الخلاصه فى نقل ملكيه وفحص وتجديد وتغيير لوحات
الموضوع هياخد من سيادتك 3 ايام بالكتير لو هتعمل زيي
عربيتى مرور الباجور ونقلتها مرور فيصل
تبيع لنفسك بالتوكيل اللى معاك وللساده الجيزاويه خصوصا اللى فى الهرم وفيصل ارشح لهم شهر عقارى ابو النمرس لذيييييييذ ورايق احسن من بتاع ش مراد
خلصنا من اول 250 جنيه تقريبا
-------------------------------
اول يوم
نزلت مرور فيصل بدرى قوى الساعه 8 الا ربع ورميت العربيه فى طابور الفحص كانت رابع عربيه :)
واشتريت ملف فحص وتجديد وامنت 3 سنين من العيال اللى فى الشارع عشان انجز رغم انهم غاليين شويه وتم الفحص ورفع بصمه الشاسيه والموتورواتكتب طلب المطابقه فى ضهر ورقه الفحص الزرقا ولازم يكون ختم النسر فيها (للاسف رحت الباجور اول مره ومكنش فيه الختم ابن ال -=#$% ده ورجعت على الفاضى)
طبعا لازم تكون العربيه مفيهاش فاميه والحاجات دى ومابتدخنش فى الكبس علشان التلاكيك
------------------------------
تانى يوم
لو حظك حلو زى حالتى واشتريت من واحد جدع جدا زى محمد مصطفى اللى قام معايا بالواجب ومحضرلى شهاده المخالفات من نيابه الباجور
هتاخد شهاده المخالفات وتجيب شويه ورق اهبل كده علشان تسلم النمر القديمه (ملاكى منوفيه) وتطلب منهم الرد على طلب المطابقه اللى مكتوب فى ضهر ورقه الفحص الزرقا ويتختم برضه بختم النسر وتسلمهم رخصه العربيه وتستنى شهاده البيانات
وهيكون فيها غير مطالب بمخالفات غير مطالب برخصه غير مطالب بلوحات لانك هتسلمهم - مطالب بسندات نقل الملكيه والرسوم
ترد على مرورك لو لحقت وتخلى مهندس الفحص يحطلك ختم النسر فى ورقه الفحص (بمعنى ان كله تمام)
وربنا يسترها عليك من الكماين وانت راجع علشان انت ماشى من غير نمر
-------------------------------
تالت يوم
تنزل مرورك الاصلى (فيصل فى حالتى )وتنزل بدرى علشان تلحق بركه الصبح تحجز مكان فى الشباك ولو معاك حد يخلصلك الختم اللى ناقص فى السطرين البرتقالى اللى فوق يبقى عنب علشان تسلملهم ورقك كامل من غير غلطه
هتسلمهم الورق بتاعك وتاخد ورقه بالفلوس المطلوب دفعها فى الخزنه
فى حالتى لانسر كريستاله 98 1300 دفعت 806 علشان النمر والعربيات اللى كانت باسمى :( وتجديد 3 سنين
نراجع مع بعض هتسلم ايه لفيصل :
شهاده البيانات اللى من المرور اللى هتنقل منه (الباجور مثلا) وصوره منها
التوكيل والعقد بالوصولات العبيطه اللى معاهم وصورهم بالمره
صورتين للبطاقه
وصل الطفايه
ورقه الفحص الزرقا (هتكون غرقانه اختام) وصوره منها
ورق التامين الاجبارى
طلب اهبل بتاع تغيير النمر (صيغه طلب بتتباع ب 2 جنيه)
الوصل الاحمر اللى بتاخده من الخزنه
تسلم الحوارات دى للشباك وتستنى الرخصه اللى هتطلع باسمك وبعد ماتاخدها تصورها مع البطاقه وتديها لبتاع النمر وتاخد النمر الجديده
ومبروك عليك ياسيدى
سلام
