الموضوع: صلاة النساء للتروايح في المسجد في الميزان

صباح الخير ...
صلاة التراويح بتيقى اجمل كتير مع مجموعة و ذهاب البنات الى المساجد في حد ذاتها
حاجة كويسة ...المشكلة بقه في السلوك اللي قولتي عليه..و ديه مش من البنات بس ..
من الاتنين ...كمثل.اللي بيطلع يدخن سيجارة بعد اول اربع ركعات ..!و يرجع يتمضمض
و يكمل ..
حتى تحولها - الصلاة- لمتعة شخصية ..فالشباب برضه نفس الحكاية ..و العيال الصغيرة ممكن يكونوا مع ابوهم :)
اما بقه الحديث عن افضلية صلاة المرأة في بيتها فأكيد عارفة حديث لاتمنعوا إماء الله مساجد الله...
السؤال بقه لو مفيش الكلام ده كله و مكان السيدات واسع و مفيش زحمة
ولا عيال صغيرة و حق البيت مكفول و كله تمام ..
صلاة البيت لسه افضل ....صح ؟

فكرتونى من كام سنة بأحد اقاربى، وهو رجل احسبه عند الله من الأتقياء، فى تجمع عائلى رمضانى توجه بالكلام الى احدى قريباتى، وهى سيدة صغيرة السن غير محجبة تعمل فى مجال السياحة،والتزامها الدينى اقل من المتوسط، لكنها تأتى فى كل رمضان وتغطى نصف شعرها وتمتنع عن وضع المساحيق وتذهب لصلاه التراويح فى احد المساجد، المهم ان قريبى ده سألها :" هاه الموضة السنة دى جامع ايه؟" فنظرت له مستنكرة وقالت له:"موضة....ايه موضة دى؟" فقال لها، مانتم كل سنة ليكم موضة، ياللا يا بنات السنادى جامع الحصرى فى ستة اكتوبر، الامام اللى هناك صوته رهيييييييييييييييييييب، السنة اللى بعدها، ياللا جامع النور يا بنات ، اصل الجو بتاعه حكاية"، فتزايد استنكار قريبتى وقالت له، ايه اللى انت بتقوله ده، خلاص عملت العبادة موضة، فقال لها: اصلها لو عبادة بجد كنا التزمنا بقدر منها طول السنة، لكن المسألة مجرد اننا بنعيش فى المود وخلاص، قمر الدين وفوازير ومسلسلات وخيام رمضانية والتراويح فى جامع كذا والسحور فى دار الدفاع ، ثم كرر عليها احاديث افضلية صلاه المرأة فى بيتها ، وانتهى الحوار عند هذة النقطة

فهى فعلا موضة مش اكتر

سبحان الله ... موضوعين في الصفحة الرئيسة بنفس المضمون - سلبيات المصلين في صلاة التراويح - أكيد في بعض الناس ليهم تصرفات غير سوية .
بس أنا عايز أوصل رسالة للجميع بلاش ننقد الناس واحنا في دنيا تانية . يعني أنا من يومين كنت عند السمكري وكان في مسجد جنب الورشة بيصلي التروايح والمسجد مليان كله والناس بتصلي بره الجامع من الزحام ... يقوم السمكري يقولي " شوفت الناس دي واخدين الصلاة موضة بس في رمضان بس . أنا جنب الجامع ده وعايز أقول لك إن الجامع ده في غير رمضان هم صفين بس اللي بيكونوا فيه " وطبعاً الباشا أصلاً ما صلاش العشاء .
الحكاية إنه عايز ينتقد الناس اللي بتصلي علشان شايفهم أحسن منه أو بيعملوا اللي هو ما بيعملهوش فعلشان كده الحاجة الوحيدة اللي في ايده انه يطلع فيهم القطط الفاطسه

دي نصيحة للجميع علشان ما يتحولش الموضع لنقد للحدث نفسه

طبعاً مش معنى كده إنه ما يكنش عندنا نقد ذاتي . لا طبعاً لازم يكون عندنا نقد ذاتي واللي يشوف حد محتاج نصيحه لازم ينصحه وده أمر النبي - صلى الله عليه وسلم - لينا لما قال " الدين نصيحة "
بس يكون النقد على قد الغلط - يعني مش موضوعين في الصفحة الرئيسة - ولا يترتب على النقد ده منكر أكبر منه.
يعني لو أنا عارف إن أختي لو ما صلتش التروايح في المسجد مش ها تصليها أصلاً ... وها تقعد على الأفلام والمسلسلات ويضيع منها ثواب قيام رمضان يبقى أكيد ما ينفعش أجي أقول لها صل في البيت أحسن لك

أنا متفق معاكي فى بعض اللى قولتيه لكن ما نقدرش ننكر حديث الرسول عليه الصلاة والسلام
"لا تمنعوا اماء الله مساجد الله"
لكن من مزايا ذهاب الستات أو الرجال للمساجد هو أنه الصلاة فى جماعة ثوابها اكبر من صلاة الفرد وطبعا المفروض ان الناس تحاول تستزيد من الخير وخصوصا فى هذه الايام المباركة ده غيرانه ممكن أثناء سماع القرآن او الخطبة القصيرة التى بين الصلاة تحدث الهداية والاقتراب اكثر من الله عز وجل نتيجة التركيز والخشوع

أرسل أصلا بواسطة qa_sa

الحكاية إنه عايز ينتقد الناس اللي بتصلي علشان شايفهم أحسن منه أو بيعملوا اللي هو ما بيعملهوش فعلشان كده الحاجة الوحيدة اللي في ايده انه يطلع فيهم القطط الفاطسه

دي نصيحة للجميع علشان ما يتحولش الموضع لنقد للحدث نفسه

إِنَّمَا يَعْمُرُ مَسَاجِدَ اللّهِ مَنْ آمَنَ بِاللّهِ وَالْيَوْمِ الآخِرِ وَأَقَامَ الصَّلاَةَ وَآتَى الزَّكَاةَ وَلَمْ يَخْشَ إِلاَّ اللّهَ فَعَسَى أُوْلَـئِكَ أَن يَكُونُواْ مِنَ الْمُهْتَدِينَ


المساجد كلها بيوت الله وعشان الموضوع مينفعش نقول عليه موضه لان بيت الله الحرام بيكون اكثر تكدس وازدحام بالمصليين فى رمضان واللى راح عمره اخر رمضان شاف انه زحام شديد واحيانا مفيش مكان عشان تصلى لازم تقعد تحجز مكان من قبل المغرب عشان تعرف تصلى التراويح يعنى الزحام اللى فى مساجدنا مش لانه موضه هنا ولا شى جديد مبتدع لان الناس مدركه اهميه الشهر العظيم وثوابه الكبير فالكل حابب انه يغتنم اكثر فى رمضان من الحسنات والثواب وفضل صلاه الجماعه كفايه انك بكل خطوه تخطوها للمسجد تحط عنك سيئه من سيائتك

والمفروض احنا نشجع الناس تروح للمساجد والبنات اللى فى سن من 20 : 30 لو راحوا للمسجد افضل من انهم يتجمعوا عشان يروحوا لخيمه رمضانيه وجلست للشيشه والطاوله

الانتقاد يكون لسلوكيات المصليين وبعض التصرفات التى لا تليق بتواجدهم فى بيت الله من الرغى والاصوات المرتفعه وخلافه ده محدش يختلف عليه فانه خطاء
لكن تواجد النساء فى المساجد مش حرام