النهاردة في أهرام السيارات مكتوب إن هيبقى فيه رقابة على اسعار قطع الغيار :)
وهيتم وضع حد لهامش الربح بحيث لا يتعدي ال 30 %
الكلام ده لو اتنفذ بجد هيبقى حاجة ممتازة طبعا
إيه رايكم ؟
عرض للطباعة
النهاردة في أهرام السيارات مكتوب إن هيبقى فيه رقابة على اسعار قطع الغيار :)
وهيتم وضع حد لهامش الربح بحيث لا يتعدي ال 30 %
الكلام ده لو اتنفذ بجد هيبقى حاجة ممتازة طبعا
إيه رايكم ؟
زي التسعيرة الجبرية على السلع الاساسية والخضار والفاكهة قابلني لو اتنفذت لان التجار مش هيرضوا بكدة والدنيا هتولع اكتر
الحكومة الجديدة مش عايزة تفشل .... وبصراحة شغالين كويس جدا
ان شاء الله الخير قادم ونتفئل خير
عنهم ما رضيوا
خلي بضاعتهم متلقحه جنبهم
المهم الناس تثبت علي المبدا ومتخضعش للجشع وتساعد الحكومه
وفي نفس الوقت الحكومه تظبط المجمعات الاستهلاكيه
دا بخصوص الخضار والفاكهه
بخصوص قطع الغيار بقي اكيد فيه ناس عاوزه تبيع علشان تلم فلوسها وساعتها حيبيع بالسعر المعتدل غصب عنه
بتفكرنى بفيلم سلام يا صاحبى لما بياع راح يشترى بطيخ من التاجر فقاله الحباية ب 5 جنيه قاله ليه يا معلم دا الحكومة مسعرة الحباية ب 2 جنيه قاله روح خدها من الحكومة . بس خلاص
الموضوع في العربيات سهل عكس الخضار علشان مفيش حد بيبيع قطع غيار علي رصيف واغلب ناس بيشتروا من توكيل او موزع معتمد ودول بيبئوا عندهم سجل تجاري و سجل ضريبي يعني الحكومة هتعرف تتحكم فيهم اهم حاجة دولة القانون
هو قطع الغيار اسهل كثير جدا من الخضار بس بردو صعب عشان حاجتين الجشع و الطمع الفظيع الى عند التجار و تانى حاجه الناس المفروض تدعم الحكومه انها تعمل كده من خلال الشراء من موزعين و اماكن معتمده مضمونه بتطبق القرار ده
والله قرار جميل والحكومة الصراحة والله فوق الممتازة وكل يوم فيه حاجة حلوه بتعملها
من وجهة نظرى ان شاء الله الموضوع حينجح لو عرفوا يمسكوا اسعار التوكيلات و هامش الربح بتاعهم.لأنه بالتالى حينعكس على سعر قطعة الغيار فى التوكيل والمستهلك حيلجاء للتوكيل وتباعا حيضطر التاجر فى السوق انه ينزل بالسعر عشان يعرف يبيع.وبالنسبة للخضر و الفاكهة لو استعانوا بقدرات المجمعات الأستهلاكية و القوات المسلحة و الداخلية فى عمل اسواق كبيرة يومين او ثلاث ايام اسبوعيا ذى ما السلفيين عملوا ايام ثورة 25 يناير اوالأسواق ديه تتعمل فى اماكن معينة و الله لتلاقى التجار ادب نزلوا السعر.وان شاء الله الخير جاى بأذن الله.
البطيخة بكام ؟؟؟؟؟؟؟؟؟؟؟؟؟؟؟
اصلا 30% ربح ده رقم كبير !
ياباشا أنت راجل طيب ...بيكسبوا أكتر من 30% بس انعدام البركة بيخلي كيلو البطاطس ب 7 جنيه وابقى خلي كتر الفلوس ينفع
صديقي المواطن
إذا أردت أن تطاع فأؤمر بالمستطاع أساسا وباﻷسعار الخزعبلية واﻷرباح المفتوحة مصر مفيهاش قطع غيار زي باقي الدول فما بالك يدايقوا التجار ثم المواطن بيشتري قطعة الغيار لو لاقاها مهما بلغ ثمنها المهم يلاقيها بس مش زي اﻷكل والشرب ليه بدايل بس قطعة الغيار ملهاش بدايل
ودمتم للنضال
الموضوع ده لو اتنفذ هيبقى ضربة قاضية لجشع التجار و الي معند هومش ضمير بس محتاج رقابة من حديد ...
صباح الكلام .... السوق عرض و طلب ... تدخل الحكومه بتسعيره جبريه نظام اثبت فشله و لو اى حد دارس اقتصاد يقولك اول اثر لتحديد سعر مغاير عن السعر الطبيعى(اللى ينتج عن توازن العرض و الطلب) هو وجود سوق سودا ..... المجتمع المثالى بس هو اللى مش هيشتغل فى السوق السودا و احنامجتمعنا الله ينور بيخلق سوق سودا من لا شيئ و افتكرو البنزين كان بيتباع فى جراكن بكام من كام شهر
ده بوست كان نازل فالفيس
ماذا فعل الشعب الارجنتيني عند إرتفاع أسعار البيض ... ؟
رووووووووووووووووووووعة ياريت نتعلم منهم هذا الدرس ... !!!
قبل بضع سنوات استيقظ الشعب الأرجنتيني صباح أحد الأيام وإذا بتجـّار الدواجن والبيض قد اتفقوا على رفع سعر البيض كلهم مرة واحدة ، عقدوا اتفاقهم دون أن يفكروا في لحظة واحدة أن هناك من لا يستطيع أن يجد قوت يومه وأن هناك من يكّد النهار والليل ليسـّد رمق أطفال جياع هل تعلمون لماذا ؟ لأنهم تجـّار جشعين لا يهمم إلا أن يملؤوا جيوبهم بأموال الناس كيفما اتفق .
فماذا حصل بعد ذلك ؟ لقد كان المواطن الأرجنتيني ينزل إلى السوبر ماركت ويأخذ البيض وعندما يجد سعره مرتفعاً فإنه يعيده إلى مكانه كان هذا هو حال جميع المواطنين الأرجنتينيين ،. (خلـّوه يفسد) .فماذا تتوقعون انه حصل بعد ذلك ؟
بعد أيام وكالعادة تأتي سيارة التوزيع الخاصة بشركة الدواجن لتقوم بتنزيل الكميات الجديدة من البيض ولكنهم فوجئوا بأن أصحاب المحلات يرفضون إنزال أي كميات جديدة فقام التجـّار بإعادة الكميات إلى مستودعاتهم وقالوا لنصبر أياماً قليلة لعل وعسى أن يعود المواطنون لشراء البيض ، انتظر التجـار أياماً وانتظر الشعب أياماً وانتظروا وانتظروا ،،، ،،،،، و
تورط التجـّار (الجشعون) بالبيض الذي تكدس في الثلاجات والمخازن والمستودعات والبقالات دون وجود مشترٍ ، والدجاج الخائن في المزارع قد اتفق مع المواطنين وواصل إنتاجه من البيض ولم يتوقف ، وأصحاب محلات التموين لم يطلبوا أي طبق بيض فالبيض الموجود لديهم بالأسعار الجديدة مازال متسمّراً في الرفوف ،،،،و لم تنته القصة
وبعد عدة أيام اتفق التجـّار ولكن هذه المرة اتفاقاً جديداً وهو بيع البيض بسعره السابق قبل الارتفاع ،، ولكـّن الشعب الأرجنتيني الأبّي رفض أن يشتري البيض مرة أخرى ،، وذلك لكي يتأدب التجـّار ولا يعودوا لمثلها ،، فعاد التجـّار وخفضوا من سعر البيض مرة أخرى.
وهل انتهت القصة هنا ،،
لا
ولكن الشعب العظيم لم يشتري البيض . فكاد عقول التجـّار أن تزول ، فالخسائر تتراكم والموت قادم .
أخيراً وبعد كل هذا اتفق حثالة التجّار الخاسرين وهم خاسئون بأن يبيعوا البيض بربع سعره قبل الارتفاع مع تقديم اعتذار رسمي للشعب في الصحف بعدم تكرار ما حدث.
هنا انتهت القصة
وأصبح الشعب الأرجنتيني العظيم فائزاً في معركته مع التجار وفائزاً بأنه يشتري البيض بخصم 75 % من سعره الأصلي . وهنيئاً للشعب الواعي ، الشعب المتفق فكرياً والعارف بمصلحته ،، لقد فازوا بالمعركة على التجار الجشعين
فماذا أنتم فاعلون |أيها العرب ؟؟
يا بيه دى إسمها ثقافة مجتمع وشعب إحنا شعبنا تقوده ثقافة النفعية وشعاره فى الحياة عض قلبى ولا تعض رغيفى ويا جاى على قوتى يا ناوى على موتى
يعنى لو سمع إن البيض حيغلى بيحاول يشترى أكبر كمية ممكنة من البيض حتى لو كان مواطن عادى والتجار فاهمين الشعب وبيعرفوا يلاعبوه صح فاكر لما كان الحديد وصل 8000 جنيه وقالوا إنه حيوصل ل 10000 أعرف ناس كانت بيشترى عشان تتاجر فيه ويكسب حتى المواطن العادى أشترى حتى لو مش محتاج يبنى فوراً أعرف ناس كانت حتبنى بعد 6 شهور أشتروا الحديد ب 8000 جنيه وأجروا مخزن 6 شهور شالوا فيه الحديد عشان السرقة وعلى ما بدأو فى البناء نزل الحديد ل 5000 جنيه
كلام جميل و ما انكرتش انه عشان يحصل محتاج لجتمع متماسك و مستعد جزء منه يتنازل لحظيا لتحقيق مكسب للكل على مدى ابعد شويه .... هل مجتمعنا حاليا كده؟
يعنى حضرتك لو عربيتك فيها مشكله و الوكيل بيقولك معنديش قطعة الغيار (المسعره ب ١٠ جنيه و كانت بتتباع ب ٥٠ قبل التسعير) و كل التجار بيقولولك مش موجوده و انت فى السوق واحد قالك هجيبهالك ب ٦٠ او الميكانيكى قالك هتصرف و زى ما تيجى ..... هتاخدها ولا لا؟
مش عايز ردك شخصيا بس من الاخر الناس اللى اشترت لتر البنزين ب ٣ و ٤ جنيه عشان تخزنه مش هتمتنع عن التصرف بنفس الطريقه مع اى حاجه تانيه
وحده وحده ياجماعه
الكلام سهل. ... لكن مثلاً انا تاجر جشع بس جشعي ده وراه عماله عندي وراه ايجار محل وراه مصاريف بيت ومصاريف مدارس العيال ومصاريف مصاريف مصاريف. ... فلمن تيجي الحكومة تحددلي تسعيرة هقولها تحت امرك يا حكومة من عنيا يا حكومة. وهروح اجيب موصفات اي كلام وحجات مضروبة بفواتير انها. اصلية و ١٠٠٪. وقدام القانون اكون خدت ٣٠ ٪ الي نص عليها القانون وبيني وبين نفسي وشيطاني. اكون كسبت منها ٣٠٠٪ فتحديد السعر هيعمل نوع من تحديد الجودة. اذا النهردة روح هاتلك لمبة ركبها النهردة بكره تلاقيها محروقة. روح هاتلك فيشة تاني. يوم هتلاقيها مفرقعه في وشك ليه لان سعر الجنية وقع. والناس او المستهلك عاوز يشتري اللمبة بالسعر القديم والفيشة بالسعر القديم فالتاجر بيروح. يجبلك سلع من الصين نفس الشكل وجودة اقل ويبعهالك بالسعر القديم بجنية وباتنين جنية كمان. تشتريها منها وتفرقع في وشك من هنا !!! وتحياتي
وماذا عن اسعار السيارات نفسها ؟
على فكره الموضوع مش تحديد اسعار السلع زي ماكلكم إتكلمتم .. الموضوع هو تحديد هامش الربح .. يعني أنا لما اقول للتاجر مثلا فانوس الإسبرانزا ده التوكيل بيجيبه من الصين ب 100 جنيه ويبيعه ليا ب 275 جنيه دي مش سرقه ؟ طبعا سرقه .. انا بقى هاقول للوكيل هاتوه ب 100 جنيه وبيعه ب 130 جنيه .. طب ولو بكره الشركه الم رفعت سعر الفانوس خلته 150 جنيه .. برضه هجيبه ب 150 جنيه وابيعه ب 195 جنيه .. مش معنى كده غني لازم ابيع الفانوس ب 130 جنيه وبس فاقوم رايح جايب جوده اقل عشان اكسب اكتر .. على فكره الكلام ده مش هيفهمه غير اللي عاش في دول مطبقه النظام ده .. يعني هنا ف السعوديه لو روحت لتاجر لقيت عنده فانوس عربيتي ب 200 ريال مثلا .. وبعد ما أشتريته لقيت واحد صاحبي بيقولي انا جبت نفس فانوس عربيتك ده ب 100 ريال .. فورا أقدم شكوى لوزارة التجاره ينزلوا يطربقوا المحل على دماغ صاحبه .. وساعتها هيقولوا تعالى هات فاتورة الشرا بتاعت الفانوس ده .. هيلاقوه جايبه من بره مثلا ب 70 ريال يبقى اخره يبيعه ب 110 ريال لما يبيعه كده ب 200 يبقى حرامي ويعملوله محضر ويدفعوه غرامه كبيره .. هو ده الكلام .. أنا بعد القرار ده لو روحت التوكيل لاقيته بيقولي فانوس الإسبرانزا برضه ب 275 جنيه يبقى لازم أبلغ ويشوفوا هوا جايبه بكام من بره .. وهل هو فعلا الأصلي ولا لأ .. الحكومه مش هتنتج لوحدها لو مافيش وعي شعبي .. وكل واحد يطالب بحقه ومايعملش زي تجار البطيخ مع البلقسي في فيلم سلام ياصاحبي .. لأ .. تروح تجيب الحكومه للتاجر ده وتقوله الحكومه مسعره البطيخه ب 2 جنيه والبلقسي اهو بيبيعها ب 5 جنيه .. كده نبقى دوله محترمه .. حكومه وشعب .. ايد لوحدها ماتسقفش.
على فكرة انتو فاهمين البيع والشراء غلط بمعنى انى تاجر الفاكهة او الخضار الخ بيزود 2 جنية او 1 جنية على البيعة احسب بقا نقل واكله وشربه وشوف هيطلعله كام هتلاقى مبلغ متوسط يعيشة اما بقى قطع الغيار اكيد بيزودوا على القطعة 50 و100 طيب نحل الموضوع دة ازاى نسيبنا من الاكل عشان الحكومة مش هتسيطر وانا شايف انى مكسبهم مستحق دة كفاية الشمس نركز بقا على المحلات فى اى مجال والتوكيلات يعنى انت مشترى الحاجة ب100 احسب كهرباء وضرائب والخ يبقى تتباع ب120 ا130 كدة انت مرضى والتاجر مرضى كمان انما تجيبها ب100 وتبيعه ب200 دة سرقة ويتعمل له غرامة وانذار بغلق المحل
يا باشا انا ليا واحد صاحبى عندهم ارض زراعية و شجر و كده عشان حضرتك بس بتقول ان التجار و البياعين مابيكسبوش بفترا.....كان مرة قالى يا عم دا انا عاوز ابور الأرض ...ليه يا عم؟ قالى البرتقال بيباع على ارض الجنينة ب .75 الى 1.25 الكيلو وشوف ولاد.............. بيبعوه فى السوق بكام ب 4 و 5 جنية!!!!!!.للعلم الكلام ده كان من سنتين يعنى فرق سعر فى الكيلو من 300 ال 400% يعنى استحالة النقل و مكسب الوكالة و التجار يبقى كل ده........ولا هو لازم تجار الوكالة يركبو شبح و يجيبوا شقق على البحر و الشعب يطلع عينو............وللعلم الكلام عن تجار الوكالة ده صح..........
حضرتك بتتكلم على بيض احنا عندنا كل حاجه غاليه وده لسبب التخلف المجتمعى اللى احنا عايشين فيه ولو سيبنا كل السلع الغذائيه مكانها ما اشترينهاش احنا اللى هنموت من الجوع لان ببساطه احنا كل حاجه عندنا بافترى مش حاجه واحده هى لو على سلعه واحده احنا كنا ولعنا فيها وما فكرناش فيها اصلآ ولكن لما تكون كل حاجه غاليه احنا اللى هنموت من الجوع مش التجار
صاحبك يا باشا ما نقلش الحوار كله لك صحيح .
صاحبك يبيع الكيلو جرام من أرض المرزعة مثلا ب 1 جنيه
يشتريه تاجر جملة من المزارع كله على بعضه بالجنيه (دي أول خطوة )
الخطوة التانية التاجر ينقله من المزرعة على عربيات نقل للسوق الكبير (سوق الجملة )
يبقى تاجر الجملة ده هايضيف على كل كيلو ... ربحه الشخصي + مصاريف النقل و التحميل .
نقول مثلا الراجل هايبيعه في سوق الجملة ب 2 جنيه
بعدين سوق الجملة بيوزع الحمولة على تجار جملة أصغر و يضيف مصاريف تحميل + هامش ربح
يعني الكيلو يوصل مثلا ل 3 جنيه .
بعدين تاجر الجملة الصغير (رقم 2 ) في السلسلة
يبيعه لتاجر التجزئة اللي هو كمان بيضيف ثمن النقل و التحميل و هامش ربحه
يعني في الأخر تلاقي ثمن الكيلو وصل ل 4 أو 5 جنيه
ليه ؟
علشان سلسلة التجار طويلة
طيب أيه الحل ؟
الحل أن المزارع يبيع على طول في السوق (و ده محتاج أمكانيات كبيرة ) للآسف بسبب أن المزارعين معندهومش أمكانيات التحميل و التوزيع نظرا على المزارع على قده بسبب صغر مساحات الأراضي و تركيزه على الزراعة .
ممكن يكون في حلول تانية تقلل حجم السلسة و بالتالي تقلل السعر شوية من الحكومة لأن هي اللي عندها الأمكانيات الأكبر و اللي ممكن تعمل كدا
و عايز أقولك على حاجة تانية
صاحبك ده بيقول أي كلام (بيخزي العين ) أو بيتكلم عن عدم معرفة باللي بيحصل فعليا .
لأن لو هو قادر يبيع على طول في السوق كان عمل الربح اللي بيعمله التاجرين اللي في النص .
حاجة كمان بتخلي المزارع يبيع السلعة لتاجر كبير
أنه بيبيع من قبل المحصول ما يطلع
يعني ا لتاجر الكبير بيشتري المحصول و هو لسة ما طلعش أصلا . (مخاطرة من التاجر بيكطسب من وراها كتير)
و قلة مخاطرة من المزارع و أيضا أحتياجه للمال للصرف على المحصول حتى نضجه .
المعلومات دي أعرفها من أقارب يملكون مزارع .
مع تحياتي
====
أفلحوا ان صدقوا
هي ليه الناس متخيله ان المفروض ان الحكومة تجيب للناس طلباتها وتوصلها لحد بيتهم والناس نايمة علي السرير لا يا باشا انت لازم تتعب الحكومه مش عارفة تلاقيها منين ولا منين والقرار ده اول خطوة صح في مشوار الالف ميل بمعني جس نبض للسوق وللتجار ومدي استجابة وتفاعل المستهلك مع القرار وزي ما الاستاذ وضح حوار الارجنتين وموضوع قطع الغيار في السعودية اقولك ان هنا في امريكا اهم حاجة عندهم هي السمعة وكسب الزبون اللي من وراهم المكسب لان لما محل بيطلع عليه سمعة وحشه الناس بتقاطعه فيعمل ناصح وينزل الاسعار برده بتفضل الناس مقطعاه حتي لو هيدي الحاجة ببلاش فيطر انه يقفل ويغير اسم او نشاط المحل الخلاصة لازم تفاعل الناس واتحادها مع قرار الحكومة لتطبيقه وايد وحدها متسقفش
مصر طاقات معطله بسبب حكومات فاشله واداره من العصر الحجرى اهم حاجه عندها شيخ القبيله
ولا هتتطبق على قطع غيار ولا حتى طماطم واهو كلام ببلاش
ياريت الكلام دة يكون قابل للتنفيذ من اصله
فين التطبيق ّ !
زي موضوع الخضار الي طبقه البائعين علي خضروات كانت رخصية وعلية
والخضروات الغالية منزلتش شئ ولم تمس