الموضوع: ماذا تعرف عن الجلوتامين( GLUTAMINE ) و bcaa ! كمال اجسام !

بسم الله الرحمن الرحيم

ما هو الامينو ؟

تخش الجيم تلاقى كل الناس اللى هناك بما فيهم الكابتن يقولك خدلك حبايتين امينو ب جنيه و نص الواحدة و هتخليك حيوان و معرفش هتديك باور و هتطلعلك جناحات

طب مش تعرف الدنيا ماشية ازاى ولا تاخد على عماك و خلاص؟

الامينو اسيدز يا سيدى هى الكتل المكونة للبروتين
يعنى لما انت تاكل حتة لحمة ولا اى اكل فيه بروتين بيتفكك لشوية احماض امينية صغيرة علشان تتهضم و تمتص فى الدم

و ليها كمان تأثير جامد على جسمك من اول الانسجة الصغيرة
لحد انتاج كيماويات اللى بتخلى مخك يشتغل

ده برده بتأثر على الفيتامينات و المعادن فى الجسم و تخليها تقوم بوظائفها بصورة كويسة و احيانا حتى لو جسمك هضم الفيتامينات و المعادن دول .. ملهمش اى لازمة غير لو كان بعض الاحماض الامينية موجودة

الامينو اسيدز ديه بقى بتنقسم لقسمين
الاحماض الاساسية و الغير اساسية

--------

نتكلم الاول عن الاحماض الاساسية:

الاحماض الاساسية جسمك مبيصنعهاش
و لازم تحصل عليها من البروتين او بعض الخضروات لما تجمعهم مع بعض و هما كمان 9 احماض و هقولك دلوقتى على فوائدهم


1- تريبتوفان:

حمض بيساعد على الاسترخاء و التقليل من الأرق و التوتر و القلق الكثير و ايضا الاكتئاب
و كمان بيساعد الى حد ما فى علاج الصداع النصفى و بيحسن من جهاز المناعة و بيقلل من اخطار امراض القلب و الشرايين

و كمان بيشتغل مع حمض الليسين و يقللوا معدلات الكوليسترول فى الجسم



2- ليسين:

بيضمن انه الكالسيوم يمتص بصورة كويسة و بيساعد على تكوين الكولاجين اللى موجود فى الغضاريف و الانسجة الرابطة
و بيساعد فى انتاج الاجسام المضادة و الهرمونات و الانزيمات و ايضا التقليل من نمو الفيروسات بالتالى الوقاية من بعض الامراض

لو الليسين ده قل هتحس بالتعب و مش عارف تركز و بيعيق نموك و كمان هيجيلك انيميا



3- ميثيونين:

المورد الاساسى للكبريت و اللى بدوره بيساعد انه يخلى شعرك و جلدك و كمان اظافرك سليمة

و كمان بيقلل من معدلات الكوليسترول علشان بيساعد الكبد على انتاج الليسيثين و بيقلل من دهون الكبد و بيحمى الكلية

و بينظم انتاج المعادن مثل الامونيا و بيقلل من التهاب المثانة



4- فينيلالانين:

مخك بيستعمله علشان ينتج مركب كيميائى بينقل الاشارات ما بين الخلايا العصبية و المخ
و كمان بيخليك صاحى و فايق و بيقلل الام الاحساس بالجوع

و بيحسن من ذاكرتك و كمان بيقلل من الاكتئاب



5- ثريونين:

عنصر اساسى فى الكولاجين اللى لسة جايب سيرته و كمان كام بتاع متعلق بعمليات الجسم و العظام

و بيساعد فى منع تراكم الدهون على الكبد
و بيساعد كمان فى عملية الهضم و الامتصاص



6- فالين:

بيحسن من اداء مخك و تساوى عضلاتك ( للناس اللى بدراع و صدر اكبر من النصف التانى ) و كمان بيخليك هادى و مش عصبى علطول



7 و 8 - ليوسين و ايزو ليوسين:

بيوفروا العناصر لبعض العمليات البيوكيميائية المهمة فى جسمك
و اللى منها بتنتجلك الطاقة و بتنبه المخ و تخليك فايق و مصحصح



9- هيستيدين:

مهم فى النمو بصفة عامة و استشفاء الانسجة
و كمان بطريقة غير مباشرة بيساعد فى عملية الهضم



------------

و دلوقتى مع الاحماض الغير اساسية:

مش معنى ان اسمها غير اساسية .. يبقى ملهاش لازمة .. لا طبعا
كل الاحماض الامينية ليها وظائف مختلفة و لازم تواجدها فى الجسم و خاصة لو انت بتلعب رياضة


1- ارجينين:

بيحسن من اداء جهاز المناعة ضد البكتيريا و الفيروسات و ورم الخلايا
و بيسرع من شفاء الجروح و تجديد الكبد و بالتالى افراز هرمون النمو
و يعتبر اساسى لنمو العضلات و اصلاح و استشفاء الانسجة



2- تيروسين:

بينقل النبضات العصبية للمخ و بيحسن من اداء الذاكرة و التغلب على الاكتئاب و برده بيخليك فايق و مصحصح



3- جليسين:

بيحسن من توصيل الاكسجين للعضلات علشان تنتج طاقة
و كمان مهم لجهاز المناعة



4- سيرين:

بيدى اجسام مضادة لجهاز المناعة بالتالى بيحسن من ادائه و كمان مصدر تخزين للجلوكوز



5 و 6- جلوتاميك اسيد و جلوتامين:

يعتبر هو الاكل بتاع المخ لانه بيحسن من الاداء العقلى بصورة كويسة
و بيسرع من شفاء القرح و لو حاسس بالتعب يبقى انسى .. كل ده هيروح
و كمان بيساعد فى انفصام الشخصية ( لو انت مجنون يعنى )
و لو مدمن كحوليات .. او تختخ و طول ما انت قاعد بتاكل سكر زى النمل

ده غير طبعا انه بيحسن من الاستشفاء العضلى و كمان بيقلل من فقدان العضلات



7- اسبراتيك اسيد:

بيساعد فى طرد الامونيا الضارة من الجسم لانها احيانا بتكون سامة و بتضر الجهاز العصبى
و كمان بيقلل من الاكتئاب برده

و بيساعد فى المقاومة ضد الارهاق و بيزود من قدرتك على التحمل



8- تاورين:

بيساعد فى الحفاظ على شوية حاجات متعلقة بالصرع ( يعنى متقلقش مش هتتجنن و تقتل فى الناس و تعمل فيبراشن )

و التاورين و الكبريت مهمين جدا للسيطرة على شوية عمليات بيوكيميائية بتحصل و عمرك بيزيد

و كمان متنساش ( ريد بول يعطيك جوانج ) و باور هورس و كل مشروبات الطاقة, العامل الاساسى فيها بيبقى التاورين



9- سيستين:

بيشتغل كمضاد للاكسدة و بيساعد الجسم فى الوقاية ضد الاشعاع و التلوث و مهم جدا لتكوين الجلد ( يعنى لو بطلجى و بتتعور كتير يبقى خد منه علطول )

و كمان بيقلل من عملية التقدم فى السن ( مش هتعجز بسرعة يعنى )



10- هيستيدين:

بيساعد فى علاج التهاب المفاصل و الحساسية و كمان الانيميا
و لو قل فى جسمك هتتطرش ( مش هتعرف تسمع كويس يعنى )



11- برولين:

مهم جدا للمفاصل و الاوتار و بيساعد فى شفاء الجروح بسرعة ايضا
و تقوية عضلات القلب



12- الانين:

مصدر مهم جدا للطاقة و برده زى اخواته بيحسن من جهاز المناعة
و بيساعد فى حرق السكر و الاحماض العضوية


------------

طب ايه هو بقى ال BCAA ? Branched Chain Amino Acids ?

دول يا سيدى اهم كمان من الاحماض العادية

ليه بقى ؟

لانهم بيتحرقوا فى العضلات نفسها مش فى الكبد

اللى بيحصل انه بعد ما البروتين بيتهضم و بيتقسم لاحماض صغيرة
الاحماض ديه ممكن تبنى بروتين جديد او تتحرق و تبقى مصدر للطاقة

و ال 3 احماض ال بى سى ايه ايه هما

ال ليوسين و ال ايسو ليوسين و ال فالين

و كمان الدراسات الحديثة بتقول انهم بيقللوا من عملية هدم العضلات و بساعدوا فى بناء العضلات و بيعدوا من المكملات الاساسية


----------------

طب الفيلم الهندى ده كله موجود فين فى الاكل ؟

احب اقولك انه موجود فى انواع كتير و كمان بصورة كافية يعنى متقلقش انت بتاكله و انت مش واخد بالك اصلا

و امثلة على كدة فى:

جميع انواع الاكل من مصادر حيوانية زى البيض و الفراخ و اللحمة و السمك و منتجات الالبان

و كمان فى بعض الخضار زى الفول و البسلة و الصويا
و الارز ....... الخ

يعنى تقريبا معظم انواع الاكل اليومى بتاعك بيبقى فيه اغلبية الاحماض الامينية


----------------------

كدة يبقى عرفنا اهمية الاحماض الامينية و انها مش بس مفيدة للاعبى كمال الاجسام بل للناس كلها و ليها علاقة بعمليات الجسم بنسبة كبيرة مش بس للعضلات

طيب ايه احسن منتجات الامينو حاليا للى عاوز يجيب ؟

شخصيا برشح امينو 2222 من اوبتيموم

بس خللى بالك .. متجبش من الجيم ابو جنيه و نص الحباية ده لانه غالبا مضروب بالنار
و اصلا متشتريش من كابتن الجيم ده اى حاجة لانه عاوز يبيع و يكسب و خلاص

فيه تجار معتدمين فى المنتدى .. نقى اللى يريحك و اشترى منه

طب ايه حوار بينشف و بيعطيك جوانح ده ؟

والله يا سيدى اديك شفت فوائد كل حمض لوحده .. اجمع كل دول فى علبة واحدة و انت تعرف الفوائد كلها

بس احنا دائما بنقول بلاش امينو لانه ضعيف
بمعنى .. الحباية فيها 2 جرام بروتين .. يعنى هتدفع فلوس كتير على حاجة ممكن تجيبها من الاكل

برة الامينو ده برخص التراب يعنى مش هيأثر فى حاجة لو اشتريته

انت ممكن تبقى ناصح و تجيب ال bcaa لانه اساسى و باقى الاحماض الامينية هتلاقيها فى الاكل يا اما فى معظم منتجات زيادة الوزن او البروتين باودرز لو بتستعملهم

و بيديك باور لانه فيه ال 3 احماض المكونة للكرياتين ( بس طبعا بصورة اقل ) يعنى لو جبت كرياتين بيور يبقى افضل

و موضوع بينشف ده علشان هو بروتين صافى من غير سعرات حرارية اصلا .. يعنى 100 % مفيش دهون
و هو مش معمول علشان ينشف جسمك بدون تغذية سليمة من غير دهون .. انت بس بتحس بكدة لما تلاقى ضخ الدم زاد فى العضلة و عروقك بانت و ده وظيفة بعض الاحماض فيه زى ما قلت انها تديلك طاقة بالتالى الضخ هيزيد

و ايضا ال كارنيتين كان بيستخدم كحارق للدهون و بيقلل نسبة الدهون فى العضلة الى حد ما و بيقلل الاحساس بالارهاق بالتالى النتيجة ان العضلة بتزيد ( طرق غير مباشرة ) و الدهون بتقل


و شركة توينلاب كمان بتعمل امينو سائل تمام جدا او حبوب و ناس كتير بتشكر فيه و عامة اى شركة ناوى تشترى منها بص على الريتنج بتاعها على Bodybuilding.com - Huge Online Supplement Store & Fitness Community!
لو مظبوط يبقى مفيش مشكلة هاته و جرب مش هتخسر حاجة
الرياضة ديه عبارة عن تجارب
اللى بينفع مع واحد ممكن مينفعش مع التاني
اتمنى انه ينال اعجابكم

و متنسوش ان التغذية هى رقم 1 فى الرياضة ديه .. مش المكملات او المنشطات او حتى التمرين


و بالتوفيق للجميع


منقول من ك. أحمد دريمر