هل عانيت فى حياتك من مواقف أو طرائف للحسد ؟؟؟

**ramymechanics** · 26-09-2013 01:01 PM

بصوا مبدئيا الموضوع دة للتسلية مش أكتر ولا أقل .. أنا عارف إن النافع والضار هو الله وأنا شخصيا مش بركز فى موضوع الحسد والعين دة نهااااائى بس المدام بتعتقد فيه ومركزة معاه أوى ... لكن أنا مثلا لاحظت أن فى صديق معين أما بيتصل بيا وأنا مسافر أتفسح أو فى خروجة ويعرف أنى بتفسح لااااااازم يحصل حاجة تبوظ الخروجة دى والموضوع دة اتكرر حوالى 4 أو 5 مرات وفى مرة منهم الكاوتش اتخرم 5 أخرام مرة واحدة فجأة ... واخدين بالكم 5

فى واحدة تانية من العائلة أول ما تعرف أننا برة أو بنتفسح بردو لاااااازم أنا ومراتى نتخانق خناقة جامدة رغم إننا والحمد لله خناقاتنا محدودة جدا نظرا لتفاهمنا وقصة حبنا الضاربة فى جذور التاريخ .. أحم أحم مش موضوعنا ... والموضوع دة بردو اتكرر عدد كبير من المرات خصوصا أنى أيدى بتاكلنى وبعمل check-in عالفيسبوك أما بروح اى مكان عشان لو حد من اصدقائى موجود أقابله فبالتالى أمة لا إله إلا الله بتعرف إنى فى المكان الفلانى

هل حد بتحصل معاه حاجة زى كدة ؟؟

**مصطفى-حسن** · 26-09-2013 01:10 PM

يوووووووووووة
فكرتنى بقصص ومواضيع لا حصر لها و حدثت بالفعل
الحسد حقيقى ومذكور فى القران
ولولقيت او عرفت ان واحد فى دايرة معارفك عينة جامدة كل ما تقابلة استمرض واستموت وادعى الفقر
الحسد دة حقيقى مش اشتغلات

**S O P H O S** · 26-09-2013 02:28 PM

يااااااه الاسوء انك تبقي عارف مين بيحسد
وكل ما يقابلك يحدث شئ
والحمد الله علي كل شئ ده فالنهاية نصيب

**fepsceasar** · 26-09-2013 02:29 PM

كنت مرة نازل مع اصحابى واحنا فى 3 اعدادى شباب روش ورايحين السيرك ..اشمعنى السيرك مش فاكر
كان معانا واحد صاحبنا اول ما نزلنا العربية دى جميلة وبتاعت فلان الفلانى وهو جايبها من المكان العلانى وتمنها كام الف يادوب العربية عديت وتسمع اجمد فرملة وتلاقى صاحبها بيعيط عليها لحد دلوقتى
ويدوب بعدها بشوية قبل السيرك صاحبنا ده يقولنا الشارع النهاردة منور كويس قوى على غير العادة وهوووب النور قطع
واحنا بقى فى السيرك ولان صاحبنا ده ما بيجليش واحد بيعمل استعراض على الحبل وطبعا صاحبنا ما سكتش الواد ده جامد جدا ..ووقع الواد يا حبت عين امه
طبعا انا ما فكرتش فى موضوع الحسد والكلام ده ما كانش فى دماغى ساعتها ولكن اليوم ده فضل معلق معايا ..
طبعا المواقف دى بحكيهالكوا للتسلية لكن بصراحة بعدها بتلات اربع سنين بقيت بقلق من صاحبنا ده وربنا هو الحافظ ..بس بصراحة قطعت علاقتى بيه مش للسبب ده تحديدا

**ahmedteam** · 26-09-2013 02:49 PM

و انا صغير كان ابويا جايب ساعه حيطه من الخليج ايام العز من اللى يتعمل موسيقى و عصافير و كانت حاجه جامده ايامها الكلام ده فى اول التسعينات مثلا

المهم كان عندنا جماعه قرايبنا و هوب الساعه رنت قدامهم

هما مشيو من هنا و الساعه بعديا باظت و مرنتش تانى علشان وقعت من على الحيطه زى مسرحيه الهمجى

**husseinsalah** · 26-09-2013 03:01 PM

كنت واقف فى امان الله بعمل صيانة بنفسى لعربيتى ادام البيت (لانى ودتها مركز صيانة للكربراتير وتانى يوم حلفت ما تدور ومارحتش الشغل) فكيت الكربراتير ونشفت البنزين ودورتها وكلة تمام ودورتها وفاتح الكبوت الاقى فوق دماغى واحد من الجيران كنت بقالى كتير ما شفتوش كان جاى زيارة لولدتة فاتفاجأ انى جبت عربية وقعد يسأنى جبتها امتى وبكام ... الخ وقعد يقول دى نوعا كويس (راحت مبطلة وهو واقف ... عادى جدا ) وبعدين قعد يشكى حالة وظروفة وجوباتة ......

المهم بعد ما مشى عملتها تانى ونسيت اركب خرطوم البنزين ودورت وفى اقل من ثانيه حوض العربية ولع ...
الحمد لله الشنطة كانت مفتوحة جريت جرى جبت الطفاية ولحقتها بدون اى حسائر لان البنزين هو اللى ولع ومالحقش يحرق حاجة فى العربية ....... ساعتها بس تأكد من شر الحسد و قيمة الطفاية