الموضوع: مطلوب مساعده , الماكينه شكلها جابت صبابات بسبب الميكانيكي

امبارح كنت مسافر من اسماعيليه للقاهره وعند العاشر من رمضان العربيه حسيت سحبها بيقل وبدأت اشم ريحة شياط , شكيت انه يكون بسبب عربيه نقل كان ماشيه قصادي وبعدين لاحظت بوادر شياط داخل من فتحات التكييف , ركنت وفتحت الكبوت لقيت فيه دخان ابيض طالع من عند البوجيهات كده , استنيت شويه لما العربيه بردت وفتحت القربه علشان ازود مياه ملقتش فيها ولا نقطه رغم ان المؤشر مرفعش خالص وانا مزود مياه قبل ما اتحرك , دورت وزودت مياه ولقيت المياه كلها بتنزل في الارض في لحظتها.

قطرت العربيه علي اقرب ميكانيكي علشان خفت لا تجيب وش سلندر , الميكانيكي بص عالعربيه وقاللي دي طرمبة المياه , رحت اشتريت طرمبه وهو فك غيرها وفعلا كانت مصديه ومتاكله خالص , بعد ما ركبها قاللي زود مياه وفعلا منزلتش مياه زي الاول , قلنا زي الفل كده , وابتدأ يقفل شغله بتركيب الكاتيه وسير الدينامو و التكييف وغيرنا زيت الباور كمان , لغاية هنا الدنيا كويسه وانا قلت كويس جت علي 100 جنيه طرمبه و 100 ليه وخلاص.

المهم الميكانيكي قفل شغله وقاللي دور , مدارتش العربيه , قاللي استني وعدل حاجه ناحية الكاتينه وقاللي دور فدارت , قاللي اطفي ودور فدارت , قاللي تمام كده , المهم قفل كله وقاللي يلا دور وروح غير زيت في اقرب وقت يعني علشان السخونيه بتأثر علي اللزوجه , جيت ادور العربيه مبتدورش ابدا.

قاللي حاسب كده اجرب , قعد يطول في المارش وانا اقوله هيتحرق يقوللي متقلقش , والعربيه ابتدت تضرب مدافع من الحوض مش من الشكمان , قلتله ايه ده قاللي الصبابات قافشه , قلتله من ايه يقوللي السخونيه , قلتله مال السخونيه بان الصبابات تبوظ , السخونيه يا تجيب جيوان يا وش سلندر وفي الحالتين العربيه تدور , قاللي لأ عادي , تجيب صبابات برضه , مقتنعتش بس بما اني مش خبير قلتله طيب وايه العمل , قاللي نجيب عربيه تقطرنا ونرمي فهتدور غصب عنها والصبابات هتشتغل , قلتله ماشي.

فعلا جبنا عربيه وقطرناها ورمي فالعربيه دارت بس كان صوتها عالي اوي وسحبها مفيش خالص , قلتله ليه الصوت ده وفين السحب , قاللي علشان مش مركب عمة الهواء وهي كده العربيه جابت صبابات من السخونيه , معجبنيش الكلام فكلمت الميكانيكي بتاعي قاللي 90% هو قسم الكاتينه غلط فجابت صبابات والسخونيه ملهاش دعوه بالصبابات.

في الاخر بعد يوم بهدله ومصاريف اد كده في الارض جبت العربيه علي ونش ورمتها تحت البيت من القرف حتي مودتهاش للميكانيكي بتاعي علشان يبص عليها مع العلم انه قاللي انه مبيشتغلش في فتح المواتير بس هو كان رشحلي ميكانيكي تاني.

المهم أنا عايز أعرف تشخيصكم للي حصل و ترشيح لميكانيكي شاطر في شغل المواتير.

العربيه لانوس.

امبارح صلحت العربيه عند الاسطي رفعت عياد , ورشة الاخلاص في شبرا مصر.

العربيه كانت جايبه 8 صبابات و شاكوشين و بلفين وكانت مأثره علي فتحة صباب في وش السلندر حاجات بسيطه

قطع الغيار من المتحده في شارع الترعه البولاقيه عند شوكلاني والاستيراد من عند هاني في شوكلاني :

جبت طقم صبابات GM ب 180 (شكله مش أصلي بس كواليتي كويسه) + كاوتش صباب أصلي ب 35 + جيوان وش سلندر كوري 20 + بلفين استيراد ب 60 + شاكوشين استيراد ب 50 + بوجيهات NGK ب 40 + انبوبة سيلكون 10 جنيه + فلتر زيت 20 جنيه + جركن زيت (حسب النوع اللي بتحطه).

الوش اتعمله روديه عند الورشه برضه واتظبطت فتحة الصباب اللي كان متأثر عليها.

جبنا كمان فلتر بنزين 25 جنيه و اسبراي انجكشن 30 جنيه بالمره علشان نفوق العربيه.

المصنعيه 225 و اكراميات 30 جنيه.

المارش برضه لقيناه بيودع بعد الميكانيكي البهيمه بتاع العاشر ما جاب اجله وهعمله بكره بأه ولا حاجه.

الورشه شغلها نظيف وناس امينه وبيفهموا وفيه صنايعي كويس هناك اسمه محمود هو اللي عمل الشغلانه كلها.

العربيه جربناها والموتور اداءه مرضي جدا بالنسبه لي , بس لسه هقيم استهلاك البنزين واداء الموتور في مشوار كبير.

مستني ابقي رايح اسماعيليه في مره وهعدي عالزبون اطلع فيه الكبت اللي جوايا.