الموضوع: تغيير تيل فرامل الجين 2 - عصام و صفا - تقييم للتيل أيضا

المشاركة الأصلية كتبت بواسطة ahmed_h_g

الله ينور عليك يا أستاذي
وربنا يباركلك في عربيتك

ربنا يكرمك يا أستاذ أحمد و يبارك في عربيتك و يستر طريقك و طريق كل الأخوة الأعضاء .

احسن اتيال فرامل جربتها لحد دلوقتي في الواجا اسمه .. "ياماموتو"

علبته لونها بنفسجي × اصفر ومبيصفرش خالص .. كنت جايبه من عند مكة بس للاسف مبقاش يجيب منه تاني

الف مبروك على الصيانة وربنا يحفظلك عربيتك ويرزقك خيرها ويحفظك من شرها

وجزاكم الله خيرا على المشاركة

بس ده مش معدل الأداء بتاعك في التيل ياباشا ... المفروض لغاية 40 - 50 الف كحد أدنى

بس على فكرة برضه هو من الصورة اللى حضرتك حطتتها للتيل ... إنه كان ممكن يقعد 10 آلاف كمان على الأقل لو كان محتفظ بطراوته

المشاركة الأصلية كتبت بواسطة tutankhamoun

اللي أنا عملته كان الآتي .
أخدت طريق الدائري (المعادي ) مش بطيق القوس الشمالي من الدائري بسبب عربيات وجه بحري النقل و النص نقل (السواقين غُشم أخر حاجة )

نزلت نزلة مدينة نصر ...... و بعدين كملت لغاية ميدان رابعة (مقفول طبعا يومها للتجديد )
و بعدين قعدت أخرم من وسط مدينة نصر للوصول لمنطقة النزهة ... طبعا مش هاعرف أقولك وصلت ازاي لأني أصلا تُهت عدة مرات لأن ناس فكرتني بأسأل على شارع النزهة في الأول و بعدين رحت شارع النزهة غلط لغاية ما بدءت أسال على حي النزهة

أنا بقى معاك أنك تروح من القوس الشمالي (دائري السلام )
أو
وسط البلد بس يكون بعد الساعة 10 صباحا علشان الزحام الخانق .

أو تروح التوكيل في ابو رواش و تريح دماغك من المشوار العلقة
بس بصراحة عصام و صفا كويسين و يستاهلوا المشوار

بالنسبة للتيل الأصلي
هو شكله كان يقعد شوية كمان بطريقة سواقتي بس مكنش يقعد كتير ...
عموما أنا محتفظ به و عايز أقارن تخانة التيل القديم مع تيل جديد بس مش لاقي حد معاه تيل جديد أقارن التخانة ما بينهم .

و فعلا دي أول مرة أروح عصام و صفا ... قلت أجرب ... طلعوا ناس زي الفل .

إنت ياباشا اخترت أصعب طريق ممكن لدخول النزهة وجوزيف تيتو .. انت كدة اتعذبت صح في المشوار ده بس

المشاركة الأصلية كتبت بواسطة al-farooq

هل فعلا دوخة ، بس لو كنت مكانك وهاخد طريق دائري اتجاه المعادي "هو اطول من اتجاه السلام بس انضف" كنت هكمل لنزلة المطار ومن هناك اكمل الطريق
افضل طريق اللى من داخل البلد لو كانت الدنيا روقان لكن للأسف زحمة فوق الوصف انا بفضل اى طريق سريع حتي لو استهلاك بنزين اكثر احسن من كل شوية فرامل واشارات و اسيب ربع متر قدامي الاقي واحد دخل فيه او واحد يخبط او يلمس التاني فيوقفوا الطريق وراهم عقبال ما يتصلحوا في الزحمة فطول الطريق تلاقي الواحد عمال يكبت فى نفسه والكاظمين الغيظ ، ثقافة شعب. هي نفس الحاجات بتحصل على الدائري وبيتزحم وكل حاجة بس احساس ان الطريق ماشي وشغال دي حاجة جميلة :d

والتوكيل الصحرواي الله يهديهم مش بيركب التيل دة ، خلاف ان الواحد ممكن يروح عصام وصفا اسرع من التوكيل اللى بنقعد فيه بالخمس ساعات علي صيانات مفيهاش حاجة ، الله يهدي عصام وصفا كمان ويعملوا فرع قريب!

وشاكر لردك يا توت باشا :)

هو فعلا أفضل طريق هو ده .. الدائري لغاية نزلة المطار من على طريق السويس وبعد كدة تاخد الأتوستراد لغاية الكلية الحربية وبعد كدة تكمل لـ جوزيف تيتو يمين ... وانت راجع بقى تطلع من عند عصام صفا وتلف وترجع في جوزيف تيتو (يعني ما تكملش لغاية الكلية الحربية تاني لأ) ترجع فيه ناحية المطار هاتلاقي نفسك على الدائري تاني من على جوزيف تيتو نفسه في اتجاه المعادي (ولولا إن الحتة دي مالهاش نزلة عليه من الاتجاه المقابل كنت قلتلك تكمل في الدائري وانت رايحله كمان

وممكن وانت رايح برضه تكمل في الدائري لغاية مدينة السلام (يعني ما تنزلش نزلة المطار على طريق السويس) وتنزل على مدينة السلام (بعد النفق على طول) وترجع من أول يوترن تحت الدائري على طريق مصر اسماعيلية في اتجاه جوزيف تيتو تطلع الكوبري وتنزل هاتلاقي الدخلة بتاعته على اليمين في اتجاهك .. أعتقد ده أسهل وأكثر مباشرة بس ممكن يكون أطول شوية

من ناحية الزحمة الإثنين قريبين من بعض إلى حد ما

المشاركة الأصلية كتبت بواسطة shakshak2011

و الله يا رجاله زى ما بقولكم .. انا كنت روحت الورشه بتاعت فيصل غيرت طنابير أمامى و تيل امامى من عنده .. و مكنتش اعرف إن ده هو الكورى الى ناس بتنصح بيه ...

الورشه قالت إن ده تيل كويس و قلت أتوكل على الله و أجرب .. الكلام ده من تقريباً 3 شهور .. دلوقتى عامل بالتيل قرابة ال 4000 و الصفاره بتظهر أول ما التيل يسخن .. أول ما أتحرك بالعربيه و أدوس فرامل مره فى التانيه و يبدأ الغناء ..

لما لقيت ناس كثير بتنصح بالكورى فى الموضوع ده .. كنت هغيره بس قلت أبص على نوع الى راكب عندى و كانت المفاجأه أنه نفس النوع الى الناس بتنصح بيه!!!!!!!!!!!!

فى الغالب هشيله و أجيب التيل الأمريكى الى بيركب ل فيات بترا .. أسمه "هالتك" كنت شاريه ب 120 جنيه قبل الى معايا حالياً و لحد ما غيرته مكنش بيطلع أدنى صوت ..

المهم دلوقتى فى الخلفى .. أجيب أنهى نوع يا رجاله؟؟؟؟

نفسي أنا كمان أعرف نوع كويس للتيل الخلفي غير الماليزي ... لأن الماليزي أصلا مش موجود على طول

المشاركة الأصلية كتبت بواسطة eng f3lix

احسن اتيال فرامل جربتها لحد دلوقتي في الواجا اسمه .. "ياماموتو"

علبته لونها بنفسجي × اصفر ومبيصفرش خالص .. كنت جايبه من عند مكة بس للاسف مبقاش يجيب منه تاني

ده أحسن تيل جربتوا؟! أنا رميتوا في الزبالة بعد 2000 كم.

المشاركة الأصلية كتبت بواسطة raul_7

ده أحسن تيل جربتوا؟! أنا رميتوا في الزبالة بعد 2000 كم.

مستحيل !!!!!!!!!!!

متأكد ان هو ياباشا؟

المشاركة الأصلية كتبت بواسطة eng f3lix

مستحيل !!!!!!!!!!!

متأكد ان هو ياباشا؟

أه هو, حتي اسأل مهندس عصام, ههههه.

ده أنا دعيت علي الراجل الي بعهولي دعاء.

بالنسبة للتيل, كان أول ما يسخن يبدأ عزف و أدائه سيء قوي لما يسخن و بيطلع ريحة شياط, غير انه كان بياكل الطنابير مش بيتاكل من الفرملة.

المشاركة الأصلية كتبت بواسطة raul_7

أه هو, حتي اسأل مهندس عصام, ههههه.

ده أنا دعيت علي الراجل الي بعهولي دعاء.

بالنسبة للتيل, كان أول ما يسخن يبدأ عزف و أدائه سيء قوي لما يسخن و بيطلع ريحة شياط, غير انه كان بياكل الطنابير مش بيتاكل من الفرملة.

ده كان ماشي معايا زي الفل .. كان نفسي الاقيه تاني

ولا بيصفر ولا بيعمل شياط وكان محافظ على الطنابير وبيقعد حوالي 12-15 الف كيلو !!!

يمكن بتاع الواجا غير بتاع الجين2 .. بس كنت حضرتك جايبه منين ياكبير؟