اطول مسافة سوقتها كانت كام كيلو ؟
مرة كنا قاعدين علي البحر ومعايا اصحابي والجو حلو والدنيا ليل والنجوم منورة في السماء والهدوء بيصفر ودانا فواحد سأل ايه اطول مسافة سوقتوها قبل كدة
فلقينا اللي بيقولك انا رحت شرم الشيخ متواصل يعني بتاع 500 كيلو واللي راح سانت كاترين حوالي 450 كيلو واللي راح الغردقة حوالي 500 كيلو واللي راح سيوة حوالي 600 كيلو واطول مسافة كان اللي راح مرسي علم حوالي 800 كيلو وطبعا دول اللي كانوا جوه مصر
جينا للي برة مصر كان في اتنان اصحاب في السعودية واحد كان عامل 1200 كيلو وواحد كان عامل 1350 كيلو وواحد كان في قطر كان عامل بتاع 80 كيلو وواحد كان في الامارات عامل 500 كيلو
وكنت انا عامل حوالي 1500 كيلو كان قبل الاجتماع السنوي والكبار كانوا بيحضروا الاجتماع وكان اول اجتماع ليا مع الكبار وكان لازم نعمل التقارير الدقيقة فخدت لفة لوحدي في يوم واحد طلعت من 9 الصبح وراجع البيت 2 بالليل طبعا المشاوير كان يتخللها غداء وعشاء وشوية مقابلات والسرعات تتراوح من 120 الي 200 كم/ س
لحد ما جيت مصر واكتشفت اني عاجز اني اعمل مشوار من القاهرة لاكتوبر
المشوار يا جماعة بيخشلوا رايح جاي في 3 ساعات سواقة يصاحبها ارتفاع ضغط الدم مع الترزيع باليد علي الدركسيون مع انخفاض وارتفاع الحواجب وفي الاخر تلاقي الفانوس علي الاسفلت
ربنا يهدي الناس ويرشدنا الي الصواب