الموضوع: تخيلوا ان حلم عمرى انى اكون راعى غنم

أنا بقى نفسي أجيب يخت و اعيش عليه لوحدي في البحر و مكلمش ولا أشوف أي بني آدم لأني تعبت بجد :(

أمنيتك رائعة
ومستغربة على أصحابك اللي ضحكوا من أمنيتك
يعنى هما مبسوطين أوي في البلد دي ؟!
دا أنا كتير آخد أولادي أروح أبو سلطان في قرية سياحية هناك أقعد يومين ثلاثة
وبروح أبو سلطان علشان مكان قريب وما أتعبش من السواقة وسعرها مش غالي
وأنا هناك بشوف بيوت من دور أو دورين على الطريق
على ترعة صغيرة
والبيوت فيها تكييفات
وسلك على الأبواب
وبعض الطيور والحيوانات أمام البيت أو (الفيلا زي ما أنا شايفها )
وبتمنى أكون وسط الناس الطبيعيين دول
وبركن ساعات أسأل عن الأسعار والحياة والمدارس والمرافق
لكن بحس إني هظلم ولادي
هيعيشوا وسط أرياف ولهجة غير لهجتهم
وهيكونوا مربوطين بالنت أمام الكمبيوتر بس
معندهومش علاقات
ملهمش خروجات
صعب شوية
ربنا يخلي لنا أولادنا

المشاركة الأصلية كتبت بواسطة janagabr

انت هتقلب عليا المواجع ليه انا لفيت بره برده من امريكا لفرنسا لانجلترا واخيرا الخليج لحد ما قولت كفايه كده ارجع بلدي واديني لبست اكبر خازوق في حياتي واكتشفت ان الازمه في مصر هي ازمه شعب بانعدام الاخلاق علي كل المستويات وفعلا انا حاليا مفتقد الامن والامان وفتقد راحة البال وانعدام الثقه في الناس واكتشفت اننا في مصر مش عايشين اصلا وكل حاجة بنعملها غلط في غلط لدرجه ندمت علي اني اتولدت في مصر وضاع وقت من عمري فيها بس الحمد لله علي كل شئ الوظيفة اللي نفسي اشتغلها الصراحة اي حاجة بس تبقي بره مصر وبعيد عن المصريين فعلا اللي ما سافرش بره فعلا هو ماعش دنيا ولا هيطول اخره وميعرفش يعني ايه صح من غلط والغريبة الناس عندها قناعة وثقة في غلطها بطريقة رهيبة كفاية كده وخلينا ساكتين احسن تخيل ممكن نقف في اشارة لوحدنا الساعة ٣ بالليل ومفيش مخلوق في الشارع ولا في شرطة ولا حد يراقبك وبرده افضل واقف في الاشارة لحد ما تفتح

المصيبه الاكبر ان الناس حتى المتعلمه بتعمل الغلط وهى مبسوووووطه وفرحانه وكان الفوضى وعدم احترام القانون هدف لهذا الشعب
مثال صغير بيضحكنى من الهم
لما بكون مسافر رحله طويله وفيها ترانزيت وتغيير لشركه الطيران فى مقطع معين بلاقى ان المصريين لما بيكونوا راكبين مصر للطيران بيحسسونى انهم قاعدين فى دوار العمده ونفس البشر اول مايركبوا شركه الطيران الاجنبيه المكمله للرحله بلاقيهم اتغيروا ١٨٠ درجه والتزموا بالقوانين والسلوكيات المحترمه
يبدو ان الحل الوحيد هو ان يحكمنا محتل اجنبى

المشاركة الأصلية كتبت بواسطة lidosasa

وأيه المانع إن حضرتك تعمل كده لفترة بسيطة ولو أسبوع على سبيل الإستجمام وكأنك بتصيف مثلاً وحيكون للموضوع ده تأثير نفسى كبير عليك وحترجع لحياتك الطبيعية بروح جديدة . بس مش رعى غنم لإنها صعبة ممكن تروح ريف عند حد من قرايبك وتقعد على شاطىء الترعة تصطاد سمك وتنزل الغيط ومعاك مشنة العيش وحتة جبنه وتقطف شوية طماطم ولا خيار ولا شمام طازة من الآرض . أنا من فترة كبيرة حوالى 10 سنين كنت عند قرايبى ونزلت الأرض تقعد هناك تنسى نفسك والفرجة على الفلاحين وهما بيراعوا الآرض تضيع الوقت وتخلينا نحمد ربنا على النعمة اللى إحنا فيها لآنهم بيشقوا بجد وكانت الآرض مزروعة شمام وتخيل بقى طمعه أيه وإنت لسه قطفه بإيدك من الآرض

والله بعمل كده لان الارض موجوده والاهل موجودين بس مش هو ده اللى انا عايزه لان الريف معدش زى زمان، يا فندم دول بيشتروا عيش فينو من الفرن
والسبب الاكثر الما ان الكبار المتربيين على الاصول ماتوا

المشاركة الأصلية كتبت بواسطة saddam

صديقي المواطن
أؤيد اﻷخوة.المواطنين في هذا الموضوع بأن الحياة داخل مصر صارت جحيما أكثر منها راحة.والمشكلة.محدش فاهم كلامنا.غير ناس سافرت بره مصر غير كده حيقلك إنت بتكره البلد ودمتم للنضال
ملحوظة رعي اﻷغنام مهنة صعبة وليست سهلة وأنت معجب بصورة حياة وليس أصل تلك الحياة وكيف تكونت هذه الصورة.فأنت تريد العنب ولا تريد أن تزرعه وتتعب فيه تريد أن تأتي ساعة الحصاد فقط وده مش حينفع
ممكن.تسافر لبنان أو تركيا شهر تأجر بيت في جزيرة ياللاوا كلها وديان وشلال ومرتفعات وخضرة وسلاحف وتوت وعسل ومارس هوايتك براحتك وحتبقه مبسوط وسعيد

انا اشترطت على نفسى فرمته مخى ( اخر سطرين فى الموضوع) حتى اقبل بهذه الحياه عشان مبقاش عايش وعارف ان فى نت وموبيل وملذات وتكنولوجيا اللى مسهرانى لحد دلوقتى

المشاركة الأصلية كتبت بواسطة kamal12

ممكن تسافر إلى الداخله (12 ساعه من القاهره بالاتوبيس ) بلد جميله و أرضها منبسطه و ناس على الفطره
ولو جربت وعجبتك البلد ممكن تشترى أرض هناك

والله فكرت فى توشكا وسالت بس لقيت الموضوع محتاج حركه جريءه زى بتاعت الافلام الاجنبى انك تدخل تخبط الباب على مديرك وتقله اللى فى نفسك وتقدم استقالتك وتخرج تشم احلى هوا يدخل صدرك وتاخد شنطك وولادك وتقصد وجه كريم
وانا اعتقد ان الاصل فى الحياه هو (فسيحوا فى الارض) شوف كده اللبنانيين والسوريين بيهاجروا حتت غريبه زى غرب وشرق افريقيا اللى احنا فى مصر ميعرفش اسماء بلادها الا وزاره الخارجيه

المشاركة الأصلية كتبت بواسطة wawamoha

و الله و مين سمعك ...س انا بتهيالي الكلام ده هايكون في الجنة و نعيمها يا حبيبي
هههههه
ربنا ينولك مرادك
زمان كنت متفق مع واحد صاحبي سوري اروخ اقعد عنده الصيف في سوريا اللاذقيه ... و دي للي ما يعرفش حبل و خضره و بحر
بس للاسف الظروف ما سمحتش ده الغير الوضع اللي هما فيه دلوقتي ....
اضم امنيتي لامنيتك

انا من عشاق سوريا ورحتها اكتر من ١٠ مرات والمنطقه اللى انت بتحكى عنها دى اعتقد اسمها ( كسب) على حدود تركيا وهى فعلا جنه الله فى الارض
بس فين بقه قول للزمان ارجع يا زمان سوريا قدامها بتاع ١٠٠ سنه عشان ترجع

المشاركة الأصلية كتبت بواسطة mohyeldin1974

المصيبه الاكبر ان الناس حتى المتعلمه بتعمل الغلط وهى مبسوووووطه وفرحانه وكان الفوضى وعدم احترام القانون هدف لهذا الشعب
مثال صغير بيضحكنى من الهم
لما بكون مسافر رحله طويله وفيها ترانزيت وتغيير لشركه الطيران فى مقطع معين بلاقى ان المصريين لما بيكونوا راكبين مصر للطيران بيحسسونى انهم قاعدين فى دوار العمده ونفس البشر اول مايركبوا شركه الطيران الاجنبيه المكمله للرحله بلاقيهم اتغيروا ١٨٠ درجه والتزموا بالقوانين والسلوكيات المحترمه
يبدو ان الحل الوحيد هو ان يحكمنا محتل اجنبى

فكرتني بمرة كنت راجع من كوريا و نزلت في قطر ترانزيت و ركبت طيارة قطر - مصر كانت كلها مصريين
تحس انك راكب ميكروباص