أعزائى أعضاء المنتدى الكرام
كلامى هايكون عن قطع الغيار الغير أصليه سواء كانت ألمانى أو أى صناعه أسيويه
طبعا كلنا عارفين إن السوق مليان بضاعه مقلده ومضروبه من ناحيه ... ومن ناحيه تانيه إحنا ساعات بنتحايل على إرتفاع ثمن قطعه الغيار الأصلى بتوفيق قطعه تانيه من أى ماركه تكون أرخص وتؤدى نفس الغرض ... وده هايكون محور كلامى

طبعا كلنا بيفتخر بعربيته الألمانى ... بثباتها ومتانتها والإعتماديه وطول عمر قطعه الغيار ... بس للأسف
مع كثره إعتمادنا على قطع الغيار المقلده والمتوفقه من ماركه أخرى يبقى بندمر عربياتنا بجد .... وفى خلال سنتين تلاته هايبقى إيه الفرق بين عربيتى وأى عربيه كورى ... ممكن عربيتك الأوبل تبقى نوبيرا بعد كام سنه من إستعمال قطع الغيار دى
ومانزعلش ساعتها لما تعمل معانا اللى بتعمله العربيات الكورى
الموضوع ده اللى خلانى أعمله إنها فكره خطرت فى بالى لما حبيت أشوف قطعه غيار أرخص من اللى كنت بدور عليها
ولما ميكانيكى بالغلط لبسنى فى تغيير طرمبه ميه من سنه كانت سليمه وزى الفل بس عيب تشخيص منه ... وشفت طرمبه الميه الجى إم نازله عامله إزاى بعد ١٠ سنين شغل وشفت الطرمبه اللى ركبتها مكانها ... عرفت معنى الكلام اللى انا بكتبه دلوقتى

الموضوع رؤيه شخصيه ومحتاج إننا نفتح الموضوع للنقاش وكل واحد يقول وجهه نظره
تحياتى