الموضوع: توصيل البطارية خطأ، دواسة البنزين فصلت، يبقى ايه المشكلة؟

السلام عليكم،

البطارية نامت (عربية كورولا 2010 أوتوماتيك) وجبت واحد بعربية نص نقل ووصلنا بكابلات واتضح إننا وصلنا غلط الموجب بالسالب والسالب بالموجب (الله يسامحه راجل كبير ومتوقعتش إنه يقع في الخطأ ده) لمدة 3 ثواني البطارية قعدت تطلع شرز جامد رحنا فاصلينها على طول وعكسنا الكابلات ودورت العربية دارت بس المشكلة إنها بعد ما دارت دواسة البنزين كأنك بتدوس على الفاضي مفيش acceleration ولمبة الـ engine check الصفرا منورة، وبقية الوظائف على ما أعتقد سليمة، مفيش برجلة والrpm ثابت والكاسيت شغال وكله تمام ما عدا دواسة البنزين اللي فصلت.

والعربية دايرة كده، كاركت فرامل كذا مرة لاحظت الrpm علي سنة بسيطة، وبرضه دواسة البنزين بتدوس ع الفاضي.

المهم، كلمت كهربائي قال هات لي العربية، هي ممكن تمشي على السلانسيه وهي دايرة كده من غير تزويد، وفعلا العربية مشيت ورحناله، قعد يشيك على علب الفيوزات ويعمل تيست بالمفك في حتت كتير، وفي الآخر قال إن البوابة فيها مشكلة وابتدى يتصل بالتليفون بواحد تاني قال له فيه (آي سي) في اللوحة ضرب، طبعًا حسيت إنه مش فاهم، رحت جايب ونش وشايل العربية وموديها توكيل أبو رواش.

المهندس قال لي احتمالين، واحد حلو وهو فيوزات ضربت، والتاني لا قدر الله كونترولر باظ وده هيبقى بألفات، وأنا دلوقتي سايب العربية هناك وقاعد مستني تليفون المهندس عشان أعرف حجم الضرر.

ايه رأيكوا دواسة البنزين لما تدوس ع الفاضي ولمبة فحص المحرك الصفرا تنور، وبقية الوظائف سليمة، والـ rpm ثابت، والعربية بتمشي على السلانسيه عادي، يبقى ايه اللي حصل؟