تخيلوا ان حلم عمرى انى اكون راعى غنم
السلام عليكم جميعا
فكرت كتير قبل ماكتب الموضوع ده بصراحه لانى كل لما احكيه لحد بيضحك عليا
بفضل الله انا شخص ربنا انعم عليا بزياره معظم دول العالم والتعرف على ثقافات وعادات شعوب كتير وقابلت مواقف كتير ازعم انها عرفتنى المعنى الحقيقى للحياه وخصوصا فى السنوات الاخيره .
مع كم العمل وضغوط الحياه ومسءوليه الاولاد لم يغب عن بالى حلم اللون الاخضر والحياه البسيطه وراحه البال وسط الغيطان والحيوانات والطيور والصحيان فى الفجر والنوم بعد العشاء والحياه بدون تلفزيون ولا نت ولا موبيل .
ممكن جدا يكون حلم لمجرد افتقادى راحه البال ولكن لن انسى فى حياتى مشهد راعى غنم بالجبال بين سوريا ولبنان قاعد على صخره بيعزف على الناى زى بالظبط التابلوهات اللى بنشوفها على حيطان بيتونا ولكنها كانت حقيقه
دايما الصوره دى فى دماغى ان ارعى غنم واشتغل بايدى واطبخ على الكانون والنار من الحطب
لو حد ليه جذور فى الارياف هيعرف ان احلى ريحه ونسمه تشمها فى حياتك هى ريحه الزرع المختلط بحرق الحطب بريحه الميه بريحه الطين اللى فى الارض.
قلت لواحد صاحبى زمان الحلم ممكن يتحقق بشرط واحد ان مخنا بتفرمت ويبقى زيرو عشان نقبل نعيش بالطريقه دى بدون تكنولوجيا والا الموضوع هيبقى فتره ونزهق ولا ايه؟
بس بجد بجد نفسى اعيش الحياه دى
