الموضوع: متعة السفر في الليل

قد يختلف الكثير في افضل مواعيد للسفر فالكثير منا يفضل السفر في ضوء الشمس لما فيه من رؤية افضل - راحة نفسية - امان علي الطريق – سهولة استخدام الريست والحمامات وخاصة من معه اسرة واطفال وكبار في السن ومرضي ( اصحاب امراض القلب والشرايين لا يستطيعوا الجلوس في السيارة لفترة طويلة ) لكن هناك القليل من يفضل السفر في الليل وانا منهم لما فيه من مغامرة واثارة علي الطريق
وتوجد احتياطات الواجب توافرها في من يفضلون السفر في الليل :
1 ضرورة التاكد من ضغط الهواء وكفاءة الاربعة كاوتشات والاستبن
2 وجود كوريك تمساح بدل الكوريك اللي عامل زي عصاية المقشة
3 ضرورة التاكد من عمل كافة فوانيس العربية من امامية وخلفية واشارات وانتظار وعالي وواطي وترعيش لانهم اساس الرحلة كلها
4 ضرورة وجود كشاف نور وزجاجة مياة ومثلث عاكس بالحامل بتاعة او فيست ( السديري الفسفوري )
5 اوعي تفول العربية بنزين 95 قبل السفر بيوم ( وهقولكوا السبب كمان شوية )
وتشحن موبايلك بطارية ورصيد
وبكده تبقي انت جاهز للسفر
غالبا بنجمع علي الساعة 12 بالليل ونطلع علي سوبر ماركت مترو نجيب بيبسي وعصير وشيبسي وكاجو ومياة وبرينجلز ( طبعا بيتجاب في المناسبات وكلنا عارفين ليه ) وكان في لبان كان بجنيه تقريبا وكنت باستغليه اسمه تراي دنت تقريبا دلوقتي بقي 2.5 جنية وبعدين نعدي علي مقلة نجيب لب وسوداني ونطلع علي بنزينة وطنية مش عارف ليه بس بنرتحلها نفسيا او بنستنضفها مش عارف وبعدين نفول 95 عشان السحب والجري ويجي الحساب تلاقي فجاة صاحب العربية اتحول ووشة ضلم ويقولك ابرز ياد الفلوس انت وهو وطبعا هو مابيدفعش ( عرفتوا ليه منحطش بنزين قبلها بيوم ) وغالبا بنطلع علي الصحراوي علي الساعة 1.30 او 2 بالليل ونخدها متواصل ومابنقفش غير علي صلاة الفجر وبعدين نكمل بدون توقف
المتعة في السفر بالليل :
1 الشوارع فاضية فبتبقي سهلة اننا نجمع بعربيتنا ونعدي علي بعض
2 الصحراوي فاضي خالص ولا في رادار ولا ميكروباسات ولا اي حاجة
3 متشغلش التكيف وافتح الزجاج وبيبقي الهواء منعش وخلي الهواء يلبس في وشك هيعمل احلي شغل
4 بنحاول نقفل عدادات العربية
5 بنتفرج علي النجوم في السماء بالليل
6 بنوصل علي الصبح فلو نازلين في فندق بنخش نكبس علي الفطار علي طول
نصيحة السفر بالليل بيكون مجموعة شباب ولا يوجد اطفال او اسرة
كنا بنسافر بالليل من حوالي 5 او 6 سنين ايام الامن والامان وكل سفريه بنبدل في عربيتنا
طبعا كنا بنتوه ونقعد نلف وندور ومعانا خريطة ورقية ( اطلس بتاع المدرسة ) وجي بي اس
ومبنحاولش نجازف بالبنزين اول ما تنزل للنصف نخش نفول بس 90
دا احنا عشان نروح سانت كاترين لفينا سيناء كلها بس طرق ايه روعة الطريق جوة الجبل وبيلف بمنحنيات خطيرة يمين وشمال تحس ان احنا بنعمل دريفتات بس طبعا ماشيين علي مهلنا ومناظر تصوير روعة جوة الجبل وتلاقي الوان في نفس الجبل من اخضر غامق لبني غامق وفاتح
مره تهنا ودخلنا في طريق كله محاجر وطريق طويل جدا ومافيش اي عربية ملاكي ولا ميكروباس كله عربيات نقل ومحاجر وبودره بيضاء تلاقيها حول الطريق للاسف انا مش فاكر اسم الطريق بس كنت بتخيل ان احنا ماشين عليه دلوقتي كان زامنهم ربطونا في الكسارة وكلو البرينجليز وقذقذوا اللب ( ومش بعيد كانوا خلونا نقذقذ القشر وهما يكلوا اللب علي طول ) وخدوا الرصيد اللي لسه مشحون بس عمر الافكار ده ما كانت تخطر علي بالنا ولا الحمد لله عمرنا ما حصلتلنا حاجة
في كاترين كنا بنسيب عربيتنا عند الكمين اللي قبل الدير ونطلع الجبل وننزل نخش الدير ونركب الجمل ونتصور يعني كنا تقريبا بنقعد بتاع 12 ساعة سايبين العربية لوحدها تحت
في سيوة كنا بنركن العربية عند بتاع السفاري ونركب ورا في الدوبل كابينة
وطبعا كان في كمائن تتعجب مننا ويشك فينا وخاصة طريق سانت كاترين وراس شيطان فكنا عادي بنحترم استغرابه وشكه فينا لان كنا احنا الوحيدين اللي ماشيين بعربيتنا والباقي اتوبيسات وباسات فكان يحب يفتش العربية فكنا عادي بننزل كلنا ونسيبه يفتش براحته لان احنا مقدرين وظيفته وبنعزم عليه باي عصير معانا فكان الضباط بيرفضوا والامناء بياخدوا
ومرة في كمين سيدنا يوسف الظابط كان محترم جدا وادانا نمرته عشان لو تهنا او حصلت اي حاجة
ومرة امين قعد يبص في البطايق بتاعتنا كلنا وكان مستغرب او اول مرة يتعرض لموقف زي ده المهم قالنا اركنوا وانزلوا للظابط ونزلنا للظابط في مكتبه الصراحة شكل المكتب خالانا يصعب علينا حالهم المهم انتوا رايحين فين وجايين منين ومعاكوا ايه وهتقعدوا كام يوم وهكذا وبعد ما اطمئن قالنا بالتوفيق واتصحابنا عليه المهم قالينا متخلوا حد منكوا يجي يقعد مكاني والبسة لبسي واطلع اتفسح معاكوا طبعا قولنالوا تنورنا فتخيلت اني مكانه لا تلفزيون ولا عربيات ومش كل شبكات الموبايل شغالة ولا نت ولا مطعم ولا الدموع حتي ربنا معاهم
واحد صاحبي كان كييف يروح مرسي علم بالعربية فبيقولي ان في لغة بين سواقين النقل وبعضهم من زمارة ولاشارة وتلاقيهم يريحوا عند نفس الريست ويمشوا ورا بعض وقعد يشرح شوية حاجات بس مركزتش معاه
الحمد لله تمت معظم السفريات بالليل الي شرم الشيخ – بورت غالي – سانت كاترين - رأس شيطان - الغردقة – الجونة - مرسي مطروح – واحة سيوة – الزعفرانة – دهب
كنت من كام يوم بقول لصحابي عايزين نطلع الطلعات ده تاني قالوي ماشي المصاريف علينا بس هنطلع بعربيتك هههههههه صايعين صايعين يعني
فاكرين يا رجالة حفلة بيونسيه لما كانت في بورت غالب ولا حفلة تاتو لما كانت في شرم ولا شاكيرا لما كانت في الاهرامات
فين ايام السياحة والسياح الروس والالمان والانجليز كانت الرحلات ليها طعم في وجودهم كنا الصراحة بنتعلم منهم النظافة والنظام والاحترام كفايه ضحكه وشهم والبشاشة اللي فيها تنسيك نفسك
ربنا يحمي مصر ويرزقها الامن والامان والاستقرار

الله يرحمك يا حبيب يا عادلي

السفر بالليل جو تاني
بس فظل القلق بسافر بعد الفجر علطول
وتبقي الرحلة نصها ليل ونصها بداية الشروق