يا اهالي اسبرانزا الكرام، قد جائكم فارس ووحش

يا اهالي اسبرانزا الكرام، قد جائكم فارس ووحش... دا مش مدح ولا غرور لا سمح الله... اصل ملاك الشيفروليه في المنتدى لقبهم الفرسان وملاك الرينو لقبهم الوحوش.. وانا منضم للمجموعتين.. او كنت

المهم. انا بعت ميجو (الميجان) واشتريت تيجو (الشكل الجديد)... بدون اي اندهاش.. انا عارف الفرق بين العربيتين، لكن مع الاسعار الخزعبلية للعربيات اليومين دول كان الحل الوحيد اني اركب حاجة ماركبتهاش قبل كدا، ألا وهي الجيب ستايل او العربيات العالية.. شيء ظريف انك تشوف ركب (جمع ركبة) الناس السايقة السيدان وانت سايق :) نياهاااااي (ضحكات شريرة متقطعة)

ماعنديش ملاحظات دقيقة حتى الآن عن العربية.. سوقت العربية بدون نمر من الاسكندرية للقاهرة علشان اللون الكحلي مش موجود غير هناك.... واتثبتنا في كل كمين شوية... احكي لكم مغامراتي في الطريق مع اللجان. مع كل كمين باعمل عبيط وساذج وما عنديش فكرة عن قوانين المرور.. وارسم البلاهة على وشي... واتخض لما يقول لي لازم نمر تجارية.. وبتعدي...بس بالعافية

سأوافيكم بالتقارير عن قريب.. بس واضح جدا إن ابو الفتوح على قلبهم مراوح في موضوع جواب المرور دا.. لحد دلوقت ما اخدتش جواب المرور.. والاشاعات بتقول ان ابو الفتوح ممكن يوصل لشهر في الحاجات دي.. حد يطمني الله يبارك لكم :)

ألف مبروووووووووووك ..وربنا يبارك لك فيها و يكفيك شرها
ومستنيين تقرير حلو منك قريبا بعد التجربه ...

إن شاء الله يا طارق باشا.. اركب بس نمر الاول علشان اعرف امشي براحتي واجرب وكدا :)

ربنا يباركلك فيها ويكفيك شرها
طيب فارس وعرفناها
اما وحش جت منين
ههههههههههههههههه

الله يبارك يا عمرو باشا.. وحش دي جت من الرينو.. ملاك الرينو في المنتدى اسمهم الوحوش :)

10000 مبروك
التيجو الجديده رائعه مفيش كلام
ربنا يبارك لك فيها ويكفيك شرها
بصراحه غريبه ان واحد راكب ميجان ويركب صيني
اصل انا مرارتي مفقوعه من ناس في المنتدي
كل مايكون في مقارنه بين عربيتن
يقولك اصلها اوربي
يعني ايه بصراحه مش مقتنع

انا اقارن عربيه بعربيه
مش اقارن بلد الصنع

نرجع للتيجو
العربيه العاليه ميزه
وكمان لو تركب عتب وديفيندر امامي وخلفي
ها ترتاح اكتر وتمشي بقوه وبدون خوف
10000 مبروك ونورت القسم
في انتظار الصور

1000000000 مبروووووووووووووك وربنا يحفظهالك وفي انتظار التقارير عنها اصل للاسف المنتدي هنا مفيهوش اي تقرير عن النيو تيجو

الله يبارك لك يا هوجان باشا.. انا اصلي ما عنديش حركات في موضوع العربيات وبقييم العربيات تقييم موضوعي (ما لها وما عليها).. وبعدين على قد لحافك برضة :) طبعا الميجان حكاية... وطبعا الزيرو زيرو حتى ولو صيني
في نقطة كمان.. اغلب المنتدى شباب، لكن العواجيز امثالي يفتكرو كويس جدا في الثمانينات لما كان حد يجي يشتري ياباني ينصحوه ويقولوا له بلاش الياباني علشان خفيف وما يتسحملش شوارعنا..اشتري لادا او ريجاتا وسيبك من الياباني.. وبعد فترة الياباني وصل السما!!!!
ثم جاء الكوري.. حد فاكر بوني Pony؟ ونفس الكلام.. نصايح ما تجبيش كوري.. بلاش كوري.. كل إلا الفتيس الاتوماتيك بتاع الكوري.... وهوووووووووووووووب الكوري وصل السما..
الصيني دلوقت في نفس مراحل الياباني والكوري في مصر.. اضف إلى ذلك بداية ثورة الجودة في الصين اليومين دول.. يعني التيجو دخلت اوروبا (ايطاليا) وجيلي دخلت عربية امريكا..

مشكلتي في موضوع الدفيندرات دا... سمعت ان تيجو بتترخص جيب مقفول مش ليموزين.. وجيب مقفول دا يخليك تحط الدفندرات بشكل قانوني.. ولا دي فتية؟؟؟؟؟

الله يبارك لك يا ميدو باشا.. وإن شاء الله التقرير عن قريب.. دعواتكم

الجوده
ربنا يبارك لك في عربيتك التيجو
نازله بجوده عاليه بخلاف الموديل السابق اللي معايا
معني كده ان في تطوير
الناس دي شغاله بجد مش نايمين في العسل زي حالاتنا

اقتباس:

---

المشاركة الأصلية كتبت بواسطة ecybrarian

الله يبارك لك يا هوجان باشا.. انا اصلي ما عنديش حركات في موضوع العربيات وبقييم العربيات تقييم موضوعي (ما لها وما عليها).. وبعدين على قد لحافك برضة :) طبعا الميجان حكاية... وطبعا الزيرو زيرو حتى ولو صيني
في نقطة كمان.. اغلب المنتدى شباب، لكن العواجيز امثالي يفتكرو كويس جدا في الثمانينات لما كان حد يجي يشتري ياباني ينصحوه ويقولوا له بلاش الياباني علشان خفيف وما يتسحملش شوارعنا..اشتري لادا او ريجاتا وسيبك من الياباني.. وبعد فترة الياباني وصل السما!!!!
ثم جاء الكوري.. حد فاكر بوني pony؟ ونفس الكلام.. نصايح ما تجبيش كوري.. بلاش كوري.. كل إلا الفتيس الاتوماتيك بتاع الكوري.... وهوووووووووووووووب الكوري وصل السما..
الصيني دلوقت في نفس مراحل الياباني والكوري في مصر.. اضف إلى ذلك بداية ثورة الجودة في الصين اليومين دول.. يعني التيجو دخلت اوروبا (ايطاليا) وجيلي دخلت عربية امريكا..

مشكلتي في موضوع الدفيندرات دا... سمعت ان تيجو بتترخص جيب مقفول مش ليموزين.. وجيب مقفول دا يخليك تحط الدفندرات بشكل قانوني.. ولا دي فتية؟؟؟؟؟

---

صديقي المواطن
ألف مبروك إنضمامك لقسمنا فأنت زميلي في عربيتي رقم 3 وعربيتي رقم 4 إسبرانزات بس بعت رقم 4 وفاضل معايه وحده مرفوعة من الزيرو كل إسبرانزا عدا ال 516 عربيات ممتازة أما موضوع.الدفندرات فدي فتوى ما أنزل الله بها من سلطان والديفندر بيترخص بواسطة بس النس بتركب لقلة المحاسبة.لكن لما ظابط نسي باباه يربيه صح حيخش في عينك ويقلك ممنوع بس فيه بديل فيه دفندرات شكلها بلاستك إسود جميلة ومحملة دي ممكن تركبها وشيك ومرة أخرى مبروك لعربيتك ودمتم للنضال

طالما الديفيندر بترخص بواسطه
طالما اترخص يعني قانوني
ايه المانع ان المواطن اللي ماعندوش واسطه يركب ديفيندر زي المواطن اللي عنده واسطه
الاصل في الاشياء الاباحه
والا مايبقاش في عدل
وبعدين الديفيندر مش علشان ندوس بيه علي خلق الله
لحمايه العربيه من غباء واستهتار الاخرين
موقف علي الهامش
اول امس في عباس العقاد عربيه نيو تيجو صاحبها راكنها في امان الله

امامها عربيه شيفروليه دبابه
صادف اني كنت واقف وقلت اتفرج علي التيجو
سواق الشفر نزل من العماره ومعاه 2 ستات يعني
ركبو في الكابينه والسواق مش علي بعضه
وهوب راح راجع مارشدير وبعنف
طبعا شوهه التيجو
قولت له مش تحاسب ياسطي
فالي معلش ماخدتش بالي
طبعا هاتكون صدمه لصاحب العربيه لما يرجع ويلاقي عربيته اكصدامها اتجرح وخرج بكلبساته
والكبوت اتطبق فيه حته

هنا فايده الديفيندر

دمت للنضال استاذ صدام

اقتباس:

---

المشاركة الأصلية كتبت بواسطة ecybrarian

الله يبارك لك يا ميدو باشا.. وإن شاء الله التقرير عن قريب.. دعواتكم

---

ربنا يباركلك فيها ومتقولش علي نفسك كبرت يا باشا انت لسة شباب وزي الفل اهو ما شاء الله ربنا يديك الصحة ويباركلك في العربية

اقتباس:

---

المشاركة الأصلية كتبت بواسطة hugan

طالما الديفيندر بترخص بواسطه
طالما اترخص يعني قانوني
ايه المانع ان المواطن اللي ماعندوش واسطه يركب ديفيندر زي المواطن اللي عنده واسطه
الاصل في الاشياء الاباحه
والا مايبقاش في عدل
وبعدين الديفيندر مش علشان ندوس بيه علي خلق الله
لحمايه العربيه من غباء واستهتار الاخرين
موقف علي الهامش
اول امس في عباس العقاد عربيه نيو تيجو صاحبها راكنها في امان الله

امامها عربيه شيفروليه دبابه
صادف اني كنت واقف وقلت اتفرج علي التيجو
سواق الشفر نزل من العماره ومعاه 2 ستات يعني
ركبو في الكابينه والسواق مش علي بعضه
وهوب راح راجع مارشدير وبعنف
طبعا شوهه التيجو
قولت له مش تحاسب ياسطي
فالي معلش ماخدتش بالي
طبعا هاتكون صدمه لصاحب العربيه لما يرجع ويلاقي عربيته اكصدامها اتجرح وخرج بكلبساته
والكبوت اتطبق فيه حته

هنا فايده الديفيندر

دمت للنضال استاذ صدام

---

انا اتفق معا حضرتك تماما في كل نقطة لاكن بعيدا عن الموضوع انا متابع الاستاذ صدام بقالي فترة وفي كل مشاركة لازم دمتم للنضال و حياة النبي يا جدعان تفهموني حكاية الجملة دي اية انا حاسس انة سيم بينكم :satelite:

يا باشا ألف مليون مبروك على الوحش و ربنا يديك خيرها و يكفيك شرها ...

الف مليون مبروك وربنا يديك خيرها ويكفيك شرها وشر عيون الناس

اقتباس:

---

المشاركة الأصلية كتبت بواسطة m i d o

انا اتفق معا حضرتك تماما في كل نقطة لاكن بعيدا عن الموضوع انا متابع الاستاذ صدام بقالي فترة وفي كل مشاركة لازم دمتم للنضال و حياة النبي يا جدعان تفهموني حكاية الجملة دي اية انا حاسس انة سيم بينكم :satelite:

---

لا وبيكتب كمان صديقي المواطن برضه دايما ف الأول .

الف مبروك السياره الجديده ......... وربنا يديك خيرها ويكفيك شرها . ونورت القسم ومرحبا بك .

الف مبروك يارب تكون مبسوط من العربيه وفى انتظار التقرير والصور

اقتباس:

---

المشاركة الأصلية كتبت بواسطة bassemali

لا وبيكتب كمان صديقي المواطن برضه دايما ف الأول .

---

اة منا واخد بالي بس قلت اخليها للسؤال التاني عشان ميتقالش علينا فضوليين :wink14::wink14:

الله يبارك فيكم جميعا.. ومعلش استحملوني شوية اصل الجديد اعمى ولو كان بصير

اقتباس:

---

المشاركة الأصلية كتبت بواسطة m i d o

انا اتفق معا حضرتك تماما في كل نقطة لاكن بعيدا عن الموضوع انا متابع الاستاذ صدام بقالي فترة وفي كل مشاركة لازم دمتم للنضال و حياة النبي يا جدعان تفهموني حكاية الجملة دي اية انا حاسس انة سيم بينكم :satelite:

---

هههههههه
الاستاذ صدام ليه اسلوب مميز في الكتابه
بيبتدي بصديقي المواطن
وينتهي
دومتم للنضال
قولت ارد عليه بطريقته
دومتم للنضال

يمكن قصده نضال العربيات ومشاكلها

اقتباس:

---

المشاركة الأصلية كتبت بواسطة hugan

هههههههه
الاستاذ صدام ليه اسلوب مميز في الكتابه
بيبتدي بصديقي المواطن
وينتهي
دومتم للنضال
قولت ارد عليه بطريقته
دومتم للنضال

يمكن قصده نضال العربيات ومشاكلها

---

يعني برضو حضرتك طلعت زي حالاتنا .. طيب خلاص بقي في انتظار صاحب الشأن يرد

الف الف مبرووك على العربيه
بصراحه قرار ثقتك فى العربيات الصينى قرار شجاع احيك عليه
على رأي حضرتك انا فاكر سنه 94 ايام الأكسيل كانت الناس بتقول عربيات ورق و كورى ايه دى شركات بتعمل تلفيزيونات مش عربيات
بعد كدا لما شفتها بتسحمل الشقى و الدعمكه و شقاوه شباب الكليه عرفت قد ايه احنا بنفتى فى اى كلام بدون تجربه
و جاليا السيارات الكورى من اعلى مبيعات السيارات فى العالم

الف مبروك و يديك خيرها ان شاء الله

اولا الف مبروك
ثانيا اي عربية هتتعامل باحترام و احتراف هتعيش حتي لو معمولة علي باب بيتنا و اللي ليه اصل في فلاحين هيلاقيهم بيمشو شئ عجيب كده علي انه جرار و اساسا ده مكنة ميه و ماشية معاهم و بسطاهم ولا المرشيديس علي رأي اسطواطنا القدام
ثالثا العربية اداه .... ليس لها عرق و لا دين و دفاعنا او هجومنا علي اي اده لما بيكون بسبب اي حاجة من دول ده عن عبط مننا احنا مش من الحاجة او اللي عملها .... هوا عمل و باع و كسب واحنا قاعدين "زي اعلان الشيفورليه كده :)"
رابعا ... عجبني موت طريقة سردك للموضوع ... من الاخر كده حبيتك لله في لله


خامسا بقي و دي اهم حاجة متريحوا بالنا و تفهمونا حوار النضال ده

هو محدش ناوي يبل ريقنا و يفهمنا حوار المواطن و النضال و لا إيه .؟؟؟

اقتباس:

---

المشاركة الأصلية كتبت بواسطة Haitham Basha

هو محدش ناوي يبل ريقنا و يفهمنا حوار المواطن و النضال و لا إيه .؟؟؟

---

دة طلع مطلب جماهيري بقي وانا ماعرفش وفاكر نفسي الوحيد المندهش من الحوار دة هههههههههههههه
:satelite:

انا كنت راكب لانوس ثم فرنا ثم حبيت اجرب العربيات العالية
فاشتريت اسبرنزا a113 :wink14:

السلام عليكم مالكى اسبرانزا a516 ممكن تساعدونى انا محتار بين اسبرانزا a516 وبين دايو لانوس ولسه بايع عرابيتى ( سيينا 1400 موديل 2002) وانا محتار بين الاثنين من حيث اسعار قطع الغيار وتوافرها مع العلم انى حابب شكل الاسبرانزا بس ماعنديش معلومات عنها لذا ارجو المساعدة فى مميزاتها وعيوبها واسعار قطع الغيار وتوافرها ولما اقبل على الشراء اخد بالى من ايه لتكون العربية سليمة وحالتها كويسة ومعدل استهلاك البنزين

اقتباس:

---

المشاركة الأصلية كتبت بواسطة عماد

السلام عليكم مالكى اسبرانزا a516 ممكن تساعدونى انا محتار بين اسبرانزا a516 وبين دايو لانوس ولسه بايع عرابيتى ( سيينا 1400 موديل 2002) وانا محتار بين الاثنين من حيث اسعار قطع الغيار وتوافرها مع العلم انى حابب شكل الاسبرانزا بس ماعنديش معلومات عنها لذا ارجو المساعدة فى مميزاتها وعيوبها واسعار قطع الغيار وتوافرها ولما اقبل على الشراء اخد بالى من ايه لتكون العربية سليمة وحالتها كويسة ومعدل استهلاك البنزين

---

العربية جميلة قطع غيار رخيصة استهلاك بنزين تقريبا 7 لتر *100 كيلو بدون تكييف توصل ل 8 بالتكييف متوفر قطع غيارها في اماكن كتيييييييير عربية في المجمل جميلة وعيبها ان العفشة بتعوز تتربط كتير وبس و السحب علي السرعات الاولي متوسط يعني تجيب من 0 ل 100 كيلو في 18 ثانية تقريبا لاكن بعد متعدي بيها سرعة 80 هتلاقي وحش معاك علي الطريق

اقتباس:

---

المشاركة الأصلية كتبت بواسطة m i d o

العربية جميلة قطع غيار رخيصة استهلاك بنزين تقريبا 7 لتر *100 كيلو بدون تكييف توصل ل 8 بالتكييف متوفر قطع غيارها في اماكن كتيييييييير عربية في المجمل جميلة وعيبها ان العفشة بتعوز تتربط كتير وبس و السحب علي السرعات الاولي متوسط يعني تجيب من 0 ل 100 كيلو في 18 ثانية تقريبا لاكن بعد متعدي بيها سرعة 80 هتلاقي وحش معاك علي الطريق

---

مافيش كلام تاني يتقال .. لكن أحب أضيف إن العربيه أعطالها ولله الحمد قليله وتكييفها ممتاز وأكبر صالون في فئتها بدون منافس وأكتر كماليات كمان في فئتها برضه بدون منافس .

انته شارى العربيه علشان تتفرج على الركب
ربنا يسهلك يا حج
ههههههههههههه
ومبروك عليك العربيه والركب

اقتباس:

---

المشاركة الأصلية كتبت بواسطة m i d o

العربية جميلة قطع غيار رخيصة استهلاك بنزين تقريبا 7 لتر *100 كيلو بدون تكييف توصل ل 8 بالتكييف متوفر قطع غيارها في اماكن كتيييييييير عربية في المجمل جميلة وعيبها ان العفشة بتعوز تتربط كتير وبس و السحب علي السرعات الاولي متوسط يعني تجيب من 0 ل 100 كيلو في 18 ثانية تقريبا لاكن بعد متعدي بيها سرعة 80 هتلاقي وحش معاك علي الطريق

---

الف شكر ياباشا على الرد والمعلومات وانا حاببها اكتر من اللانوس وعلشان كده بجمع معلومات

اقتباس:

---

المشاركة الأصلية كتبت بواسطة عماد

الف شكر ياباشا على الرد والمعلومات وانا حاببها اكتر من اللانوس وعلشان كده بجمع معلومات

---

الشكر لله وحدة يا غالي

اقتباس:

---

المشاركة الأصلية كتبت بواسطة bassemali

مافيش كلام تاني يتقال .. لكن أحب أضيف إن العربيه أعطالها ولله الحمد قليله وتكييفها ممتاز وأكبر صالون في فئتها بدون منافس وأكتر كماليات كمان في فئتها برضه بدون منافس .

---

الف شكر ياباشا على الرد والمعلومات

اقتباس:

---

المشاركة الأصلية كتبت بواسطة lanos2004

انته شارى العربيه علشان تتفرج على الركب
ربنا يسهلك يا حج
ههههههههههههه
ومبروك عليك العربيه والركب

---

هي عاليه بس ما بتجبش الركب قوي

اقتباس:

---

المشاركة الأصلية كتبت بواسطة hugan

هي عاليه بس ما بتجبش الركب قوي

---

ركب اية بالظبط انا كدة هبدء افهم غلط :wink14::wink14:

اقتباس:

---

المشاركة الأصلية كتبت بواسطة m i d o

ركب اية بالظبط انا كدة هبدء افهم غلط :wink14::wink14:

---

ههههه
ماتاخدش بالك ياميدو
ركب العربيه مش كل عربيه ليها ركب اماميه

اقتباس:

---

المشاركة الأصلية كتبت بواسطة hugan

ههههه
ماتاخدش بالك ياميدو
ركب العربيه مش كل عربيه ليها ركب اماميه

---

لا الراجل بيقول في بداية الموضوع احسن حاجة تكون سايق وشايف ركب الناس قدامك الي في العربيات التانية وبعد ردك دة انا كدة خلاص فهمت صح رسمي :colsmil::colsmil:

اقتباس:

---

المشاركة الأصلية كتبت بواسطة hugan

ههههه
ماتاخدش بالك ياميدو
ركب العربيه مش كل عربيه ليها ركب اماميه

---

الحقني يا كبير .. النهاردة كنت راكب عربية زميلي في الكلية جيب رانجلر واحنا ماشيين الطريق كان واقف عند المحور وكان جمبي عربية بروتون ويرا وساعتها لما ببص جمبي افتكرتكم والله وعرفت يعني اية ركب عن تجربة مش تخمين :colsmil::colsmil: