الموضوع: مبروك كسبت 100 ألف جنيه من فودافون

من أغرب قصص النصب اللى مرت عليا فى حياتى
وأنا فى شغلى الأمن أتصل بيا من على البوابة فيه واحد عنده مشكلة كبيره . ماشى خليه يطلع
وبعدها جالى راجل شكله تاجر ومن أصل صعيدى وحالته ميسورة أتفضل أستريح خير يا فندم تحت أمرك
قالى أنا جالى رسالة على تليفونى المحمول مبروك حضرتك كسبت 100 ألف جنيه من فوادفون لإستلام الجايزة أتصل على رقم ............010 رقم تليفون عادى جداً . وورانى الرسالة جايه ليه من تليفون محمول وفى نهاية الرسالة مكتوب الراسل vodafone وأنا فى سرى بقوله هى كده تبقى من فودافون . وبعدين يا حج قالى قمت متصل بالرقم رد عليا واحد وقالى مع حضرتك فلان الفلانى من خدمة عملاء فوادفون وحضرتك كسبت معانا 100 ألف جنيه تجيى المقر الرئيسى فى الحتة الفلانية تستلمهم بكره بس لازم حضرتك تبعت لينا 2000 جنيه رصيد على الرقم اللى كلمتنى عليه ومتقلقش الرصيد حيرجع ليك الضعف يعنى 4000 جنيه فى ساعتها بس ده روتين أنا جالى إزبهلال لا إرادى .
وبعدين يا حج قام مطلعلى كبشة كروت فودافون فئة ال100 جنيه وقالى قمت باعت ليه الرصيد وجالك قلب تقعد تبعت كل الكروت دى ؟!!!!!!
وبعدين يا عمنا قالى بعد ما خلصت جاتلى رسالة من نفس الرقم لقد تم شحن رصيدكم بملبغ 4000 جنيه الراسل VODAFONE . قالى جيت أعمل مكالمة لقيت رسالة رصيدك غير كافى قمت شكيت ( بتشك فى الوقت المناسب يا حج برافو عليك ) قالى جيت أتصل بالرقم لقيته مغلق ( طبعاً لازم يقفله خلاص قضيت وعمل الخميرة ) جيت رايح للمقر الرئيسى اللى كان قالى على عنوانه عشان اشوف الموضوع قالوا ليا مفيش مسابقات خالص من النوع ده وأى مسابقة بنعلن عنها فى الإعلام طب إدونى إسم صاحب الرقم ده قالوا ليه آسفين لازم إذن من النيابة
طب إنتى جايلى أنا ليه دلوقتى يا حج قالى مش إنتوا تبع الإتصالات يا حج إحنا المصرية للإتصالات هو أى حاجة فيها إتصالات تبقى منفدة على بعضها ولا أيه ؟؟؟؟
طيب أعمل أيه قولت ليه روح أعمل محضر على الأقل ممكن النيابة تصرح ليك تجيب إسم صاحب الخط وعنوانه على الرغم إنى متأكد إن الواد العفريت اللى عمل كده واخد إحتياطه ومش بعيد يكون هرب بره مصر بالمبلغ المحترم اللى عكشه من الحج
وأتأكدت يومها من المثل اللى بيقول طول ما فيه طماع فالنصاب بخير