الواد كان عايز بقشيش ( تيبس )

**janagabr** · 28-09-2013 12:14 PM

المؤشر الدولي للفساد : وهو اساءة الشعب لاستغلال الوظيفة من اجل المصلحة الشخصية
وهو طريقة تعامل الشعب مع الازمات هل يتم حل الازمة بالطرق التطوعية والخيرية ام يتم ادارتها بالطرق الاحتكارية للمنتجات ( طبعا احنا ناس معروفة بان رزقها بيزيد في التعامل مع الازمات )
ويعرف ايضا بمدي تقبل المجتمع لما ما يسمي بالبقشيش ( الاكرامية - الشاى - الاصطباحة ) وهو وجه خفي للرشوة حيث انه يزيد قابليه الشخص للحصول علي المال اللازم من دون تعب او بدون عمل او بالتحايل وبالتالي تصبح ظاهرة طبيعية لدي الاجيال الصغيرة التي تتقبل هذة الظاهرة
وظاهرة الرشوة ظاهرة لا تعترف بالحدود ولا بالسياسة ولا بالجغرفيا وهي توجد في الدول الغنية كما توجد في الدول الفقيرة ولكن يمكن تعرفيها علي مدي تفشيها في اوساط الشعب
ويمكن تلخيصها في مدي تقبل الشخص للحصول علي المال بدون وجه حق ومدي رفضها في اوساط المجتمع من نبذها ام اطلاق مصطلحات لجعلها مقبولة
انت هاتقولي هههههههه انا حاسس ان الموضوع ده بيجيب في سيرتنا
نبدا بترتيب الدول حسب الدول الاقل فسادا :
١- الدنمارك ٢- نيوزيلاندا ٣- السويد سنغافورة فنلندا سويسرا ايسلندا هولاندا استراليا كندا لوكسمبرج النمسا. هونج كونج المانيا النرويخ المملكة المتحدة بالجيكا اليابان امريكا تشيلي فرنسا اوروجواي سلوفينيا استونيا قطر اسبانيا قبرص اسرائيل. الامارات تايوان كوريا الجنوبية عمان البحرين الاردن ماليزيا ايطاليا اليونان بولندا تركيا الكويت جورجيا غانا. كولومبيا رومانيا بلغاريا الصين. مقدونيا المكسيك بيرو ترينداد وتوباجو البرازيل ٨٠- بوركينا فاسو ( احابيبتي يا فاسو ) المغرب تايلاند الهند السنغال
٩٢- الجزائر ٩٦- مالي ١٠٢- لبنان. ١١٥- مصر ١٢٦- ليبيا ١٤١- ايران ١٤٧- سوريا ١٧٣- السودان ١٧٨- العراق. واخيرا ١٨٠- الصومال
احبيبتي يا مصر
شعب متدين بطبعه
احلي من الشرف مافيش
لو لم اكن مصريا لوددت ان اكون بوركينيا
طول عمرنا اصحاب مراكز
نسال الله ان يصلح حال شعب مصر
وان يرزقنا الحلال والامن والاستقرار
وان يجعل باسنا علي اعداءنا وليس فيما بيننا
وان يطهر الاسلام ممن اضروه وادعوا انتمائهم اليه وان يفضح سترهم
حفظ الله مصر شعبا وجيشا وشرطة

**Mohamed_Hamid** · 28-09-2013 12:26 PM

على كدة احنا من أفسد شعوب الأرض

الجميل ان كل الناس تطلع فى التليفزيون او على القهاوى تتكلم فى اى موضوع سواء فى السياسة او المشاكل الاجتماعية او اى حاجة وتلاقى يقولك: مش هو ده الاسلام. الاسلام بيقول كذا وكذا.... تحس ان الشعب كله ماسك سبح ههههههههه اومال مين بقى اللى وحش؟! بيفكرونى بجملة توفيق الدقن: لما كل الناس عايزة تضرب اومال مين اللى هينضرب؟! اهو الصح بتاعها دلوقت: لما كل الناس عاملة عارفين الدين. اومال مين اللى مش عارف ربنا؟! الكفار؟! الكفار بما فيهم عبدة الأشجار والأحجار احسن مننا فى كل مكان وسبقونا فى كل شئ بدءا من الاحترام والآدمية ورقى السلوكيات وصولا الى أعلى مراحل العلم والتكنولوجيا

أحب أختم بأحسن جملة مخلوطة بالحشيش يحبها جميع المصريون: شعب متدبن بطبعه

**rotanamasoud** · 28-09-2013 12:37 PM

يعنى مصر اخده المركز 122 فى جوده الطرق وال115 فى الرشاوى ممتاز
اغرب حاجه ممكن تتخيلها بجد لو عملو ازكى دوله فى العالم كشعب ممكن تطلع مصر بس للاسف كل الزكاء موجهه للفهلوه والنصب

**lidosasa** · 28-09-2013 01:37 PM

المشاركة الأصلية كتبت بواسطة rotanamasoud

يعنى مصر اخده المركز 122 فى جوده الطرق وال115 فى الرشاوى ممتاز
اغرب حاجه ممكن تتخيلها بجد لو عملو ازكى دوله فى العالم كشعب ممكن تطلع مصر بس للاسف كل الزكاء موجهه للفهلوه والنصب

ومتنساش التعليم أخدنا المركز 139 على مستوى العالم

**hugan** · 28-09-2013 01:52 PM

طول عمرنا متفوقين
حتي اسمعوا اغنيه المصريين اهما

**طارق _عبد السلام** · 28-09-2013 03:54 PM

العيب فينا (لو الكل بدأ بنفسه وببيته سيتغير حالنا )

الاسلام يأمرنا بالالتزام .. واتقان العمل ..ورفع الاذى.. وحب لاخيك ماتحب لنفسك ..وابتسامتك فى وجه اخيك صدقه... وكلكم راع وكل راع مسئول عن رعيته..ويأمرنا بعدم الاعتداء على حق الغير..وحق الطريق...وان العمل عباده ...والنظافه..وكثير جدا من القيم

ولكن .. رحم الله الشيخ عندما ذهب للعلاج فى اوروبا وقال وجدت اسلام بلا مسلمين.. ولكن عندنا للاسف مسلمين بلا اسلام الا من رحم ربى...

ان الله لايغير مابقوم حتى يغيروا ما بأنفسهم

.

**Y a r i s** · 28-09-2013 04:42 PM

موضوع جميل
وقبل ما اعلق. لازم اقول قبل ماحد يفهم كلامي غلط ان الشعوب عبارة عن بيبي او طفل صغير والحكومات هيا الي بتوجهها ... انا كنت عمال بفكر ايه الخلل الي في مصر بالذات وانا سايق. النهرده الصبح. ... وشايف كمية اغبية ومتخلفين وماشين ولا على بالهم ، لقيت ان الموضوع مش موضوع غباء لكن اكتشفت ان مصريين كتير يفتقروا لثقافات كتير. من اول ثقافت الاستماع للاخر وتقبل فكر الاخر. لغايت او وصولاً لثقافة ارفع القعدة وشد السفون هههههه. .

تصور ان في ناس لغايت دلوقتي مش فاهمه الف باء الحياة. ومش فاهمين حتى اداب الاستجمار او النظافه. الشخصية الخ الخ الخ .
المهم. قعدت افكر ياترى العيب منين ... معقوله. هنفضل عايشين في مجتمع. الف باء الثقافة. مش عارفها ... حتى لو كنا درسنا برة مصر ... وحتى لو خدنا كمية كورسات ودبولمات لتطوير من مهارات الفرد والتنمية البشرية الخ الخ الخ ... وحتى لو كنت عبقري زمانك فانتا بطريقة او باخرى بتتحول لكائن غبي لانك في وسط. اغبياء ... والمثل. بيقول ( من عاشر القوم اربعين يوماً ) ... فما بالك. انك عايش في وسط. ناس اخر ثقافة اتعلموها هيا ثقافة ادي زوبة زقه ... وثقافة الي يتجوز امي اقولوا. يا خالتي . وعايشين في البالوظة !

مش بس كدددده انتا تعاله شوف برنامج زي عرب اوف تالنت ... مواهب العرب الي بيتزاع على mbc هتلاقي المصريين. الي طالع يغني والي طالع يمثل ( وكان مواهب المصريين كلها اقتصرت على التمثيل والرقص والغنى !!) والموهب فيهم طالع ساحب جموسة على المسرح وبيقولها قصيدة شعر وحاجة تيكسسسف !!

بلاحظ ايضاً ان الابتكار. او روح الابتكار روح الابداع. انعدم عند المصريين والكل بيقلد الكل وخلاص. تقليد اعمي ... حتى اقولك حتى الفساد هو مجرد تقليد ... انتا الان. بيغيظك جداً واحد معملش حاجة وعاوز تيبس اورشوة ... مع انو معملششششششش حاجة ... طيب اعملي حاجة وخود الرشووة الي انتا عاوزها يا ابني. ... تبص تلاقي واقف قدامك زي الحمار وماددلك ايدو عاوز رشوة وخلاص وكل سنة وانتا طيب ... فهو هنا بيقلد. الي بيشوفوا وخلاص .... انتا ممكن تشوف واحد ماشيلك في شارع عمومي عكس السير. مع ان الفتحة قداموا والدنيا واسعه وسالكه ... هو ذات نفسوا اكيد مش فاهم ليه ماشي عكس. ولكنوا انسان عبارة عن تيس او قرد او شامبانزي. شاف واحد متشي عكس فحب يقلدوا وخلاص ...

الفكر الابتكاري. ماااات انعدم ... حتى الافلام. افلامنا كلها عبارة عن افلام اجنبي. بنقلدها وخلاص. ... الاغاني تالت تربع الاحان مسروقه. والكلمات مكررة ... برنامج زي برنامج باسم يوسف. تصور ان نوسخه طبقاً للاصل من برنامج امريكي. نفس الحركات. نفس الافيهات نفس طريقة فريق العمل والاعداد نفس الديكورات وكلو. كلو كلو حتى الحركات بيقلدها تيبكل ( وطالع لنا على اساس انو انسان كوميدي ومبتكر ) فين الابتكار. في. البرنامج نفسي افهم .

الفساد ياجماعه مش بس في الفلوس يا جماعه. ... لكن الفساد يبدء. من فساد الافكار ... ولعندما تفسد الافكار تفسد النفوس وعندما تفسد النفوس. تفسد الفلوس وتنهار الامم ..

الانسان المصري انسان. غير مبتكر قليل الحيلة ... حتى لو عربية وقفت قداموا تبص تلاقيه ضرب لخمه ووقف وراه مش عارف حتى ازاي يطلع من العربية الي قداموا ويعطل الدنيا بحالها ... ماهو ده برضوا نوع من الفساد ... ( فساد فساد فساد) الا ان فسدت كل الحياة وعيشتنا بقت هباب وزي ما قلت انا نفسي بقيت اتحول من انسان واعي ومثقف لانسان فاااااااااسد ومش بس كده انا بقيت الاحظ اني بقيت كتيرررر برتكب حمقات. لا ومرات بلاقي نفسي بقيت انسان غبي وحمار كمان في كتير من تصرفاتي.

ومش قادر اسيطر على منسوب الغباء عندي والحمورية بس اعمل ايه مطر ادني من مستوايا الفكري علشان اعرف اتعامل مع الي حولية ... مطر اتكلم باسلوب سووقي وبلغت الشوارع والناس الصايعه علشان اقدر اتكلم مع نوعية البني ادمين الي حولينا ...

حل الفساد مش في التعليم ... لكن حل الفساد يبدء من اول الوعي. والاعتراف بالخطء وتحمل المسؤولية. واحقاق العدل في المجتمع وتصحيح القوانين ... وتسهيلها انا ليه اعقد القوانين. واسيب فرصة للفاسدين استغلال ظروف الناس وحاجتهم طب ما اسهلها للناس علشان ربنا يسهلها عليا ... فيها ايه مثلاً لو نزلت مادة في المدارس. اسمها تدبير منزلي للرجال في ايه لمن نعلم الاطفال في الثانوية. اداب وقواعد المرور. حتى لو مكنش عندهم عربيات او بيعرفوا يسوقوا ... فيها ايه لمن نعلم اطفالنا مهرات وفنون التفاوض الفعال. ومهارات خدمت العملاء. ومهرات البيع والتسويق ومهرات وفنون الاتيكيت. ومهرات وفنون الاستماع. للاخر ومهارت تقبل الاخر ومهارت وثقافت ازاي تعيش علشان غيرك ومتئزيش غيرك وتكف شرك عن غيرك كل دي علوووم وممكن تدرس ... اما مش تدرسلي العيال جبر واحصى. وكيمية وفيزية وشوية كلام فارغ مش كل الناس هتستفيد بيهم ... وتحياتي ( واسف على الاطالة )

**hugan** · 28-09-2013 07:26 PM

المشاركة الأصلية كتبت بواسطة mohamed_hamid

هحكيلكم قصة حقيقية قرأتها قبل كدة عن جاسوس أمريكى فى فترة الحرب الباردة. الجاسوس ده كان بيشغل منصب رفيع فى وزارة المالية السوفيتية... الkgb (المخابرات السوفيتية) كان عندهم شك الى درجة اليقين ان الراجل ده جاسوس (طبعا كان سوفيتى يعنى ابن بلدهم ) بس مش قادرين يمسكوا عليه اى دليل نهائيا لكن هم متأكدين ان وراه حاجة وبيتعامل مع أمريكا. ولما طفح بيهم الكيل قررت المخابرات السوفيتية اعتقاله وأخبروه أنهم متأكدين أنه عميل أمريكى لكن مش قادرين يمسكوا عليه دليل وأنهم هيسيبوه وقدموا له تعهدات كافية انهم مش هيحاكموه او يأذوه مقابل انه يعترف فعلا بأنه عميل أمريكى ويعرفهم طبيعة مهمته وازاى نفذها بدون ما يقدروا يمسكوا عليه حاجة. ولما الراجل اطمن فعلا من قوة وقانونية تعهداتهم ومحدش هيعرف يعمل له حاجة منهم. قاللهم : مهمتى كانت باختصار شديد هى: نشر الفساد. كان بيشتغل بجد واجتهاد فى بداية حياته لغاية لما وصل لمناصب عليا. وفى مرحلة معينة بدأ يجيب ناس فاسدين تحت منه يمسكهم مناصب ويمشى الناس الكويسة المخلصة. واستمر على كدة سنين كثيرة ومع كل ترقية او تطور ليه كان بيجيب مجموعة من الفاسدين معاه مقابل استهداف وتطفيش النماذج المخلصة لغاية لما نشر امبراطورية للفساد فى الوزارة بتاعته. بس هو ده كان دوره ! يعنى لا كان بينقل اسرار عسكرية ولا غيره. هى دى كانت مهمته . نشر الفساد والقضاء على أى نموذج مخلص. طبعا اكيد كان فى زيه كثير فى ياقى الوزارات. طبعا سنين قليلة وانهار الاتحاد السوفيتى وكان أحد أسباب الانهيار هو استشراء الفساد بشكل مرعب فى كل مفاصل الدولة السوفيتية.
ممكن طبعا تستخدموا القياس مع حكامنا وحكوماتنا ومجالس الحى والجامعات والهيئات العلمية والمؤسسات فى مصر.
انا مش قصدى ارمى موضوع الفساد فى مصر على امريكا واسرائيل.ممكن يكون ليهم ايد وده اكيد. لكن عايز اقول ان الفساد سرطان ومفيش فاسد بيسيب تحت منه واحد كويس ابدا. لازم يخلعه بأى شكل او يضمه ليه.واحنا العامل الفاعل فى انتشار الفساد لأن الشعب اساسا عنده قابلية عالية للتعايش مع الفساد.

الروايه فعلا حقيقيه
وكان السبب الرئيسي لانهيار الاتحاد السوفيتي وتفككه
وللعلم كنا صوره طبق الاصل وقت مبارك
مبارك اي مسؤل كان يثبت نجاحه في مكانه يتم خلعه وبسرعه رهيبه
اي مسؤل تنتشر حوله اقاويل بالفساد والرشوه
يتم تثبيته في مكانه او ترقيته لمنصب اعلي
وقامت الثوره وقلنا البلد ها ينصلح حالها
لكن للاسف كله رجع علي قديمه

-

الموضوع: الواد كان عايز بقشيش ( تيبس )

LinkBack

أدوات الموضوع

عرض

-

-

-

-

-

-

-

المواضيع المتشابهه

اما ادي لعامل البنزينة بقشيش يا اما يشتمني؟؟؟؟؟؟؟؟؟

كفااااااااااااايه بقشيش للى بيمونوا

عمري ماسوقت اوتو, بس مضطر - أي تيبس؟

سيارة مناسبة أوتوماتيك لشخص معاق عنده تيبس في عظام المفاصل

بتدفع بقشيش في التوكيل؟؟؟

الكلمات الدلالية لهذا الموضوع

المفضلات

المفضلات

ضوابط المشاركة