بدور العربيه الصبح مش بتدورر ميته خااالص ؟!!

**0samah** · 24-09-2013 11:28 AM

ربنا يبارك فيكم والله يا جماعه ده انا كنت متضايق اوي انا بفضل الله العربيه اول مره تعمل معايا حركه كده
والحمد الله فعلا ان الموضوع حصل تحت البيت كنت فعلا هتبهدل بيها .. طيب العربيه هعرف كده افتحها ازاي بالمفتاح عادي ولا حواااار؟
انا جايب زيرو واوتومتك علشان وجع الدماغ وزي ما قلتلكم العربيه جديده ودي بصراحه اول عربيه تكون بتاعتي اركبها ف معرفش الاعطال اوي انا مفتحتش الكبوت 3 مرات مثلا :)
طيب لو البطاريه في الضمان اعمل ايه اخلعها واروح بيها .. ولا اقطرها للتوكيل علشان يغيرها

**amr011111** · 24-09-2013 11:32 AM

المشاركة الأصلية كتبت بواسطة 0samah

ربنا يبارك فيكم والله يا جماعه ده انا كنت متضايق اوي انا بفضل الله العربيه اول مره تعمل معايا حركه كده
والحمد الله فعلا ان الموضوع حصل تحت البيت كنت فعلا هتبهدل بيها .. طيب العربيه هعرف كده افتحها ازاي بالمفتاح عادي ولا حواااار؟
انا جايب زيرو واوتومتك علشان وجع الدماغ وزي ما قلتلكم العربيه جديده ودي بصراحه اول عربيه تكون بتاعتي اركبها ف معرفش الاعطال اوي انا مفتحتش الكبوت 3 مرات مثلا :)
طيب لو البطاريه في الضمان اعمل ايه اخلعها واروح بيها .. ولا اقطرها للتوكيل علشان يغيرها

لا تقلق خالص ان شاء الله الموضوع بسيط
انت هتشوف حد بيبع بطاريات عندك فى المنطقه وتروح عند عربيتك توصلها ببطاريه تانيه من عربيه تانيه هتدور معاك العربيه ان شاء الله وساعتها هتروح بيها للكهربائى او بتاع البطاريات يقيسلك شحن البطاريه وهيقولك حاجه من اتنين يا اما انت كنت ناسى حاجه شغاله فالبطاريه محتاجه شحن على التونجر وفى الحاله ديه هيفك البطاريه ويحطها على التونجر عنده لمده ساعتين ويركبها تانى فى عربيتك
او يقولك ان البطاريه جابت اخرها ويركبلك واحده جديده
انت اللى هتعمله بس انك هتروح بالعربيه لبتاع البطاريات
وبالتوفيق

**lidosasa** · 24-09-2013 11:44 AM

يا باشا دى حاجة بسيطة وبسم الله ما شاء الله العربية أصيلة والبطارية متعتبرش عطل فى العربية . وموضع إنك تقطر العربية لحد التوكيل ده حرام وحتبهدل العربية وتتكلف فلوس كتير يمكن أكتر من تمن البطارية نفسها . أحسن حل لو تقدر إنت بنفسك تفك البطارية وتاخدها تكشف عليها يا إما لو مش حتعرف شوف كهربائى أو فنى بطاريات يفك البطارية وياخدها تكشف عليها . بس نصيحة أوعى تشترى بطارية سايلة هات بطارية جافة عشان وجع الدماغ طالما مش بتحب تفتح كبوت العربية
بس نصيحة لازم كل فترة كده تفتح كبوت العربية وتبص على حوض العربية نظرة سريعة ممكن تكتشف حاجة قبل ما تعطل وتعملك مشكلة وكمان لازم تبص على الزيت وتشوف مقايسه كل فترة

**Mecha** · 24-09-2013 12:52 PM

try jump start and see

**أحمد جودة** · 24-09-2013 01:03 PM

كدة بطارية فارغة وغالباً عندك تهريب للكهربا

**Silent~Dream** · 24-09-2013 04:21 PM

المشاركة الأصلية كتبت بواسطة lidosasa

البوجيهات ملهاش علاقة لو كانت هى السبب كان المارش أشتغل والعربية ملقتطش وكمان كان الإنذار إشتغل . لكن المشكلة واضحة جداً إنها مشكلة بطارية

عارف ان مشكلته غالبا هتكون من البطاريه او كابلاتها لكن انا بقوله يشيك على البوجيهات عشان لما يصلح البطاريه او المشكله العربيه تدور معاه على طول

**lidosasa** · 25-09-2013 10:03 AM

المشاركة الأصلية كتبت بواسطة 0samah

ربنا يبارك فيكم يا رجاله علي الحلول وسرعه الرد والله انتو اجدع ناس انا مش عارف اشكركم ازاي :)

انا عديت بعد الشغل علي كهربائي سيارات وجه معايا وشاف البطاريه ولسه هيعمل الوصله راحت البطاريه مشرزه والعربيه نورت الانتظار علشان الباب مفتوح المهم قالي دور دورت رحت معاه علي الورشه وواحنا في الطريق بقله هي فيها ايه قالي ده السلك شكلو كان محلول لما نروح هناك هنتاكد ونربطه كويس قلتلو طيب مش يمكن عمرها الافتراضي خلص دي بقالها سنتين قالي والله يا بيه اسمع مني البطاريات دي حظوظ ممكن تقعد معاك 10 سنين وممكن تشتريها وبعد شهر تضرب ف الحمد الله انها جت في السلك
رحنا الورشه وفك الطرفين و جاب زي سنفره كده وعمل السلكين و القطبين بتوع البطاريه وركبنا السلك وقرط عليه ودورت 3 او 4 مرات عنده والحمد الله تمام

بس الغريب اني لقيت البطاريه عاديه مش جافه استغربت جدا هو ده طبيعي ؟؟

لو البطارية سايلة حتبقى محتاج كل فترة إنك تشيك عليها عندى كهربائى أو محل بطاريات عشان لو المية بتاعتها نقصت يزودها ليك هى دى مشكلة البطاريات السايلة إنها بتحتاج صيانة مش زى الجافة تركبها وتنساها لحد ما تبوظ