تعالوا نتكلم بالبلدي
من ساعت ما عملت اكونت علي الفيس من عام 2005 ماكنش حد يعرف اصلا ايه الفيس بوك ده ده اكلة جديدة ولا نوع عربية ايام الواحد لما يبقي عنده 100 فريند يبقي واد عفريت عشان مكنش حد لسه عرف الفيس
كنت تكتب اسم حد او ايمل حد وتعمل سيرش كان يظهرلك بتاع 10 او 20 واحد بالكتير وكان قليل لما تلاقي صورة متفركة ولا حكاية مضروبة وكان ساعتها الفيس حلو ولذيذ وابن ناس الصراحة يا جماعة الواحد افتكر عن طريقة اصحاب المدرسة والمنطقة والجامعة وفجاة النور قطع والدنيا ضلمت
ولاقيت كمية فيديوهات مضروبة وصور متركبة وفضايح بنات الاول كانت عن المغنيين والفنانين ولعيبه الكورة
الي ان دخلنا في السياسة واصبحت في حرب تدار عن طريق الفيس واحنا الادوات بس مش عارفين وظهرت اشاعات عايزة تدمر البلد ونشر ايات قرانية واحاديث محرفة وتلاقي شوية صيع عاملين فيديوهات تحت السلم واللي ضارب بانجو وعملي فيها عيل ثورجي ,,,,,
وجت فترة حكم مرسي دخلنا في مرحلة من الخلاف العنيف بين مؤيد ومعارض بين الناس وبعضها وبين الناس وقرايبها واصحابها والناس قعدت تشتم بعض واللي يخسر قريبه واللي يضرب صاحبه واللي يكفر جاره وما الي اخره من السلوكيات المنحطة اللي في الاخر مش هتضر غيرنا احنا واللي هتؤدي الي قطيعه صلة الرحم وهناك حديث عن رسول الله صلي الله عليه وسلم ينبهنا الي ضرورة المحافظة علي القرايب (مَنْ سَرَّهُ أَنْ يُبْسَطَ لَهُ فِي رِزْقِهِ أَوْ يُنْسَأَ لَهُ فِي أَثَرِهِ فَلْيَصِلْ رَحِمَه )صدقت يا رسول الله
ودلوقتي ظهرت دعوات بس قليلة لعدم تشيير اي حاجة ليها علاقة بالسياسة او الدين عشان تخفف وتقلل من المشاكل اللي بتحصل بين الناس
وفي ناس كتيه بقت تقفل الفيس واللي بطل يخش غير كل اسبوع مرة
والحمد لله انا قفلت الفيس خالص ومسحت كل الصور اللي مشيرها ومسحت كل الاصحاب علي الفيس والكلام ده تقريبا من 8 شهور
واستبدلت الفيس بالمنتدي العربيات ده نايل موتورز قولت اهو ومنكم نستفيد ونفيد ونتعلملنا صنعة تفيدنا وبالمرة نصلح عربيتنا ببلاش هههههههه
وتجنبت الدخول الي احوال الشارع المصري عشان المشاكل والحمد لله اعتقد انه لا توجد لي خلافات شخصية او عداوة مع حد
ودلوقتي انا عايش في تبات ونبات وهجيب صبيات وهجيب بنات
المفضلات