حسام باشا صباحك فل
التقرير :-
انا لما جبت المساعدين الساكس اللى المفروض انهم المانى من الاول كنت شاكك فيهم بس بما انى شاريهم من محل معروف وهو محل فتح الباب قولت مش معقول الناس دى هتجيب حاجة مضروبة والمساعدين ماكنش محفور عليهم بلد المنشاء ما فيش غير استيكر وبس يعنى لو الاستيكر اتشال كل سنه وانته طيب ولا هتعرف دول منين ..... المهم بعد ما ركبت المساعدين الساكس عن واحد عفشجى فى حلوان من طرف صديق ليه تاجر سيارات بصراحة شكر فى المساعدين ..... الحيقية يا شباب اخوكم محسوك شوية من النوع اللى بيركب العربية بودانه مش برجله وودنى تلقط كل كبيرة وصغيرة بتحصل فى العربية ..... المهم .... تانى يوم مشيت بالعربية حسيت ان التغيير للأسوء العربية ناشفه اوى ومش مريحه كدا وسلسه فى المطبات روحت متصل بفتح الباب ... يا باشا هيه المساعدين ناشفه اوى كدا ليه قالى اصبر شوية لحد العفشة ما تشتغل قولت له ماشى .... صبرت اسبوع وما فيش فايدة روحت للمحل قولت له انا اللى كلمتك من اسبوع والمساعدين ناشفه جداااااااا ..... نده على واحد ميكانيكى اسمه محمد بس الشهادة لله ولد ماشاء الله عليه هاااااااااااااااايل ولو حد محتاج اى حاجة الواد ده تمام التمام وانا تحت امركم لو عايزين اعرفكم عليه .... المهم جه محمد بص ع المساعدين وكرر نفس الكلام قالى اصبر عليها شوية .... غبت اسبوع ورجعت وناى على اخرى بس بتكلم بكل زوق وادب لانهم بصراحة محترمين جدااااااااااا قابلنى واحد اسمه وليد شغال فى المحل انسان محترم جدا حكيت له الموضوع نده على محمد الميكانيكى فك المساعدين ما اخدوش فى ايده ربع ساعه وكان مسقط الاتنين اللى قدام بيحرك المساعد بايده لقه المساعد عايز عافيه عشان يطلع وينزل قال لوليد يا وليد المساعدين دى ناشفه اوى .... راح عمنا وليد جاين اتنين نفس النوع الزباله ( ساكس ) اللى المفروض انه المانى اصلى لقينا الجداد نشفين بردوا هيه هيه نفس القصة ..... قالى لو عايز الفلوس خدها بصراحة اتحرجت من زوقه ومارضتش خصوصا ان الموضوع لسه ليه ديل ( المساعدين الخلفية ) قولت له لا يا عم انا مش عايز ارجعهم لو عندك نوع تانى مضمون هاتوا قالى ممكن اجيبلك نوع برازيلى وكويس .... مضمون يا وليد قالى تمام وعلى ضمنتى بردوا ....... قولت له ماشى اسمه ايه قالى كوفك تقريبا .... بعت جبيهم من محل تانى ودفعت فرق 75 جنيه .... جربناهم قبل التركيب بيطلعوا وينزلوا معاك وشغالين ركبتهم .... بصراحه فرق تانى خاااااااالص ..... اسبوعين كدا ولو اللى ورا ما ظبطوش هروح ارجعهم .
الاستفاده من الموضوع بقا :-
1- من هنا ورايح مش تشترى حاجة مش مدموغ عليها اسم بلد المنشاء .
2- لو لقيت قطعة الغيار ملزوق عليها تكت او استيكر ومش محفور عليها بلد المنشاء اعرف انها شمال وما تاخدهاش .
3- لما تشترى اشترى من محل محترم عشان ما تلفش حولين نفسك وتخسر .
4- لما اشتريت لمساعدين بصراحة ما عنديش الخبرة الكافية بقطعة الغيار دى وما كنتش مشترك فى الموقع هنا .... لكن ان شاء الله لا خاب من استشار واى قطعة غيار بعد كداا قبل ما اجبها هستشير الناس المحترمه اللى هنا .
ده اللى استفادته من الدرس ده
يا رب تكون النصايح ده مفيده لكل الناس وما تقعش فى نفس المطب بتاعى :M_yes[1]:
بس الحمد الله ربنا سترها والفلوس لحد دلوقتى نصها حلال ههههههه