تقرير عن النترا 2013 Fully Loaded + صور

**FOREX EAGLE** · 25-09-2013 04:00 PM

سلام عليكم ورحمه الله
تقرير عن النترا 2013 فولي لودد
تاريخ الشراء مايو 2013
سعر الشراء : 180.000 جنيه
الاوبنشز الموجوده في الفئه دي :

عجلة قيادة متعددة المهام
مسند يد مع حامل الأكواب
تكييف هواء أوتوماتيكي
إغلاق الأبواب مركزياً
مرايات كهربائية
إشارة جانبية بالمراه
مرايات بلون السيارة
مصابيح ضباب
مفتاح ريموت
لمبة قراءة مع حافظة نظارات شمسية
حلية داخلية بطلاء معدني
حواجز للحماية من الاتربة
عجلة قيادة ألية المؤازرة
مقود وناقل حركة جلد
زجاج كهربائي
CD/ راديو/ ام بي ثري بلوتوث
فتحة سقف
مكابح مضادة للانغلاق ABS
جهاز تحذير المسافات الخلفية
حساس مطر
مفتاح ادارة المحرك بالضغط بدون مفتاح (استارت انجن )
فرش جلد كامل
مثبت سرعة
وسادة هوائية للسائق
وسادة هوائية للراكب الأمامي
شماسات مزودة باضاءة وامتداد
عجلة قيادة قابلة للإمالة
كمبيوتر رحلات
فتح الشنطة من الداخل
مقاس الچنوط 16 بوصة

..............

نيجي بقي للمميزات وعيوب العربيه بعد تجربه تقريبا 5000 كليو
1. ثبات العربيه : العربيه ثباتها ممتاز جدا حتي ع السرعات العاليه ( اعلي سرعه بيها 160 ) طريق مفتوح وملفات علي 130 كانت ممتازه جدا والجنط ال 16 بيدي احساس بتقل العربيه ع الطريق وبالتالي ثبات افضل .
2. العفشه : رائعه ولا تشعر بالمطبات ولكن اشوف فيها مشكله التعليق الخلفي لما تكون ماشي علي سرعه وتاخد نقره في الطرق العظيمه بتاعنا تلاقي العربيه بترقص من ورا ولكن دا ع السرعات العاليه .واعتقد دا مش عيب فيها دا عيب في طرقنا لان العربيات دي متصممه علشان تمشي علي طرق ناعمه وسليمه .
3.عزل العربيه جيد جدا ولا افضل عزل اعلي من ذلك لانه بالشكل دا مش هتسمع صوت الكلاسكات بره :D
4. تكييف العربيه : رائع وتلاجه بمعني الكلمه دايما الحراره بخليها 25 ومش بستحمل المروحه اكتر من اول درجه ولو الجو حار مثلا كانت 37 بخليها 2 .
5. مثبت السرعه ميزه حلوه جدا ولكن مش بستمتع بيها لان الطرق المصريه العظيمه مينفعش معاها المثبت كل شويه مطبات ونقره ونظام السواقه الحميري وال booz base حط بوذك علشان تمشي .

6.استهلاك البنزين اشوفه عالي
دايما 9.6 داخل المدينه مع التكييف
ع الطرق السريعه بيقل ل 8.5 مثلا . الايكو مود شايف انه ملهوش اي لزمه بلغيه وبحس بعزم كويس جدا ف العربيه
7. صوت الكاسيت مميز جدا ورائع والملتي فنكشن جميل جدا ايضا .
8.السنسور الخلفي مهم جدا ف العربيه لان ابعادها صعب تشوفها من المرايات وبالتالي هو عامل مساعد جدا لتفادي الخبطات اثناء الركن ولكن التنبيه بيكون متاخر شويه يعني لازم تكون راجع بالراحه والا هتخبط وبعد كده يديك تنبيه :D
9.الاضاءه الخارجيه للسياره رائعه جدا بس للاسف مكنش في مفتاح تحكم في ارتفاع النور وقت الشراء لاني كنت عايز اعلي ارتفاع النور علشان يجيب مسافه ابعد ونشوف المطبات :D ( سؤال هل اقدر اركب الاوبشن دا ف التوكيل ؟ ) ... الاضاءه الداخليه ونور الطابلوه رائع جدا وتعشقه من النظره الاولي .
10. عوامل الامان : العربيه فيها 2 ايرباج واشوف ع الاقل المفروض كان يكون فيها 6 ايرباج بالنسبه للسعر المدفوع فيها لكن هنقول ايه لعم هبور .
11. طبعا العربيه بصمه وايموبلايزر . والانداز الي فيها بيتفعل بعد 15 ثانيه من الاغلاق وعند محاوله فتح اي باب او الشنطه الكلاسك بيشتغل لمده 27 ثانيه .
12. الفرامل : ِABS طبعا الفرامل جميله جدا وتسعفك لا قدر الله وقت الخطر .
13 : الكراسي الداخليه فرش جلد كامل والتابلوه والطاره والفتيس .والكراسي مريحه جدا وشكلها جميل .
14.العربيه كان المفروض يكون فيها انزار حركه وتنبيه عند سرعه 120 كليو لكن غبور قالي مش نازله فيها .
15. السنتر لوك المفروض عند الاغلاق الابواب الخلفيه منقدرش نفتحها علشان لو في اطفال ميفتحوش الباب والعربيه ماشيه ..لكن الابواب الخلفيه لو الطفل حرك اللوك بيفتح عادي معاه !! هل دا ممكن يتعمل ف التوكيل بحيث مع اغلاق السنتر الابواب الخلفيه متفتحش من جوه الا لما انا الغي السنتر ؟
16. العربيه الصاج بتاعها خفيف جدا واي خبطه بتاثر فيها ودا عيب العربيات الجديده كلها ..ودا مطلوب عالميا ان كل شركات السيارات تخفف من وزن العربيه علشان استهلاك البنزين لانه متوقع ازمه طاقه عالميه .
17. كنت عايز اركب وحده رفع ف العربيه تقفل المريات والسنتر والازاز والسقف مع بعض لكن الجمله المعتاده من التوكيل هتطلع بره الضمان ومش بيوافقوا يركبوها من عندهم !! بس هركبها برده

كده انا خلصت التقرير واتمني يكون عجبكم
ودي صور للعربيه
قولو ما شاء الله

تحياتي لكم

**Samir Elshahawy** · 25-09-2013 04:26 PM

تقرير رائع ووافي و حتي العيوب حضرتك ذكرتها و للاسف حتي الالنترا الفولي لودد اللي بتنزل هنا بتنزل ناقصة عن اللي بتنزل بره

و لكن لي استفسار بسيط بخصوص خاصية الايكو الموجودة :
هل هي مجرد تنبيه فقط و لا فعالة ؟
بمعني هل مفتاح الايكو موجود في الطارة و لا بجانب مفتاح تخفيض اضائة التابلوه ؟
و هل لما بتشغل الايكو مود سحب العربية بيتأثر و لا لأ ؟

اللي أعرفه أن الخاصية دي شغالة في الألنترا المزودة بالمحرك ال جي دي أي فقط

و شكرا علي الموضوع

**DEVILRIDER** · 25-09-2013 05:00 PM

تقرير جميل ربنا يبركلك فيها

**mahmoud_afifi** · 25-09-2013 05:40 PM

ماشاء الله لا قوة الا بالله. ربنا يباركلك فيها ويكفيك شرها
وماشاء الله تصويرك حلو (y)

**Haitham Basha** · 25-09-2013 06:05 PM

بسم الله ما شاء الله و لا حول و لا قوة إلا بالله . ربنا يبارك لك في عربيتك و يكفيك شر طريقك ... العربية فعلاً ممتازة بكل المقاييس لا يعبها إلا حبيب القلب و كلنا عارفينه ... بالنسبة للولاد و الباب ففي عندك لوك في جنب الباب لكا تفتحة لو عملته الباب مش هيتفتح غير من بره .

إذاي حضرتك عندك مفيش الشاشة الديفي دي و الكاميرا الخلفيه و التحكم في التليفون من الطارة و السنسور الأمامي و زرار تعلية النور و ازاي مفيش الـ esp و زرار الـ eco أنا شفتها هنا في مصر فولي لوديد بي 182.000 و انا بشتري عربيتي و كانت زي ما أنا وصفتها غير عربية حضرتك خالص و كانت وكيل مش خليجي ... أنا عايز أفهم إيه الي بيحصل ده يعني الراجل مزود عني 18.000 جنيه و كل الي عندو زيادة إير باج للجالس بجانب السائق يعني هو عندو 2 و انا عندي واحد . مثبت السرعة . و التكيف التاتش !!! ده كمان معندوش زرار تعلية النور !!! إيه الأي كلام ده بجد أنا اتغظت جداً !!!
و يعني إيه يبقى في إتنين فولي لوديد كل واحدة غير التانية ؟؟؟

**S O P H O S** · 25-09-2013 06:33 PM

ما شاء الله
تقرير جميل

**hossam_elwani** · 25-09-2013 08:39 PM

المشاركة الأصلية كتبت بواسطة haitham basha

بسم الله ما شاء الله و لا حول و لا قوة إلا بالله . ربنا يبارك لك في عربيتك و يكفيك شر طريقك ... العربية فعلاً ممتازة بكل المقاييس لا يعبها إلا حبيب القلب و كلنا عارفينه ... بالنسبة للولاد و الباب ففي عندك لوك في جنب الباب لكا تفتحة لو عملته الباب مش هيتفتح غير من بره .

إذاي حضرتك عندك مفيش الشاشة الديفي دي و الكاميرا الخلفيه و التحكم في التليفون من الطارة و السنسور الأمامي و زرار تعلية النور و ازاي مفيش الـ esp و زرار الـ eco أنا شفتها هنا في مصر فولي لوديد بي 182.000 و انا بشتري عربيتي و كانت زي ما أنا وصفتها غير عربية حضرتك خالص و كانت وكيل مش خليجي ... أنا عايز أفهم إيه الي بيحصل ده يعني الراجل مزود عني 18.000 جنيه و كل الي عندو زيادة إير باج للجالس بجانب السائق يعني هو عندو 2 و انا عندي واحد . مثبت السرعة . و التكيف التاتش !!! ده كمان معندوش زرار تعلية النور !!! إيه الأي كلام ده بجد أنا اتغظت جداً !!!
و يعني إيه يبقى في إتنين فولي لوديد كل واحدة غير التانية ؟؟؟

اكيد الى انت شوتها دى خليجى بس اتلخبطت

**Mamoud salah H** · 25-09-2013 11:12 PM

ربنا يباركلك في العربية يا باشا ويكفييك شرها
وبصراحة التصوييي رائع جدا جدا

**FOREX EAGLE** · 26-09-2013 12:19 AM

المشاركة الأصلية كتبت بواسطة Samir Elshahawy

تقرير رائع ووافي و حتي العيوب حضرتك ذكرتها و للاسف حتي الالنترا الفولي لودد اللي بتنزل هنا بتنزل ناقصة عن اللي بتنزل بره

و لكن لي استفسار بسيط بخصوص خاصية الايكو الموجودة :
هل هي مجرد تنبيه فقط و لا فعالة ؟
بمعني هل مفتاح الايكو موجود في الطارة و لا بجانب مفتاح تخفيض اضائة التابلوه ؟
و هل لما بتشغل الايكو مود سحب العربية بيتأثر و لا لأ ؟

اللي أعرفه أن الخاصية دي شغالة في الألنترا المزودة بالمحرك ال جي دي أي فقط

و شكرا علي الموضوع

اهلا يبشمهدس ...بالنسبه لخاصيه الايكو فهي موجوده في زرار ال trip وليست في زرار منفصل ..بتكون في زرار منفصل في الالنترا كوبيه مع ال esp