لسه راجع من شرم الشيخ بالعربية .. شكر واجب للمنتدى
السلام عليكم،،
أنا لسه راجع من شرم بالعربية، وكانت أول مرة أسافر شرم وقبل السفر كنت حاطط خطة شاملة للطريق (الوقفات والاستراحات وأماكن البنزين وأماكن الخطر وأماكن السرعة والمسافات بين المدن) وكانت الخطة قائمة بالكامل على مواضيع الأعضاء في هذا المنتدى، فشكرًا لهم وشكرًا للقائمين على المنتدى، واطمئن من يريد أن يسافر بالسيارة إن الطريق آمن تمامًا وممتع لمن تستهويه مناظر الجبال الرائعة وجو الصحراء.
نصيحة: يفضل السفر بعض الفجر، يعني تمسك أول طريق السويس الساعة 6 صباحًا، وده اللي أنا عملته والطريق كان سلس جدًا وممتع وكان نفسي حد يفتش العربية (فتشني فتش) محدش كان بيفتش (يمكن عشان كان معايا العائلة)والحمد لله وصلت شرم الساعة 12 ونص تقريبًا، استريحت مرة واحدة استراحة كبيرة في بنزينة وطنية اللي عند النفق وبعد كده وقفات خفيفة كده بالعربية على جنب.
وأنا جاي معرفتش أكرر الموضوع ده وأطلع من شرم بدري كده، على ما فطرت في الفندق وطلعت كانت الساعة عدت 11، من مساوئ الميعاد ده إني وصلت النفق حوالي الساعة 4 ونص والوقت ده تزامن مع عودة سيارات السوبر جيت وسيارات نقل من مختلف الأحجام وسيارات ناقلة حاجات غريبة (خرده وبلاستيك وحاجات لإعادة التدوير) والحاجات دي بتتفتش عند النفق والدنيا كانت زحمة جدًا عند النفق، فياريت تجنب المرور من النفق في فترة بعد الظهر لآخر النهار، والله أعلم، وبسبب الزحمة دي اتأخرت والدنيا ليلت عليا في طريق السويس (كنت عامل حسابي أرجع قبل المغرب) وقولت الحمد لله الواحد مش هيعمل حساب كل حاجة.
شكر خاص للأعضاء:
kingrab
Ashraf A.Kader
Land_Cruiser
damasry
