تقرير زياره مركز الصفا لظبط الكربراتير والعادم
السلام عليكم
- اولا بعتذر عن تغيبى الفتره اللى فاتت واللى مش عارف هتخلص امتى بس ظروف الشغل مش اكتر
-ثانيا انا عارف ان التقرير هيكون عن هوندا بس عشان الفايده تعم ولانى معرفشى حد هناك
عربيتى هوندا اكورد 1990 الجيل الرابع نازله من المصنع بمكنه 1800 سى سى كربراتير كامله اوتو خليجى + فتحه سقف
العربيه زى كل العربيات اللى بجيبها ياما بيكون فيها مشكله فى الموتور او مفيهاش موتور اصلا وده بيخلينى اشترى عربيات اعلى بسعر اقل وانا وحظى فى المصاريف المهم العربيه دى كانت الحمد لله لسه مغيره موتور فى شهر 1 2013 واتركنت لشهر 5 وانا اشتريتها فى 6 تقريبا وكان من اسباب الركنه انها دايما مبرجله ومتلته وبتبطل وعشات هى اوتو مكنشى بينفع يتمشى بيها خالص
المكنه المتسقطه 2.2 انجيكشن بتاعه نفس الموديل بس المكنه كانت جايه من غير كنترول وعشان كده العبقرى الميكانيكى شال المانفولد الانجيكشن وركب المانفولد القديم بتاعه ال1800 وشغلها كربراتير ومن ساعتها والعربيه اتركنت لحد ماشتريتها ومش هقولكو عملت فينا ايه لحد ما وصلت لتحت البيت
ركنت العربيه بعد ما خلصت على كل فلوسى لحد ما اتصرف فى فلوس اصرف عليها والحمد لله ربنا كرمنى قبدات رحله الشقاء
اكتشفت ان العربيه ممكن متبطلشى فى حاله انى اعلى العربيه لحد اربى ام 2 ولازم اسخن لمده لا تقل عن 10 دقايق علما بان مشوارى اليومى 2 كم فى 10 دقايق ويمكن اقل فكنت بستهلك بنزين فى التسخين بس اكتر من اللى بروح بيه المشوار بثلاثه اضعاف ولان مشوارى اليومى ده هو اللى هيجيب الفلوس ركنتها واتصرفت لحد ما بقى معايا فلوس
وانا بشترى العربيه البائع مشكورا ادانى المكنه القديمه اللى هى 1800(وكانت البلوكه مكسوره) ولانه اشترى المكنه الجديده بالفتيس اداهولى برضه علما بان المكنه الجديده ركبت على الفتيس القديم لانهم تقريبا واحد ده غير المانقلود الانجيكشن وضفيره الموتور الانجيكشن يعنى اخر دلع
سمعت عن مركز الصفا وبصراحه كل اللى سمعته ميطمنشى ناس بتشتكى وناس زعلانه بس لاحظت ان 70% من اللى بيشتكوا اتحل جزء كبير من مشكلتهم ولان نص العمى افضل من العمى كله خدت بعضى ورحت على هناك واخترت يوم الجمعه قبل الصلاه ومشيت دائرى عشان الحلوه عاليه جدا ولو وقفت فى اشاره لمده اكتر من 5 دقايق بتسخن وممكن تبطل واقعد جنبها مش اقل من نص ساعه هشان ترضى تدور وتمت على خير ووصلت هناك وطلع عينى وانا بركنها لانها كانت بتبطل فى الريسرف
رحت حجزت مكان وخلال 10 دقايق كان الكوبون اللى بكتب فيه انا بشتكى من ايه مع الفنى وهو شاب عشريناتى لابس هاند فرى قلت بس يبقى هو مش عايز يتكلم مع حد وقفت اتفرج عليه وانا ساكت ومليش دعوه رجع قاللى ان الكارب لازم يطلع يتنضف وتكلفته 120 غير شامل قطع الغيار زى البكات والفاكيومز قلت مش مشكله الاول سالته انت شايف المشكله اللى فى العربيه قاللى يا استاذ العربيه دى متنيله بستين نيله عشان بس مش بعد ما يخلص يروح مديهالى متنيله بسبعين نيله ويقولى اصل العربيه ملهاش قطع غيار هنا :)
فك نضف ركب دور على طول تحسن بنسبه 60% العربيه هديت والاربى ام على 1.2 وبطل يلعب وصوت المحرك انتظم بشكل ملموس قلت فى بالى بس قفل يا عم وكفايه على قد فلوسى لقيت الفنى مش مرتاح خالص بقوله هو كان فى ايه قاللى الكارب مكنشى فيه مسمار هوا ...... نعم نعم يا عمر.....
يعنى كنت ماشى حبى كده ولله والوطن
المهم الراجل محتار قلت اسيبه واطلع الاستراحه المكيفه واتفرج على الدش بعد ما اشرب من الكولدير ايون كل حاجه موجوده حتى الحمام نضيف جدا وفى مكان للصلاه
رحت صليت الجمعه ورجعت وكنت شايف الفنى فاكك الكربراتير وبيركبه وبرضه مش مرتاح شال وركب تقريبا مرتين لحد ما زهق وكانت الساعه دخلت على 3 رحت جبت اكل وطلعت خطفت نصايه نوم ونزلت لقيته مركب الكارب ومدور العربيه وقفت جنبه لقينه ماسكك سماعه زى بتاعه الدكتور وبيحاول يوصل لمكان التنفيس لحد ما جه واحد كده لابس عادى مش عفريته يعنى بص على المكنه وراح عرف العيب وهو ان المانقولد الكارب مختلف فى شكل الفتحات بتاعته عن وش السلندر وفى تسريب هوا الراجل مشكورا شرحلى المشكله ورسمهالى كمان وعرفت ان الموضوع ده هيخلى العربيه متلته فى السلانسيه بس مش هتبطل
وارشد الفنى فى انه يحاول يسد التسريب على قد ما يقدر بعجينه اى بوكسى وقد كان
الراجل نفسه لما لقينى مبسوط قاللى انت مبسوط ليه دى كده رايحه فى داهيه والمفروض تبقى انعم من كده بمراحل واشار عليا انى ادخلها قسم الميكانيكا عشان نفك المانفولد بس فى اى وقت تانى
دخلت ادفع الحساب وايدى على قلبى وتفاصيل الحساب كالاتى
120 مصنعيه فك تنضيف وتركيب وظبط
30 مسمار هوا للكارب
10 عجينه اى بوكسى
10 خرطوم بنزين
بالنسبه للملاحظات
1- العربيه بعد ظبط الكارب وسد نسبه كبيره من التسريب اتظبطت باجمالى 80% عن الاول
2- العربيه مبقتشى تحتاج تسخين هى دقيقه بالكتير
3- العربيه متلته بس وانا فى السلانسيه لكن لما بدوس بنزين بتشتغل 4 عادى
4- لما بتكون بارده خالص الاربى ام بيبقى 0.8 ولما بدى غيار بيبقى 0.5 بس مبتبطلى بس بترجرج ولما بتسخن بيبقى 1.2 ولما بدى غيار بيبقى 0.9 والرجرجه بتخف جدا
5- استهلاك البنزين اتحسن جدا جدا لانى ولا بقيت بسخن ولا حاجه
6- صوت العربيه كان خشن بشكل عام رحت للراجل بتاع الشكمان غيرت علبتين ووصله صوت الخشونه اختفى وفضل بس صوت المكنه
7- العربيه فى السرعات ما بعد 40 صوتها هادى جدا والنقلات ناعمه واستجابه الدواسه منطقى جدا يعنى ادوس براحه تغير عند 1.5 و 2.5 والرابع بيجى بعد ال130 زلما بقرص بتغير عند 3.5 و 4.5 او اكير والرابع بيجى بعد ال140 او 150 تقريبا
8- انا دفعت فى الليله دى 175 مع انى كنت منزل 500 من تمن العربيه عشان تصليح الكارب بس فمينفعشى اقول انه غالى
9- الراجل ابو ترنج كان بيقول على الكربراتير كارب والمنفول ماين فولد عرفت انه فاهم ومش من بتوع دواسه البنزين اسمها اكسراتير ولو بس قلت اكسلاريت قدامه ممكن يخبطك بالمفتاح فى عينك وميبقاش مصدق كميه الجهل اللى انت فيها وده خلانى اثق فيه واسمعه للاخر
10- العربيه كانت شغاله على طلمبتين بنزين واحده فى التانك والتنايه كهربا عند الموتور بلدى يعنى بعد الشغل ده لغيت الكهربا واشتغلت باللى فى التنك بس سبتها واصله على الدوره لحد ما اطمن
يارب يكون التقرير وافى
يرجى التعديل فى اى من النقاط بواسطه منسقنا الغالى على حسب ما هو شايف
ودى حبه صور كده للمكان هناك
http://www11.0zz0.com/2013/09/25/09/751227703.jpg
http://www11.0zz0.com/2013/09/25/09/137381038.jpg
http://www11.0zz0.com/2013/09/25/09/438453404.jpg
http://www11.0zz0.com/2013/09/25/09/577282152.jpg
http://www11.0zz0.com/2013/09/25/09/443254088.jpg
