الموضوع: طلب مساعدة في مشكلة يا رب تكون بسيطة

عندي مشكلة في العربية و يا ريت خبراء المنتدى يفيدوني فيها
العربية دايو نوبير 2 موديل2001
كنت بحطلها زيت موبيل 3000 كيلو بس لقيت صوت التاكيهات عالي و العربية عاملة زي ماكينة الخياطة
غيرت لزيت شل الاصفر 5000 كيلو و الدنيا اتظبطت و الصوت هدي و قلت هستمر عليه
بس فجاة لقيت الصوت رجع تاني اكتر من الاول دة غير صوت تاني غريب بيظهر و يختفي عامل زي المواتير الديزل ( تحديدا صوت الجرار الزراعي او ماكينة الري ) و لمبة الزيت بدات تنور و ترعش
رحت للميكانيكي اللي بتعامل معاه قاللي الزيت بقاله كتير و لازم يتغير قولتله دة بقاله 1600 كيلو بس قاللي يبقى الجركن دة مضروب و نحط زيت جديد و العربية هتظبط
عملت كدة و برضه الصوت زي ما هو و لمبة الزيت لسة بتنور فالميكانيكي قاللي يبقى كدة طرومبة الزيت ضعيفة و ما بتوصلش الزيت لاعلى الموتور ولا زم تتغير
علشان اتاكد رحت لميكانيكي تاني معرفوش بص على العربية و قاللي نفس الكلام قلت مابدهاش
جبت طرومبة زيت جديدة اصلي و رجعت على الميكانيكي بتاعي كان عايز يديلي واحدة من عنده بس انا صممت اجيب جديدة و جبت الاصلية اللي مطبوع عليها gm و ختم منصور و الطرومبة نفسها مدموغ عليها شعار دايو
المهم ركبنا الطرومبة و غيرنا الزيت و فلتر زيت جديد اصلي و اويل سيل الكامة و بالمرة نظفت البوابة و غيرت زيت الباور و بعد 5 ساعات شغل قفل و دور يا عم و هنا كانت المفاجاة
الصوت زي ما هو و لمبة الزيت لسة بتنور على السلانسيه
البيه الجهبذ العبقري بيقولي امشي عادي و مع تغيير الزيت 3 او 4 مرات العربية هتتظبط و الصوت هيروح و انا بصراحة مش واثق في كلامه و مش عارف اعمل ايه؟
يا ترى كلامه دة صح ؟ و الصوت دة من ايه ؟
و هل فيه خطورة اني امشي بالعربية كدة ؟
ارجو الرد و شكرا مقدما