انا معايا ف حدود 25000 و دي اول عربية اجيبها و فكرت في الصيني عشان التكيف و الدريكسيون خفيف و كل الاوبشن دي بالسعر ده مش موجود غير صيني و كمان الشكل الكويس ولا بلاش منه اصلا تنصحوني ب ايه ؟؟
عرض للطباعة
انا معايا ف حدود 25000 و دي اول عربية اجيبها و فكرت في الصيني عشان التكيف و الدريكسيون خفيف و كل الاوبشن دي بالسعر ده مش موجود غير صيني و كمان الشكل الكويس ولا بلاش منه اصلا تنصحوني ب ايه ؟؟
لو بتتكلم في الصيني يبقى متركبش أقل من اسبرانزا a516 2007 و دي لو حالتها كويسة تعدي الـ 35.000 جنيه غير كده شوف حاجة تانية ...
الصينى عامه عربيات كويسه ................... ولكن لازم الحاله تكون عند الشراء للمستعمل جيده جدا .
بلاش !!!!!
الـ 25 الف ما تجيبش عربية كويسة لا صينى ولا هندى .
ح تجيب عربية واقعة ح تدوخك على الميكانيكية وال byd توكيلها ح يزعلك ادخلى القسم وشوفى المشاكل.
ممكن دول تدفعيهم مقدم لسوزوكى ماروتى... او التو... جديدة وتقسطى الباقى ... عربية صغيرة واعتمادية وقطع غيارها بملاليم وبتشم البنزين لانها 800 cc والجديدة مش ح تصرف.
او تدورى على واحدة مستعملة بحالة جيدة موديل 2007 2008 2009 ح تكون ف الحدود دى بس تكون حالتها حلوة مش واقعة اوى وح تصرفى عليها بردو.
ودى نصيحة و رأيى الشخصى ... وأسألى عن العربية دى ف قسم السوزوكى.
والله الموفق.
طبعا بتكلم عن الماروتي...
Sent from my Xperia Arc S using Forum Runner
وكعادة الشعب المصري العظيم كله عمال "يفتي" بدون سابق تجربة ويحلل ع مزاجه ويحرم ع مزاجه ..
بصي حضرتك أنا كان ليا تجربة موفقة جدا جدا جدا مع العربيات الصيني .. كان عندنا ف البيت عربيتين شيري qq .. كانت واحدة منهم بتاعتي موديل 2004 و 800 سي سي .. والتانية بتاعة والدي موديل 2006 و 1100 سي سي ..
العربيتين دول قعدوا معانا حوالي سنة وبعناهم من فترة بسيطة .. قطع الغيار متوفرة .. أداء ممتاز .. توفير بنزين جميل .. الأوبشنز كلها كانت شغالة بدون أدنى مشكلة .. عربيتي تكيفها كان شغال زي الفل مع انها 800 سي سي !!!!
والأجمل من كل ده - إننا كسبنا ف العربيتين لما بعناهم ومخسرناش !!! يعني بعناهم بسعر اكبر من اللى اشتريناهم بيه !!! وكمان مطلوبين جدا ف السوق والأتنين اتباعوا بكل سهولة ويسر ...
عاوز أضيف لحضرتك إني ركبت قبل الشيري ماروتي 2006 .. صدقيني مفيش اي وجه للمقارنة بين الاتنين نهائيا بالرغم من انهم بنفس السعر !!!
مع إحترامي لكل ملاك الماروتي - الماروتي دي عبارة عن فيسبا بأربع كاوتشات وأربع أبواب .. مفيش وجه للمقارنة بين الماروتي الفقيرة فى كل شىء والخالية من الأوبشنز وبين الشيري qq اللى حقن إلكتروني وتكييف وباور وكل الكماليات ...
وأكيد أكيد مفيش عربية بتمشي على كوكب الأرض ملهاش مشاكل أو عيوب .. ولكن مقابلتش معاها اي عيوب او مشاكل .. وأقسم بالله العظيم اني قعدت سنة راكبها معملتش فيها حاجة غير تغيير مساعدين اماميين وكنت بنزل بيها شغلي يوميا .. يادوبك أحط بنزين وأغير زيت كل 5000 كيلو .. عربية كان حلال كل جنيه دفعتوا فيها ..
كلامي ده كله كان عن أصغر عربية صيني .. فما بالك العربيات الأكبر والاغلي ف السعر .. وكمان أنا مش بقول قصائد شعر ف العربية عشان هي معايا او عاوز ابيعها .. لكن بالفعل إحنا بعناهم الأتنين من فترة وماليش مصلحة إني اقول الكلام ده غير انى بشارك بتجربتي وبس ..
ولذلك أرجو من الشعب المصري العظيم يبطل فتي لوجه الله تعالى .. وحياة أبوكم يا شيخ نبطل فتي بقى وكفاية البلد اللى راحت فى 60 داهية بسبب فهلوتنا دي ..