الموضوع: عايز أسافر تركيا أعيش هناك .. حد يفيدني ؟

طبعا أولا أشكر كل الإخوة الكرام المحترمين على المشاركة الفعالة في الموضوع ده
بخصوص اقتراحات كثير من الإخوة للسفر إلى ماليزيا أو سنغافورة فده اقتراح كويس برده هفكر فيه خاصة سنغافورة اللي الشقيري في خواطر اتكلم عنها كتير وعمل حلقات هناك وازاي بيحترموا النظام والقوانين وازاي معدل النمو بتاعها مرتفع برده لكن هحاول أقرأ عنها الأول كويس وأشوف مين أفضل تركيا ولا هي من كافة الجوانب
بخصوص الإخوة اللي سألوا عن طبيعة عملي فأنا بشتغل Freelancer Web Designer & e-marketer وشغلي تقريبا كله عن طريق النت يعني الحمد لله أقدر أشتغل من أي حتة في العالم طالما عندي جهاز كمبيوتر وخط إنترنت بس مفيش مانع طبعا من البحث عن فرصة عمل في أحد الشركات لو المرتب مجزي ومغري أو لو كانت دي هي الطريقة الوحيدة مثلا للحصول على تأشيرة عمل لأن طبعا موضوع السياحة وكسر الفيزا ده مش هينفع احنا بندور على حياة كريمة نحترم فيها القوانين فمينفعش أول حاجة نعملها هي كسر القوانين !! فالغاية لا تبرر الوسيلة
أما بخصوص الإخوة اللي اقترحوا دولة عربية برده زي السعودية أو الإمارات فأنا ما زلت عند رأيي إن صورة المصريين بشكل عام مشوهة عند إخوانا العرب والخلايجة بالذات لأن السيئة تعم وهيبقى موضوع صعب جدا إني أحاول أثبت إني مش زي المصريين اللي انتوا واخدين عنهم انطباع سيء زائد إن المعيشة في الدول دي أظنها مكلفة جدا عن مثلها في تركيا أو سنغافورة زي ما بسمع في حين يقال إن السفر إلى تركيا للسياحة أرخص من السفر إلى الأقصر ! مما يدل على أن المعيشة سهلة وغير معقدة ، لكن على كل حال فهو اقتراح برده جدير بالتفكير وأنا ليا صديق بيشتغل دلوقتي في قطر وعرض عليا المساعدة لو حبيت أسافر هناك فهيبقى ده اقتراح جدير بإعادة النظر فيه برده
أخيرا بخصوص الأخ الكريم اللي بيقول إن السفر لبلاد الكفر الآن يعتبر من الضرورات فأنا فكرت في كده برده وقلت على الأقل عندهم إسلام بلا مسلمين واحنا عندنا مسلمين بلا إسلام ! لكن أرجع وأقول دع ما يريبك إلى ما لا يريبك والمشكلة في البلاد دي إن الحريات عندهم مفتوحة بلا أي قيود لدرجة إن الزنا والشذوذ والخمرة والكلام ده كله عادي جدا عندهم ويبقى أنا كده هدمت أولادي بدل ما أصلحهم ويا فرحتي إنهم يطلعوا محترمين ومنفتحين ولكن اعتادوا مشاهدة الزنا والشذوذ وشرب الخمر والقمار إلى آخره بدون أي إنكار ودي الكارثة بعينها

أرجو استكمال النقاش لأنه على ما يبدو يوجد كتير من الإخوة بيفكروا نفس تفكيري وعايزين نوصل لحل مرضي يفيد الجميع