سراب شركات ضمان المحمول فى مصر
السلام عليكم ورحمه الله وبركاته
مين فينا قابل مشكله مع ضمان الموبايل بتاعه
قصدى مين فينا مش قابل مشكله :gun_smilie:
تعالوا نعرف المشاكل دى ايه ونشوف التوكيل او الضمان عمل ايه
هبدأ بنفسى:cool2:
معرفش ايه اللى خبطنى فى عقلى وقولت اشترى جهاز موبايل من مصر مع انى متعود انى اشترى دايما من برة وخصوصا من الامارات (علشان اكون ضامن الجوده وابعد عن الصين المصرية)
قولت هتفرق ف ايه العدد كلها بلاستيك
فبعد بحث وتدقيق عن افضل المكونات والاسعار رسيت على نوكيا 3110 نزلت فدورت فى المحلات جنبى على الموديل ده ومش لقيت الا ضمان اى تو
فقولت لنفسى شركة ضمان دولى وبسمع عنها وتوكلت على الله واشتريت
الكلام ده يوم 10-8-2008 فخلال مده اسبوع اسبوعين الجهاز لقيته بدء مشاكل يعنى بيرستارت لوحده و صوته فى مشكله فيه :011:
ان لما حد يرن عليا الرنين بيبقى تصاعدى مع انى ضابط الرنين انه رنين متواصل عادى
وكمان المنبه صوته يكاد يكون مسموع
فدخلت على الانترنت سرشت لقيت موقع لتقييم الموبايلات اسمه gsmarena
دخلت وشوفت اراء الناس فى الجهاز ده لقيت اللى بيشكر فيه واللى بيقول فيه قصايد فى انه مليان مشاكل:ymca:
ولقيت بيقولوا نفس المشاكل اللى عندى فعرفت انها مشكله موديل:ANSmile23:
(درس رقم واحد مش تدور على امكانيات المحمول وبس دور برضه على العيوب اللى فيه واعرفها واعرف هتناسبك ولا لا) :bigear:
فرجعت بالجهاز الى مركز خدمه اى تو بالزقازيق
فدخلت ومن اولها مش استبشرت خير منظر المركز مش استريحت له مكان الانتظار فيه كراسى قليلة وحتى اللوحه اللى بينادوا بيها على العملاء مش شغاله وشكلها محروقة ولما دخلت فى دورى لموظف خدمه العملاء مش لقيت كراسى ولا حاجه (كانهم بيقولوا يا بخت من زار وخفف) يعنى طول فترة الكلام مع الموظف انت وهوا واقفين وبينكم كونتر و دخلته الصيانة وقولت له على العيوب اللى فيه والمسئول فهمنى ان الجهاز من طبيعته ان تنبية بيبدأ واطى وبيعلى بعد كده (مش مقتنع لان اوبشن الجهاز فيه الخيار اللى بيخلينى بتحكم فى التنبية)
فقولت له اللى اعرفه ان فى خاصية فى السوفت وير للجهاز بتخلينى اتحكم فى طريقة التنبية
فقال لى هيتسلم الجهاز وهيتم اللازم فيه وادانى ايصال بالجهاز وبالعيوب اللى فيه لقيت انه كاتب من ضمن العيوب "ضعف فى جوده الصوت" قولت له يوضحها لان الشكوى مش كده الشكوى ان النغمات دايما بتبدء واطيه وبتعلى حتى لو ضبط الرنين على رنين متواصل
فعدل المكتوب واستلم منى الجهاز ومشيت
وبعد كده دخلت على موقعهم على النت اتابع حركه الجهاز فى الشركه عندهم فطلعت فى دماغى اشوف الايصالات اللى قبلى واللى بعدى وخصوصا وانى لما كنت فى المركز كان فيه واحد عنده مشكله فى نفس الجهاز وجاى يشوف فيه ايه
فدخلت ارقام الايصالات اللى قبلى واللى بعدى وعملت زى احصائية لقيت ايه؟
ان مركز خدمه عملاء الزقازيق التابع ل اى تو بس دخل له خلال 5 ايام اكتر من 15 محمول من نفس الموديل نوكيا 3110:eek:
فمن هنا عرفت انها مشكله منتج
وبالاضافه الى اللى قرأته على الانترنت من اراء حول الجهاز ومشاكله
وايقنت ان الجهاز ده بايظ ( كموديل)
فبعت ايميلات ل مركز خدمه اى تو وكمركز محترم له اسمه كنت متوقع استجابة سريعه فلم اتلقى منهم اى جواب:007:
فبعد ان يئست منهم بعت لنوكيا كير لاين الشرق الاوسط ودول بصراحه مش كنت متوقع منهم الاستجابة السريعه دى فضلت الايميلات شغاله بينا وعرفتهم بكل المعلومات اللى عرفتها وجمعتها من الانترنت وانى عاوز اغير الجهاز ده لان فيه عيوب وعاوز اجيب جهاز اعلى فالنتيجه الاخيرة اللى هما قالوا لى بالنص
Please note that [ warrantee, swap, refund ] is an internal matter related to the Authorized service center, Nokia provides the technical support and training, but Nokia does not interfere with internal polices regarding [ warrantee, swap, refund ], so we strongly recommend that you contact Raya for further details regarding this issue.
:011:
فمعرفش ايه دخل رايه فى الموضوع بس فهمت انها نظام زحلقة
فسبتنى من ده كله وبعت للجهاز القومى لتنظيم الاتصالات (لغايه دلوقت لا حس ولا خبر منه):crazy4:
وكلمت جمعيه حماية المستهلك وبعت ليهم ايميل بالشكوى فاستلمت منهم رساله
برجاء مراجعة الأستاذ / محمد عبد المنعم مدير المبيعات شركة اتصالات
I2
وأبلغه انك من طرف جمعية حماية المستهلك بالشرقية فقد تم الاتفاق معه لحل مشكلتك
فذهبت اليه مستبشرا خير
فقابلت مدير المبيعات وحكيت له المشكله واننى ارغب بتبديل الجهاز بجهاز افضل لثبوت فشل هذا الموديل
فقال لى ان جهازك سليم وكل اللى فيه كان سوفت وير محتاج تحديث وانه اتغير خلاص واتعمل له التحديث
فقولت له مشكله الصوت قال لى ان الجهاز دلوقتى سليم
فنزلت استلم الجهاز من الصيانه و حبيت اطمن على الجهاز واجربه واثناء ما كنت بجربه قال لى موظف خدمه العملاء(هيا خدمه فعلا) فيما معناه انك جربه بعدين بعد ماتطلع علشان الناس اللى واقفة مستنيه دورها فاستغربت وقولت له ان مش من حقى انى اطمن ان المشاكل اللى كنت بشتكى منها اتحلت
فطبعا اول مشكله اللى هيا مشكله الريستارت مش هتبان
دخلت على مشكله الصوت
صوت المنبه واطى زى ما هوا ( زى ما يكون بيرن وهوا مكسوف انه يصحيك)
وجربت اضرب على التليفون فلقيت ان نغمه الرنين بتبدأ واطيه وبتتدرج لحد ما تعلى بعده كده
فكده مفيش حاجه اتعملت فى المشكله دى:surprise:
فلفت نظرى الموظف ان ده من موديل الجهاز انه يبدأ الرنه بصوت واطى " طب ازاى والسوفت وير فيه اختيار انك تظبط النغمه رنين ولا تصاعدى"
وفضلنا فى شد وجذب:boxing_smiley: لحد ما لقيت ان خلاص مش منها فايده ومشيت
ففكرت اطلع اعمل محضر طب ما انا رحت لحمايه المستهلك وادى وش الضيف
وصحيت وافتكرت اننا فى مصر
:049::walkman:
عن نفسى مش مقتنع باللى حصل ده وحسيت انه نصب فى نصب
ومعرفش ليه افتكرت عبد المنعم مدبولى وهوا بيقول
انا اللى جبت ده كله لنفسى
وتوبه من دى النوبة انى اثق فى توكيل او ضمان له فرع فى مصر
وبفكر حاليا اعمل صفحه على الفيس بوك نجمع فيها ضحايا التوكيلات والضمانات فى مصر ونعمل كده زى قائمة سوداء
