الموضوع: ممكن افهم ليه اشتراك النادي بيوصل ل 100 الف و150 الف

في مصر دلوقتي .. ما فيش اي ارتباط بين المال الوفير .. و اخلاق الفرد او اصله او تعليمه ! .. و الاماكن اللي بتحاول تبقى كلاس بتعتمد في الاساس على المقابلات الشخصية و التحري و دعم اعضاء قدامى مع الشرط المادي بالطبع .. اما حكاية الاشتراكات العالية للنوادي .. فمع كل الاحترام .. اراه نوع من النصب .. لان النادي عامل زي اللي بيبيع البيت الواحد لاكثر من مشتري .. النادي عمال يقبل اشتراكات و يورث اشتراكات ! .. طيب .. هل هتقدر تستوعب كل هذه العضويات .. ايها النادي المحترم !

المشاركة الأصلية كتبت بواسطة فبريكا

انت عندك فئتبن من الشريحة ديه يا اما انسان ناقص اصلا كان فقران ومرة وحدة بقى معاه فلوس علشان كدة فى النوادي بيتعمل الانتر فيو ولازم يبقى معاه مؤهلات عليا وغيره يا اما واحد معاه فلوس كتير ومدلع ومغرور بس حتلاقي ناس زيه مدلعين بردوا مش حيلاقوا حد يتفشخروا علية انما لو فيه فرق طبقي حيلاقي . ده غير لو عمل الحركات الى بتقول عليها دية لو نادي محترم الادارة ممكن تلغي عضويتوا .

مع اني متفق معاك ان الفلوس مش مقياس لكن السلم الاجتماعي مهم وجعلناكم فوق بعضكم درجات يعنى انت ممكن تخرج مع ابن بواب ولا مع واحد صحبك من نفس مستواك خصوصا لو رايح حته راقية حيكسفك طبعا انت حتاكل بالشوكة والسكينة وهو حيلخبط الدنيا وياكل في اخر زادة ويمكن ياخد معاه الشوك والسكينة وهو ماشي ههههه .

ماله ابن البواب، يمكن يكون أحسن مني، منهم حفظة قران وأزهريين
لا فضل لعربي على أعجمي ولا لأبيض على أسود إلا بالتقوى
والأكل باشوكة والسكينة لا يمت للتقوى بصلة ومش أي دليل على رقي الشخص
أما "جعلناكم فوق بعضكم درجات" فالتصحيح "وَرَفَعَ بَعْضَكُمْ فَوْقَ بَعْضٍ دَرَجَاتٍ لِيَبْلُوَكُمْ فِي مَا آتَاكُمْ"

أسعار النوادي ما هي إلا إستغلال للإقبال عليها من راغبي "الفشخرة"، لأن بكل بساطة كان ممكن تكون أرخص بس محدودة العدد وصارمة القوانين للحد من سوء المشتركين

المشاركة الأصلية كتبت بواسطة qkash.com

واضح من ردود الاعضاء ان فيه ناس عندها خبرة كويسة عن النوادي بنسبة كبيرة
هل ممكن نعرف متوسط اعضاء كل نادي تقريباً كام فرد او كام اسرة؟

دي معرفهاش بصراحة ... بس اللي فاكره .. اب وام و ثلاثة أولاد و الأزيد تدفع عليه فلوس (مش متأكد و بتتوقف من نادي لآخر )
ومساحة كل نادي تقريباً كام فدان؟ ومكوناته من مباني وصالات رياضية او اجتماعية وحمامات سباحة ومطاعم وكفيهات وغيره.

المساحات حسب النوادي
فيه نوادي لها فروع مختلفة في اماكن كثيرة ...... و فيه نوادي كبيرة في الحجم وفيه نوادي متوسطة و نوادي صغيرة
أنت بتبص على النادي و انت عايز منه قبل الأشتراك
يعني عايز تبقى في مستوى معين مع اعضاء بشكل معين + انشطة معينة بتدور عليها + نظافة النادي و الحدائق و هكذا
وايه هي الانشطة والرياضات المتاحة في كل نادي وهل الاشتراك في اي نشاط بيكون مجاني للاطفال مثلا لو عايز يلعب كورة او تنس او سباحة او اي رياضة اخري او للكبار للاشتراك في الجيم او سباحة او غيره؟

الأنشطة أغلبها مجاني زي حمام السباحة (بيكون جزء من الأشتراك السنوي بتاعك )
أنت في الأول بتدفع أشتراك للعضوية و بعدين أشتراك سنوي للتجديد .
التنس و ملعب الكورة بيتم تأجيرهم بالساعة .
الجيم فيه نوادي بتخليه بفلوس (أشتراك شهري و نوادي تاني بتخليه كجزء من الأشتراك السنوي )
النادي اللي أنا فيه موجود فيه 2 جيم
واحدة تابعة للأشتراك الشهري ...... وواحدة تانية تجهيزها أحسن بفلوس شهري
ياريت كل ماحدش يبخل علينا بالمعلومة من اعضاء النوادي او من غير الاعضاء
وللجميع جزيل الشكر والتقدير

لو عايز تسأل على أي حاجة تانية .... أتفضل و أنا أجاوبك باللي أعرفه

المشاركة الأصلية كتبت بواسطة mohamed_selim

معلش مين قال كده؟ اللى يقول كده يبقى ماتعملش مع مصرييين !!!
الفلوس مش مقياس سيدى الفاضل الرك على الاخلاق و التربيه و ياما شوفنا اغنيا و تحاول تخليه يلتزم و ميرضاش و يقولك بفلوسى و غيره مش فى مستواه المادى و ملتزم ....

كلامك صحيح 100 %
بس مش هي دي القاعدة دائما ....
في أي مؤسسة في الدنيا أنت بتضع شروط معينة لأي حاجة
ممكن الشروط ما تكونش بتنطبق 100 % صح على الناس و ناس تانية تتظلم بسببها
زي نظام التنسيق في الأمتحانات
ممكن تجيب واحد زكي جدا يصلح مثلا انه يكون مهندس و لكن ترتيب درجاته ما أسعفوش أنه يدخل هندسة وواحد تاني دحيح و حفيظ و دخل الهندسة بسبب درجاته _مثال توضيحي

في النهاية مش المال هو المقياس لأخلاقيات الأفراد ... و لكن هو أحد الشروط للحفاظ على الشكل الأجتماعي للنادي و الحاجة التانية زي ما الأخوة الأعضاء تفضلوا و أشاروا بموضوع المقابلات الشخصية .و امكانية الغاء العضوية في اي وقت اذا خالف العضو النظام و القانون المعمول به

النوادى دى كانت مطروحة فى السبعينيات بالقسط للموظفين
ومش كل الناس كانت بتشترك لان البلد كانت هادية والواحد ممكن يتمشى فى اى حتة بدون ضوضاء ومضايقات، لكن الحاجة للنوادى والاستغلال ظهر بقوة اليومين دول لان بقى صعب تمشى فى حتة من غير ما حد يضايقك والاماكن النضيفة بقى الاستغلال فيها احيانا اكتر من النوادى

المشاركة الأصلية كتبت بواسطة qkash.com

مفيش حد جاوبني علي اسألتي اجابة وافية

بخصوص اعداد الاعضاء (انا اقصد اعضاء النادي بالكامل كام فرد؟)ومساحات النوادي والانشطة والبنايات داخل كل نادي

محدش هايقدر يديك معلومة مفيدة
النوادي مختلفة تماما عن بعضها
فيه نوادي كبيرة زي الأهلي و الزمالك و الجزيرة و يليهم دجلة ...... و فيه نوادي أصغر
كل نادي له عدد مختلف تماما عن النادي الآخر
يعني مثلا أعضاء الأهلي ممكن يتعدوا رقم كبير مقارنة برقم نادي تاني أصغر .

ياريت لو حد شغال في احد النوادي او كده ممكن يفيدنا او فين اعضاء النوادي ممكن يستفسروا عن المعلومات دي من الادارة بسهولة!!!!

وجزاكم الله خيراً

بصراحة سؤالك غريب شويتين

المشاركة الأصلية كتبت بواسطة sama_sama

ماله ابن البواب، يمكن يكون أحسن مني، منهم حفظة قران وأزهريين
لا فضل لعربي على أعجمي ولا لأبيض على أسود إلا بالتقوى
والأكل باشوكة والسكينة لا يمت للتقوى بصلة ومش أي دليل على رقي الشخص
أما "جعلناكم فوق بعضكم درجات" فالتصحيح "وَرَفَعَ بَعْضَكُمْ فَوْقَ بَعْضٍ دَرَجَاتٍ لِيَبْلُوَكُمْ فِي مَا آتَاكُمْ"

أسعار النوادي ما هي إلا إستغلال للإقبال عليها من راغبي "الفشخرة"، لأن بكل بساطة كان ممكن تكون أرخص بس محدودة العدد وصارمة القوانين للحد من سوء المشتركين

براحة علينا داخل فينا شمال ليه اضرب كلاكس طيب هههه متفق معاك طبعا في ان لا فرق بين اعربي ولا اعجمي الا بالتقوى ولكل مقام مقال يعنى طلما ابن البواب كويس فهو ينفع يمسك عمارة ونبقى مطمنين عليها بس لو طلب ايد اختك او بنتك ؟!! ماهو الحكاية بالتقوى بقة والا مكنش الحديث ده ليه لزمة اختاروا لنطفكم فإن العرق دساس وتكنح المراة لثلاث لمالها ونسبها ودينها فاظفر بذات الدين تربت يداك ليه ذكر النسب والمال ؟؟ لان فيه ناس بتفكر كدة في الواقع فعلا يعنى الحكاية مش تقوى بس خلينا واقعيين مش كل حاجة تحشر فيها الدين وخلاص فيه فروق اجتماعية طبعا وفية اختلاف فى الثقافة والطباع حتى لو حافظ للقران وتقي فالتقي تقي لنفسة الا لو كانا في جامع فالبواب زي الرئيس كلنا بين ايد الله وفيه ناس شيوخ وحافظين لكتاب الله تعالى وسنة رسوله صلى الله عليه وسلم وازهريين بيشربوا سجاير وبسمعوااغاني ام كلثوم الحكاية مش بحفظ كتاب الله والتقوى بس او باللحية لانك متعرفش ما تخفي سرائر الناس والنفس امارة بالسوء وعلى فكرة انا مقولتش قال الرسول ولا الله تعالى انا بكلم بالمعني و حتى لو كنت معرفش حروح جوجل من موقع اسلام اون لاين واحط الاية زي ما حضرتك عملت خليك ايزي وفرش الدين يسر مش عسر يا ريت نهدى شوية انا عارف انت تقصد ايه بالضبط ووضحتوا في البوستات اكتر من مرة وانت عارف انا اقصد اية فياريت ما تمسكش فى البواب وسيبة يحرس العمارة حيروح النادي ويسب العمارة فاضية لمين ههههه .

تحياتي