الست دي تعباني وشغلة تفكيري !!!!

**mr_vampire** · 25-09-2013 08:13 PM

المشاركة الأصلية كتبت بواسطة mohabelnegm

مرة تالته,,,,,لو فى قدامى شحات و مهما كان منظرة غلبان مش هاديله,,,هادور على حد مريض و غلبان مابيشحتش علشان أديله"ودول كتير جدا جدا للى يبص حواليه بس" انما اللى عايز يستسهل و يدى اللى بييجى قدامه بالحكم على المظهرأن ده كده يستحق و كده هاخد الثواب و خلاص ده كده بيظلم حد تانى محتاج كان أولى بالصدقة ديه و متعفف انه يسأل حد المساعدة.

للمرة الالف يافندم التعميم اللي حضرتك بتتكلم بيه (ان 99.99% من اللي بيشحتو نصابين ) وسوء الظن بالناس ( ان الناس اللي بتدي اللي فالشارع عشان بيستسهلو انهم يدورو علي حد غلبان وبيدو للي بييجي ادامهم ). هو ده اللي مش مقبول. لان فيها ناس هتتظلم فيه.

انما حضرتك تدي او متديش ده حاجة تخصك لا حد تدخل فيها ولا ليه حق يتدخل فيها.

تحياتي تاني.

**mOuStaFa_ERTU** · 25-09-2013 08:22 PM

انا عايز احكى موقف من مواقف كتير اوى حصلت سواء معايا شخصيا او شفتها بعينى ..
اخويا الكبير كان فى السعوديه ونزل اجازه المهم فى يمو قبل ما يرجع قلنا نفسحه شويه بقه وفى الاخر رحنا عن العربى اللى فى مصر الجديده بتاع العصير والحركات دى ولاقينا ست بتشحت وواحد عجوز بيتخانق معاها والحوار كان كالتالى :

الراجل - ماكفايه بقه انتى قاعده هنا من الصبح
الست - طيب ما انت اشتغلت الله ينور ومعاك اد كده
الراجل - انتى هتنقى كمان فى الرزق ؟
المهم الموضوع ده على مسافه بالكتير اوى 20م من العربيه المهم برده الراجل بقه تقمص الشخصيه وجاى يعرج وعامل اخرص ومشلول وحاجات كتيره كده فى بعض .. فاخويا بصراحه ماسكتش وقاله ما انت كنت زى الفل وصوتك طالع وبتتخانق اتكسف على دمك وشوفلك شغلانه احسن امسك حتى فوطه وامسح ازاز العربيات وكان الرد اللى افحمنى ان قاله وامسك فوطه لسه ... ما كده احسن 100 مره !!!!

فعشان كده الواحد بيحتار هل فعلا المتسول ده عايز ومحتاج ولا لاء
انا لما بلائى واحد ويقولى عايز 1ج اكل بروح اجيبله ساندوتش ومش بيرى ياخده وكذلك فى المواصلات تجيلك واحده وتقولك انا من الهند وبجمع فلوس اسافر طيب تاعلى يا ستى اوصلك لميكروباصات الهند وادفعلك اجره تسيبك وتمشى وهكذا ..
بس لما قريت حديث للرسول صل الله عليه وسلم بيقول فيما معناه (( لو اتاكم السائل فاعطوه ولو جاء على فرس )) وطبعا اللى كان عنده حصان زمان زى اللى معاه ال s500 كده يعنى حتى لو غنى ولابس شيك وطلب منك فلوس لله اديله وحسابك وحسابه عند ربنا ومن ساعتها لو قابلت حد وطلب منى فلوس بديله وبقول كله لوجه الله تعالى
واسف للاطاله

**mohabelnegm** · 25-09-2013 08:22 PM

المشاركة الأصلية كتبت بواسطة mr_vampire

للمرة الالف يافندم التعميم اللي حضرتك بتتكلم بيه (ان 99.99% من اللي بيشحتو نصابين ) وسوء الظن بالناس ( ان الناس اللي بتدي اللي فالشارع عشان بيستسهلو انهم يدورو علي حد غلبان وبيدو للي بييجي ادامهم ). هو ده اللي مش مقبول. لان فيها ناس هتتظلم فيه.

انما حضرتك تدي او متديش ده حاجة تخصك لا حد تدخل فيها ولا ليه حق يتدخل فيها.

تحياتي تاني.

هوا أنا قلت لحضرتك أن أنا ادى أو مديش ديه حاجة تخص حد تانى ؟؟...الموضوع للمناقشة كل واحد يحط رأيه ...و رأيى ده ((لوجه الله تعالى)) أن الناس تقرا الكلام ده و تدور على الغلابه و المرضى اللى مابيشحتوش..يعنى اللى فى نيته يطلع فلوس لوجه الله أنه يتحرى هايديها لمين و يجتهد أنها توصل لحد فعلا "محتاج" و اللى خلى الشحاتين تكتر بالشكل ده هوا أن الناس بتدى و خلاص و الشحاته بقت مهنة مربحة و ده اللى خلى الشحاتين يبقوا بالصورة ديه و بالعدد ده!

**مصطفى-حسن** · 25-09-2013 09:16 PM

المشاركة الأصلية كتبت بواسطة mohabelnegm

و اللى خلى الشحاتين تكتر بالشكل ده هوا أن الناس بتدى و خلاص و الشحاته بقت مهنة مربحة و ده اللى خلى الشحاتين يبقوا بالصورة ديه و بالعدد ده!

كلمتين من الاخر

**الجنرال** · 25-09-2013 11:38 PM

معلش انا شايف ان المؤمن كيس فطن .. يعنى مش المفروض انه يضحك عليك وتقول معلش وانا هاخد الثواب .. لا انت ممكن تكون بتاخد ذنوب اصلا وانت مش واخد بالك (ده رأيي)

بمناسبة ان الواحد بيحكي .. انا شغلي جنب مستشفى .. فمرة ركنت العربية ورايح الشغل لقيت واحد بتاكسي وجاي جري عليا (الصبح الساعة 8) وبيعيط وبيقولي ان ابنه فى المستشفى وتعبان ومحتاج حاجات وادوية والموضوع مزنق معاه .. بصراحة تعاطفت معاه وكنت هطلعله مبلغ كبير (50 جنيه) وكان معايا ناس زملاء من الشغل كانوا بيركنوا فكنا هنديله حوالي 100 جنيه ..

طبعا سواق التاكسي الابيض معاه ورق وبيديهوني كدليل اثبات على الحالة بتاعة ابنه .. المهم انا من باب الامانة وانه ميضحكش عليا (وكنت طلعت ال50 جنيه فى ايدي بس مخبيها) رحت سألته قلتله طيب انت ابنك فى انهي مستشفى؟؟

سواق التاكسي اتلخبط فى الكلام وبدأ يتهته وقالي : لا ده هو فى مستشفى فى شبرا !! (واحنا في المعادي)

قلتله اااااااااااااه فى شبرا .. طيب ماشي وسيبته .. فرد عليا وقالي والله يابيه ما بكدب (مع حبة عياط ومؤثرات صوتية)
قلتله لا علشان لو كان فى المستشفى اللى جنب الشغل كنت هكلملك الناس اللى نعرفهم فى المستشفى ياخدوا بالهم من ابنك

ورحت مرجع الفلوس فى جيبي تاني

وسبحان الله .. بعدها باسبوع لقيته هو نفسه في نفس المكان وبنفس الحجة ... وجه عليا وطلب نفس الطلب وبنفس الطريقة .. قلتله انت تاني انت مش هتبطل .. طلع بالعربية جري

وبعدها بكام يوم واحد زميلي فى الشغل لقاه برضه ونفس الحجة ونفس الطريقة ..

في الاخر والخلاصة .. لو مكنتش سألته كام سؤال اتأكد بيه من حالته .. كان زماني اضحك عليا وطلعت اهبل !!

**amrezzat82** · 26-09-2013 11:05 AM

بناء على تجربتي فى كل وسط البلد و السيدة زينب - التسول ده مهنة احترافية جدااا جدااا و لو حاولت تفهم منهم اي حاجة حتلاقيهم يتلخبطوا و لو حالوت تجبلهم أكل حيرفضوا و لو ادتهم كتيير عشان يروحوا فعلا حترجع و تلاقيهم برضه يقوللك عايز أروح رغم انك بالفعل اديته كتيير . و الشهادات بتبقى مضروبة و مش منطقية
الست العجوزة ديه اكيد بنسبة كبيرة حد بيجبها و يوديها او هي بتظبط ده زي ما بيحصل كتيير هنا
من الآخر المفروض الواحد ليه نظرة و الدين عمره ماقال لو انت حسيت ان اللى بيشحت مش محتاج اديه و خلاص
و ياما شفت نماذج ناس بتترعش او محروقة او عيال بتعيط او كراسي و فى الآخر يطلع فعلا مهنة احترافية و جرب بنفسك

**sas5** · 26-09-2013 12:31 PM

المشاركة الأصلية كتبت بواسطة mr_vampire

اللي عنده نية يطلع حاجة لله يطلعها وثوابه عند ربنا. وبرده يبقي عنده نظرة فالشخص اللي هيديله.

انما مثلا ( ولا اقصد شخص معين مع احترامي للجميع ) منجيش علي امراة مسنة علي كرسي متحرك ونسال مين بيجيبها ومين بيروحها ومين بيحيبلها مية واكل . محدش يعرف مين اللي اجبرها عالقعدة ده ومحدش يعرف وراها مسئوليات ايه.

السلام عليكم ورحمه الله
ايجاد الاعذار لكل مخطى جعل الكل يتساوى الذى يعمل مثل الذى لايعمل ومن يخطى لايعاقب ونوجد له العذر لذلك البلد عمرها ماسوف تتقدم ابدا

**mr_vampire** · 26-09-2013 12:39 PM

المشاركة الأصلية كتبت بواسطة sas5

السلام عليكم ورحمه الله
ايجاد الاعذار لكل مخطى جعل الكل يتساوى الذى يعمل مثل الذى لايعمل ومن يخطى لايعاقب ونوجد له العذر لذلك البلد عمرها ماسوف تتقدم ابدا

وعليكم السلام.

معلش يافندم . حضرتك تقصد ايه ؟؟؟؟ لاني لسة صاحي والدماغ لسة مجمعتش.

ايه علاقة كلام حضرتك بكلامي اللي حضرتك اقتبسته ؟؟؟؟؟

**nona_yaris** · 26-09-2013 01:12 PM

القصة دي قرأتها واحد كان كاتبها ع النت :
الراجل ده كان صاحب مصنع وكل يوم يلاقي راجل شحات وساعات كان بيديله اللي فيه النصيب
ومرة الراجل فكر زي اختي صاحبة الموضوع كدة والراجل الشحات صعب عليه اوي
تاني يوم راح للشحات واداله اللي فيه النصيب وقال للشحات بمنتهى البراءة : ايه رأيك انا عندي لك وظيفة - تيجي تشتغل عندي ف المصنع بتاعي ؟؟
وكان الرد كالصاعقة على الراجل صاحب المصنع : ليه هو انت شايفني عاطل ؟؟؟
ده بيعرفنا ان الشحاتين شايفين ان ده شغل مش تسول
وطبعا ده بدون تعميم لكنه في الغالبية العظمى
اللي لفت نظري اكتر من كدة هو اماكن تواجدهم وتوقيتهم
لاحظ ان اي مكان فيه تكدس مروري لا يخلو من الشحاتين
لاحظ انهم بيتشتغلو بتنسيق رهيب في التوقيت واختيار الاماكن واختيار الشحاتين المناسبين للموقف
الناس دي زي مايكون بيشغلهم جهاز استخبارات عالمي
عندهم معلومة بكل الاماكن التي يستجد فيها اي اختناق مروري بمجرد حدوثة ويمكن قبل ادارة المرور ما تعرف هما بيكونو قامو بالواجب
ولاحظ كمان انهم مدربين علي اعلى مستوي وبيلمحو النظرة في عينك ويعرفو منها هل انت ح تديهم ولا ح تمشي
ومحدش منهم بيشتغل مع نفسه تحس ان لهم ادارة في منتهي البراعة بتحركهم وتشغلهم
انا ايقنت ان الافلام عن المتسولين مقتبسة من الواقع
وانا عن نفسي ممكن طبعا ادي حد متسول لو صعب عليا خصوصا لو طفل ولو اقدر اديه حاجة ياكلها زي باكو بسكوت او شيكولاته او علبة عصير يبقي افضل لان الفلوس اللي ح اديهالو اكيد ح تروح للي مشغله مش للطفل نفسه
لكن
عندما اريد اخراج زكاة او صدقات لازم اتحري المحتاج الذي قد يمنعه تعففه من السؤال
المريض الذي لا يجد العلاج
الارملة التي تسعي على ايتام
اليتيم المستحق
ذوي الاعاقات الذين يستعفون ان يتاجرو باعاقتهم
طلبة العلم الذين يحتاجون من ينفق عليهم

مرة واحد فقير اعرفه كان عنده بنت عمرها عام ونصف تقريبا ولسة مش بتمشي ولما سألته قالي اعملها ايه انا رحت المستشفى الحكومة ادوها برشام معملش حاجة وانا اصلا بأجيب اكلهم بالعافية يبقي ح اعالجها ازاي
نصيبها كدة بقى
تخيل انك ممكن بثمن كشف دكتور وشوية ادوية وكالسيوم ممكن تنقذ مستقبل طفلة من انها تكون مشلولة
وامثال كتير زي كده
ودول كتير جدا
ممكن بس اللي عاوز يبحث عنهم في الجوار ح تلاقيهم موجودين في كل مكان ينتظرون فقط من يكتشف حاجتهم بدون ان يسألوا الناس إلحافا
آسفة للإطالة