-
سؤال عن ابيزا 98
السلام عليكم ورحمة الله
انا معروض عليا دلوقتي عربيه ابيزا موديل 98 فابريكه دواخل باور وسنتر بس موتور 1400 مثبوت على الرخصه لمدة 3 شهور بس
لكن فيها مشكلتين .. المكنه بتعلى وتوطى لوحدها وصاحبها بيقول ان دي مشكلة control وانه سال عليه وسعره 250-350 جنيه .. تاتي حاجه الدبرياج بتاعها تقيل وقالي دي محتاجه سير ب 85 جنيه .
غير كده الغربيه حالتها كويسه والعفشه كويسه واساسها سليم وهو طالب فيها بعد كلام 29.500
ايه رأيكوا الاول في المشكله اللي فيها دي وهل هي فعلا بسيطه كده . ثم ايه رأيكوا في السعر ؟
والف شكر مقدماً ..
-
محمد ربنا يوفقك فى عربية كويسة
لو العربية تبع القاهرة
انا رأى تروح بيها لعصام الميكانيكى وهوا يشوفهالك ويقولك المفيد
لو مينفعش كلمه وخد رأية ( فى اسباب الاعطال دى )
- ورشة أصلاح وميكانيكا سيارات فولكس
اسم الميكانيكي : عصام
العنوان : شارع الأشول - اخر الهرم - محطة مشعل
التليفون : 01001739512
ومتنساش صلاة الاستخاااااااااااااارة
-
وعليكم السلام ورحمة الله وبركاته
في البداية أحب أرحب بيك في قسم سيات نايل موتورز
العربية الأبيزا 98 رينج السعر يبدأ من 28 إلي 35 وممكن اغلي علي حسب كل عربية
لكن الرينج الطبيعي من 28 - 35 زي ما قولت في البداية
سعر 29500 علي عربية باور وسنتر بس كويس نوعاً ما بشروط
1- حالة كاوتش وبطارية تمام
2- تابلوه وصالون وفرش ابواب تمام
3- حالة الصاج والأكصدامات والفوانيس تمام
لأن الباور والسنتر مايعتبروش كماليات اوي
العربية دي بتنزل 4 زجاج ومرايات كهرباء - سنتر وانذار ومفتاح بالريموت فبريكة - باور او تكييف في بعض الفئات - كراسي قطيفة و4 مساند رأس ونور في درج التابلوه والشنطة لبعض الفئات
وبالتالي فالعربية تعتبر فاضية واشك انه هو اللي مركب السنتر (ودي تعرفها لو السنتر لقيته كهربا مش هوا) وطبعا الباور جه مع المكنة اللي هو مسقطها
عرفت تنزلها معاه لحد ال28 - 28500 يبقي تمام التمام
تاني نقطة - الأر بي ام بيعلب او بيعلي ويوطي
اما بوابة عايزة تنظيف او تغيير
او فعلا كونترول وممكن تتظبط علي الكمبيوتر الأعطال وممكن لا ويحتاج لتغيير
او اسبراتير وحساس hall sensor عايز يتغير
جميع ما سبق مافيهوش اي مشكلة سوي البوابة سعرها ممكن يدخل في 450 ج
وبمنتهي السهولة هتحدد العيب لو كشفت عليها كمبيوتر
اما هيقولك throttle body ودي بوابة (450)
او هيقولك Hall sensor ودي اسبراتير (250 - 300)
او مش هيقول حاجة ودي اما نظافة بوابة او ريسيت لكمبيوتر العربية هتحل مشكلتك
الدبرياج تقيل بردو حاجة من 3
1- الواير ودة فعلا ثمنه من 85 - 90 للعادي او 180 للadjustable او بيسموه الأوتوماتيكي اللي بيظبط نفسه
2- ممكن البلية ودي تكبر دماغك وتتأقلم معاها وكمان هيصاحبها صوت نعرة تروح لو دوست دبرياج
3- الديسك ودي كمان تسبب رجة في الطلعة
واخيراً أحب اقولك ان الابيزا دبرياجها اساسا تقيل ودة الdefault بتاعها وتحسه تقيل لو نازل من هيونداي او ياباني
تحياتي ليك وربنا يوفقك ان شاء الله
يمكنكم متابعة اهم الموضوعات من خلال صفحة القسم علي الفيس بوك
http://www.facebook.com/SeatNileMotors
-
الناس طبعنا قالت كل حاجه بالتمام
بس تاكيدأً المشاكل الى قلت عليها سواء فى البوابة او الكنترول بسيطه وكذلك الدبرياج
الكنترول ب 400ج الى 500ج
الوابة 300ج
أهتم بحالة العربيه الداخليه والاساسيات اما مشاكل الماتور بسيطة وكذلك العفشه وكله من السعر
بالتوفيق ومبروك مقدماً
Content Relevant URLs by
vBSEO 3.6.0 PL2