معلش بس اضافة بسيطة عشان الصورة الاكبر تبقى اوضح.... الاخلاق موجودة منذ بدأ الخليقة و منبعها الفطرة اللى وضعها ربنا سبحانه و تعالى فى البشر متمثلة فى الضمير..... دى فطرة بشرية تولد مع الانسان و تتشكل مع نشأته ايضا..... يعنى الضمير رغم انه منبع الوازع الاخلاقى الفطرى الا انه ممكن يخطأ و يمكن اسكات صوته و ايضا يمكن تدريبه ليكون اكثر حساسية او اكثر بلادة و ده حسب البيئة المحيطة
الدين بعد كده جه قنن الاخلاق الفطرية دى و مدح الجيد منها و استهجن ممارسات مجتمعية اخرى و كان وسيلة مهمة لتهذيب الضمير الفطرى اللى ربنا خلقه فى الانسان..... و بالتالى اصبح الدين بعد كده فى تطور البشرية رافد مهم فى تكوين الحس الخلقى عند الانسان...... و ده اللى بيفسر ازاى شعوب ممكن يكون معندهاش دين سماوى لكنها اخلاقيا راقية جدا زى اليابانيين مثلا
و ادعوا الجميع لقراءة الكتاب ده و اسمه فجر الضمير من تأليف جيمس هنرى بريستد...... درس فيه نشأة و تطور الحس الخلقى عند المصريين القدماء عبر تاريخهم الطويل و خرج بنتائج مذهلة
و هضرب مثل واحد بس من اللى مكتوب فيه..... المصريين القدماء كانوا بيؤمنوا بالبعث و الخلود و الجنة و النار قبل ظهور الاديان...... و مفهومهم عن الاخرة و الحساب فيها و الحاجات دى كلها حطوها فى كتاب اسمه (كتاب الموتى) كان بيصاحب الميت فى مقبرته كأنه خريطة للعالم الاخر تهدى خطواته..... احد فصول الكتاب ده فى المحاكمة الاخيرة للميت لتقرير اذا كان صالح يستحق الجنة او طالح يستحق النار فصل اسمه الاعتراف السلبى...... يعنى يقعد الميت يقول امام قضاة العالم الاخر اقسم انى لم اكذب اقسم انى لم اقتل اقسم انى لم اسرق و هكذا يقعد ينفى عن نفسه كل الموبقات..... تخيلوا من ضمن الحاجات اللى كان بيقسم عليها المتوفى كانت ايه..... كان من ضمنها انه يقول (اقسم انى لم الوث ماء النهر)...... اد كده كان الاحساس الخلقى عالى لدرجة ان مجرد تلويث ماء النهر الذى يعنى الحياة تعتبر جريمة...... نتخيل بقى لو واحد من المصريين القدماء تم بعثه دلوقت هيجراله ايه من اللى هيشوفه اتعمل و بيتعمل فى النيل :) هتجيله ازمة قلبية تخليه يرجع يرمى نفسه جوه التابوت تانى و يقول اقفلوا عليا الله يخليكم :)
انا حاولت اجيب لينكات لكتاب فجر الضمير بس مش كل حاجة مفتوحة مع انه متاح للتحميل على مواقع الشيرينج.... بس لقيت اللينك دى و اوعدكم انكم هتستمتعوا:
فجر الضمير by James Henry Breasted - Reviews, Discussion, Bookclubs, Lists
المفضلات