الاخبار المؤكدة... الفئة الثالثة لاوكتافيا a7 من الوكيل

**hanipal** · 29-09-2013 10:38 PM

مساء الخير عليكم جميعا،،
اليوم ذهبت مع صديق لاستلام الرائعه ال A7 من احد الموزعين. كان لونها grey فاتح وكان اللون رائع عليها رغم اني مابحبش اللون ده بس فعلا لايق اوي عليها. شدني برضو اللون الأبيض اللي مابيلقش على أي عربيه.
اللي حصل انه قبل الاستلام فاجأنا صديقنا صاحب المعرض بخبر مؤكد انه ارتوك مش هتنزل أي عربيه تاني بعد رسالة الجمارك الجايه والعربيات بتاعت الرساله دي هتدخل في صالات العرض والموزعين سيام على اخر الاسبوع ده واول الاسبوع القادم بحد اقصى. والحقيقة انو اول مركب هيدخل بعد كده هيبقى على اول السنه الجايه !!
ولما سألته ليه ، شرحلي بامانه بحكم الصداقه اللي بنا وقاللي الوكيل ارتوك هيعطش السوق شويه في تصرف يتسم بالذكاء في استغلال الموقف، بمعنى انه مش هيجيب أي عربيات بعد الاسبوعين الاولتنيين من شهر أكتوبر موعد وصول اخر شحنه للسنه دي، وكده هيصوم لحد بدايه يناير .!
سألت سؤال بديهي ، قولتله ممكن يكون الوكيل نازل بكميه تغطي السوق لحد نهاية العام. رد قاللي ﻷ.
قاللي احنا في خناقات مع ادارة الموزعين داخل ارتوك ، عشان عايزين يدو كل موزع فقط عشرين عربية !
والحجوزات على عربية الوكيل اول فئة من الموزعين خلقت مشاكل فيها ارتوك خصوصا بعد تأكيد انباء ان دي اخر دفعة للعام الحالي.
صديقي قاللي لو مش مصدقني تعالى في نوفمبر بعد العيد وأسأل على العربيه هقولك احاول ادبرها وممكن اقولك باوفر برايس !!

بصراحه جالي احباط من اللي بيحصل خصوصا لما اتصلت بمبيعات فرع المقطم واكدلي انه فعلا اخر دفعه اللي جايه اول شهر 10 ومافيش دفعات بعدها للسنه الحاليه الا في يناير ،
لم عدت و سألت مسؤول المبيعات في المقطم عن فئة تالته جايه في شحنة يناير ، أكد فعلا دون الافصاح عن تفاصيل كتير ، كل اللي قالو انها هتكون بين الفئتين الحاليتين.
صديقي الموزع اكدلي انه في ميتينج مع بتوع ارتوك واكدوله ان الفئة التالته بتزيد زينون، طارة مالتي ، حساسات امامية بخلاف الخلفية الموجوده أصلا،
المحبط اكتر في كل اللي فات انه اكدلي ان الفئة التالته دي سعرها يتراوح بين 248 و252 ولن تقل عن ذلك . وان الوكيل لن يخفض سعر أي من الفئات التلاته حتى لو عاد الدولار لحاجز ال 6 جنيهات.!!
لله الأمر من قبل ومن بعد. ولا حول ولا قوة الا بالله.

**hugan** · 29-09-2013 10:50 PM

مفيش حاجه في مصر ما بتتباعش
حتي لو سعر العربيه وصل 300 الف
كل حاجه وليها زبونها

**inspiron** · 29-09-2013 11:40 PM

مفيش مشكلة.الأمر بسيط..احنا نسيب العربية بتاعتهم تصدي عندهم وتلطشها البرومة وعلينا وعلي الخليجي !

**hanipal** · 30-09-2013 12:09 AM

المشاركة الأصلية كتبت بواسطة zangry

العربية مبعتش كتير ومش هنضحك على بعض .. لو العربيات بتتباع مستحيل اي موزع متعمد ينزلك جنيه منها + هيبقي في اوفر برايس ! وده طبيعي جدا عربياته اصلا متباعتش اللى جابها هيجيب تاني ليه !

روح اي موزع معتمد وهينزلك في سعرها وفي عضو بالفعل منزل في سعرها 3000 جنيه

باختصار يا جماعة العربية دى فاشلة ومتستهلش المبلغ ده حرام ادفعه في عربية تورشن بيم و 2 ايرباج وكمان فتيس فاشل واوبشن قليل جدا !

عندكوا السيتروين الـc5 عفشة مالتي لينك 7 ايرباج واوبشن يمكن اكتر منها وارخص منها بـ 8 تلاف جنيه !!

كلامك طبيعي ومنطقي . بس تعمل ايه في الزبون المصري اللي هيكسر كل القواعد المنطقيه.
اللي اشترى العربيه حتى اخر أغسطس فعلا خد خصم 3 الاف، خصوصا من نورالدين الشريف ، لكن دلوقتي صعب اوي انه ينزل الفين على بعض. الكارثة الحقيقية انها تحافظ على تمنها او تغلى . ساعتها هعلن اني مش هعلق او احلل او اناقش أي سعر في سوق البلد دي. لأني ماعدتش فاهم .

**hanipal** · 30-09-2013 12:23 AM

بخصوص العربيه مابعتش .
لو عملت زيييين وسألت الموزعين المعتمدين دول . هتتفاجأ.
الشرقاوي ماعندوش ولا حته وخلص بيع. كارتيك العبور شرحه . الاقصى فاضل عنده كأم قطعه لو كان مابعهمش أصلا. نور الدين الشريف كان عنده اخر اتنين وكمان لغى أي خصم عليها. معرض والي الخليفه المؤمون ولا قطعه عنده، سمير ريان نفسه كان عنده وحده فراني اول امبارح وماكنش فيه الا هيا. ده اذا ماكنتش اتباعت.

Mr. Zangry أعمل تليفوناتك وتأكد من المعلومات دي وبعدين حاول مشكورا تدينا تفسير للي بيحصل
اما بخصوص انها اتباعت او ماتباعتش . فالعربية للأسف الشديد .....بتبييع!

**M I D O** · 30-09-2013 12:28 AM

ويستمر مسلسل جشع التجار

**Hany Saad** · 30-09-2013 12:42 AM

المشاركة الأصلية كتبت بواسطة hanipal

بخصوص العربيه مابعتش .
لو عملت زيييين وسألت الموزعين المعتمدين دول . هتتفاجأ.
الشرقاوي ماعندوش ولا حته وخلص بيع. كارتيك العبور شرحه . الاقصى فاضل عنده كأم قطعه لو كان مابعهمش أصلا. نور الدين الشريف كان عنده اخر اتنين وكمان لغى أي خصم عليها. معرض والي الخليفه المؤمون ولا قطعه عنده، سمير ريان نفسه كان عنده وحده فراني اول امبارح وماكنش فيه الا هيا. ده اذا ماكنتش اتباعت.

Mr. Zangry أعمل تليفوناتك وتأكد من المعلومات دي وبعدين حاول مشكورا تدينا تفسير للي بيحصل
اما بخصوص انها اتباعت او ماتباعتش . فالعربية للأسف الشديد .....بتبييع!

بأكد كلام حضرتك، نور الدين الشريف فى الأسكندرية معندوش ولا واحدة، مفيش غير رابيد و yeti فقط، سألته طب هتيجى أمتى، قالى معرفش، أنا شغال دلوقتى فى الرابيد و الyeti فقط، بس الصراحة مش عارف ليه حسسنى أنو قرفان من العربية.