيكىفى الاتجاه الصح و تكملى طوالى هتلاقى كوبرى تطلعيه و بعد شويه هتلاقى كوبرى بالعرض تخشى فى اول يمن بعديه (سور مطار الماظه هيكون على يمينك) و طوالى هتوصلى محطة السوبرجيت على الشمال و مستشفى مصر للطيران على اليمين تلفى يوترن و ترجعى للمحطه ....

الرجوع زى المرواح بس العكس .... من المحطه ترجعى فى نفس الشارع هتوصلى لطريق السويس هتخشى يمين مع الطريق و تلفى يوترن و ترجعى تعدى من تحت الكوبري و طوالى هتطلعى كوبرى و بعد شويه تاخدى اول مطلع للدائرى (بعد الشرطه العسكريه) و تمسكى الدائرى طوالى هتنزلى نفقين و طوالى وعند كارفور فى نفق بتنزليه يمين بيلف تحت الدائرى و يدخلك عند كارفور

كل الشكر للشرح الوافي
بارك الله فيكم ( ipiza , mohamed-seliem )
تسلمولى يارب

الحقيقة أنا حبيت اكرر شكري
لوصف الأعضاء الأفاضل
أنا الحمدلله ,, رحت ورجعت
والوصفه سهلة جدا
وما سألتش حد في الطريق
وكنت ماشيه مطمنه جدا جدا

تسلمولى وبارك الله فيكم
انا دعيتلكم طول الطريق والله وأنا راجعة