الموضوع: ممكن افهم ليه اشتراك النادي بيوصل ل 100 الف و150 الف

المشاركة الأصلية كتبت بواسطة samyyousef

سبب غلو الاشتراك هو تكدس تلك النوادي مع زيادة طلب العضوية فيجب الحد منها حتى يستطيع النادي ان يلبي احتياجات الاعضاء
فالمشكلة ليست في سبب ارتفاع مبلغ الاشتراك..لكن المشكلة ان بعض هؤلاء الاعضاء ينسى او يتناسى انه اشترك ب500 جنيه

انا مشترك فى نادى الصيد من اواخر الثمانيانات ايام ما كان الاشتراك ب 3 الاف جنية تقريبا على ما اذكر

هتقولى دة مبلغ تافة جدا

هقول لحضرتك ايامها ال 3 الاف جنية كان مبلغ محترم يشترى عربية ساعتها

فهمت الفرق؟

و كمان مستوي الخدمات بيفرق جدا...... و كمان مستوي المكان داخل النادي
النادي الغالي لازم لازم تلاقي المكان نضيف و كمان الخضرة في كل مكان و معمولة صح......
أما النادي ذو اﻹشتراك الرخيص مش حتلاقي الكلام ده و لو لاقيته مرة مش حتلاقيه تاني مرة و لا تالت مرة..... و غالبا اﻹهمال بيلعب لعبته بجدارة أما في النادي الغالي فنسبة اﻹهمال حتكون قليلة جدا
كمان مستوي التمرينات و الفرق الرياضية بيكون مختلف.....صحيح فيه إختلافات في الموهبة الشخصية و ساعات بتلاقي مواهب في اﻷندية ذات اﻹشتراك الرخيص بس صدقني مش بتكمل و قلة اﻹمكانيات بتقتلها في مهدها يا إما اﻷندية الكبيرة بتاخدها علي طول و تنتشلها و ترعاها
ده باﻹضافة إنك تلاقي مكان للأولاد علشان يمارسوا الرياضة و يشتركوا في فريق و اﻹلتزام بالتمرينات..... دي لوحدها تسوي كتير...إن الطفل يلاقي مجال و إلتزام يخرج فيه طاقته و موهبته..... و ده حيبعده عن حاجات كتير وحشة و كلنا عارفينها

حكاية التذاكر دي مش مضمونة علي طول.... ممكن في أي لحظة يطلع قرار بأن تكون التذاكر بصحبة أحد أعضاء النادي فقط.... أو تلاقي سعر التذكرة تضاعف.....
سعر التذكرة في نادي سموحة وصل 60 جنية دلوقتي و للفرد فقط مش للعيلة يا معلم
و فيه دفتر ب 10 تذاكر ب 300 ج ... يعني التذكرة ب 30 ج بس برده للفرد..... و اﻷسعار دي بتنط علي طول

بصراحة اللي يعرف يخلص في نادي كويس ما ينتظرش و يخلص علي طول لان اﻷسعار بتطير علي طول.....
كمان ما تنساش إن عضوية النادي صحيح غالية بس تعتبر بتورثها لأبنائك و أحفادك ..... فمهما دفعت دلوقتي مش حيساوي حاجة قصاد توريث العضوية لأبنائك و أحفادك.... ده طبعا لو معاك قيمة اﻹشتراك
و ربنا يوسع لنا جميعا من فضله في أرزاقنا و يبارك لنا في أولادنا يا رب
قولوا أأأأ مييييييين

واضح من ردود الاعضاء ان فيه ناس عندها خبرة كويسة عن النوادي بنسبة كبيرة

هل ممكن نعرف متوسط اعضاء كل نادي تقريباً كام فرد او كام اسرة؟

ومساحة كل نادي تقريباً كام فدان؟ ومكوناته من مباني وصالات رياضية او اجتماعية وحمامات سباحة ومطاعم وكفيهات وغيره.

وايه هي الانشطة والرياضات المتاحة في كل نادي وهل الاشتراك في اي نشاط بيكون مجاني للاطفال مثلا لو عايز يلعب كورة او تنس او سباحة او اي رياضة اخري او للكبار للاشتراك في الجيم او سباحة او غيره؟

ياريت كل ماحدش يبخل علينا بالمعلومة من اعضاء النوادي او من غير الاعضاء

وللجميع جزيل الشكر والتقدير