هل محلات الكباب والكفتة الرخيصة التمن بتبيع لحمة مستوردة او معشوشة؟

**الفجر** · 30-09-2013 07:21 PM

عروض غريبة الواحد بيلاقيها كيلو كفتة ب 60 ومحلات تانية كيلو الكفتة ب 120 !!!

تفاوت رهيب جداااااااااااا

ومحدش يقول اصل نوع اللحمة بيفرق لان الفرق فى كيلو لحمة مش لدرجة دى

فهل ابو 60 دة لحمة مستوردة ومغشوشة ؟؟

وهل ابو 120 دة لحمة مخلوطة يعنى مستورد على بلدى !!!

ولا فعلا ابو 120 دة فعلا مميز وبلدى وضانى ؟!

**micromoud** · 30-09-2013 07:41 PM

ابو 60 لحمه مستورده وبيتحط عليها دهن ضانى عشان النكهة دا اللى اعرفه

**Gelgel2004** · 30-09-2013 07:52 PM

احكيلك قصه
الكيلو الضانى البلدى ب 75 جم متوسط وبعد التنظيف و التقطيع الجيد بيصفى على 850 جرام
يتبل و مع السلطه و العيش و الخدمه و المكسب بيتباع ب 120 جم متوسط
و نفس ما سبق للبتلو - بيزيد شويه 10 الى 20 جنيه حسب المنطقه
اما الكفته

فمعرو ف انها جزء جملى من ابو الكيلو 50 جم على جزء كندو يعنى كندوز و لامواخذه من ابو الكيلو 65 جم على حته ضانى من ابو 75 جم و المحلات بتوفر الحتة الضانى برضه - لامواخذه - و بتحط حته ليه من ابو 10 جم علشان تشعوطنا و احنا معديين من امام الكببابجى .

دى المقدمه
القصه بعد اللى فات قدام المحل اكثر من اختيار حسب مايلى
1/ منطقه راقيه - يبالغ فى السعر علشان المبرر جاهز انا بلدى - اقصد لحمتى بلدى و الكيلو او العماله بتخسرنى وواع اهى سنيف
2/ منطقه متوسطه - فعلشان يبيع باسعار عاديه ذات مكسب كبير بيجيب مستورد و افر م يا معلم و برضه واع اهى سنيف
3/ منطقه شعبيه و لو قال هبيع الكيلو ب 70 جم مثلا - اهل المنطقه هيعملوا فيه اللى بيتعمل فى الدبيحه و هى متعلقه - للامواخذه - فيروح المدبح - هناك محلات بتبيع كيلو الكفته من اول 15 جم الى 50 جم جاهزه و على فكره هتلاقى هناك مندوبين من محلات كبيرة بيشترى الكيلو ب 30 جم و بيبيعوا ب 75 الى 80 جم على انه بلدى و دايما المبرر موجود اجيب منين فوس الصنايعية ...الخ و برضه واع اهئ سنيف
4/ و نظرا لان مفيش رخصه بتتطلع بناءا على نوع اللحمه المستخدمه - يعنى كبابجى و خلاص و لان اكثر من مره تم اغلاق محلات كبابجيه كبارو مشهورين لعد م المطابقه
فالحل سهل و انا ماشىعليه

اروح هايبر اللى فى طريق العاشر من رمضان
اشترى فلتو او ستيك شمبرى من الكيلو ابو 69 جم
اشترى التتبيله جاهزه من محل بالمربلاند صاحبى و اغمز الدكتور - اللى بيجهز التتبيله - و بيعاملها انها سر ب 15 جم
اسيب اللحمه فى التتبيله لمده يوم فى الثلاجه موش الفريزر
و اجهز الشوايه اللى بغطا فى البلكونه و البس عده الشغل - جوانتى بلاستيك و تى شيرت و بنتاكور
1/2 ساعه و مع رغفين محمصين احط فيهم اللحمه اللى هتتطلع علشان يتجانسوا مع بعض و ادعيلى
و اللى يحاول يمد ايده اغرس الشوكه بتاعه اللحمه فى ايد حضرته
و بالهنا و الشفا

**sha2e** · 30-09-2013 08:16 PM

نحاول نحدد نقط معينه
اولا : كل المحلات بتنصب فى موضوع الوزن
لان الكيلو الى بيقولك عليه ده بيكون وزنه لا يتعدى 400 جرام

ثانيا : ثمن كيلو اللحمه للتاجر مش 70 او 75 جنية السعر ده بتاع الجمهور مش التجار
التجار او اصحاب المحلات بيشترو بسعر تاني او بيجيبو هما العجل ويقسموه على نفسهم وساعتها الكيلو هيقف بحاجه واربعين جنيه لان اسعار العجول مش غاليه
واعرف ناس عادية مش تجار بقالهم سنين مش بيشتروا لحمه من الجزار وكل كام اسرة فى عيلتهم بشتركو كل شهر ويجيبو عجل ويذبحوه ويقسموه وبيقف الكيلو بالسعر الى قولت عليه (حاجة واربعين جنية)

نرجع للكبابجي الكيلو البلدي مبيقفش عليه 25 جنية ( لانه مش محصل نص كيلو بـ 22 وشوية توابل بـ 3)
ومع ذلك بيستسهلو ويوفرو وبيجيبوا لحمة مستورده عشان ارخص
او لحمه وقيع ( يعنى الحيوان تعبان ومينفعش يندبح فى المجزر )

**saddam** · 30-09-2013 09:11 PM

صديقي المواطن
أنا من كبار عشاق الكفتة الضاني بكافة أنواعها وجايبها من التركي للكوري للعراقي للسوري للبناني للكويتي للأردني للإماراتي للمصري وغيره
وخلاصة الخلاصة مفيش حاجة إسمها لحم حمير أو كلاب ده مش حيستمر وحيتكشف بسرعة وعلى فكرة فيه محلات كيلو الكفتة ب 46 جنيه وده مش مغشوش ده بيبقه لحم مستورد أثيوبي أو سوداني أو برازيلي وملحوظة الضاتي السوداتي أنا بجيبه من منافذ الزراعة بصراحة شديد اﻹحترام أما أبو 120 و140 فده لزوم يستمر بمستوى معيشي معين تعود عليه هو وإسرته وكمان لو المحل إيجار فحيكون بألافات وهكذا وأنا من وجهة تظري بشتري كيلو الكفتة في مطاعم محترمة في رينج 80 ويروح أحيانا آكل في لازوغلي الكيلو ب 40 وهكذا مطرح ما شد العربيات ياخدنا بنركن وناكل كفتة وغلى فكرة الكفتة كل ما تزود الشحم بيها تقدر تاكل منها كتير لو كانت لحمة صافية حتوقف في زورك وعلى فكرة أحسن اﻷكل هو في طرق السفر وكمان أحسن كفتة في مصر هي في مطروح وأطيب كفتة في العالم هي في الغراق وفي تركيا ودمتم للنضال

**S O P H O S** · 30-09-2013 10:31 PM

الناس الي بتبيع ب 60 دولا
بيشتروا الكيلو بعشرة و15 جنيه ويضيفوا حاجات

**Y a r i s** · 01-10-2013 01:20 AM

المشاركة الأصلية كتبت بواسطة s o p h o s

الناس الي بتبيع ب 60 دولا
بيشتروا الكيلو بعشرة و15 جنيه ويضيفوا حاجات

مفيش لحمة ب ١٠ و ١٥ جنية يا احمد
بس بالنسبة للكوفته مش انتا بتشوف الجزارين لمن توقف وحده كلاس قداموا وتقلوا نضفلي حتت الهبرة دي ياعم وشيلي الشغت. وحتت الدهن منها ... فالجزار يشفي اللحمة ... وتلاقي بيجمعها في جردل زبالة كده لونوا اخضر بس طبعاً للامانه جردل الزبالة ده مخصوص لبواقي اللحمه الي بتتنضف. المهم بيجمع تنضيف اللحمة دي كلها ويقوم يا ضربها وكبسها وعاملها سوجق. بلدي الكيلو ب ١٨ جنية او ٢٢ جنية. يا بيقوم فارمهم ويبيع الكيلو بمبلغ محترم طبعاً المحلات الفايف استار الي احنا فاكرينهم فايف استار بيجيبوا اللحمة المفرومة دي وبيضيفوا. عليها حتت اللية الضاني زي ما قال استاذ جل جل كده

بس المهم : انا عاوز اسئل سؤال. مالها اللحمة الاثيوبي او البرازيلي زي الفل
بالمناسبة دي انا معايا منيو بتاع منفذ بيع وزارة الزراعة شوفوا الاسعار الجديدة عندهم اللحمة بكام وعلى فكرة لحمه بلدي ونضيفة. وحمر. حمرة وزي الفل

فخدة كندوز ب ٤٠ جنية
مفروم هههههه ٤٠ جنية
موزة. ٤٠ جنية
بفتيك. ٤٠ جنية
شاورما ( هاهاها) ٤٠ جنية
كبدة ٣٠ جنية
سجق ( الي بالي بالك ) ٣٠ جنية
سوسيس. ٣٠ جنية
كفته شوي. ٣٠ جنية

لحوم بتلو :
وش فخدة ٤٥ جنية
موزة ٥٠ جنية
بفتيك ٦٠ جنية
كبدة ٤٠ جنية
ريش بالعضم ٤٥ جنية
مفروم بتلو ٤٥ جنية
مفروم ضاااااااااااااااااااااااا اااااااني ٦٠ جنية

ولسه بقة في اسعار الاسماك والطيور وعندهم عسل وزيت زتون وحبة حجات حلوة
عمار يا مصر ... بس الي يغيظك في المطاعم الغالية الحرامية يقولك مفيش حاجة اسمها كيلو كباب صافي لازم كباب وكفته يعني الكفته اجباري مع ان الكيلو ب ١٢٠ او ١٦٠ وده دليل. ان صاحب المطعم علي بابا رسمي .... وتحياتي

**Gelgel2004** · 01-10-2013 11:07 AM

المشاركة الأصلية كتبت بواسطة Y a r i s

مفيش لحمة ب ١٠ و ١٥ جنية يا احمد
بس بالنسبة للكوفته مش انتا بتشوف الجزارين لمن توقف وحده كلاس قداموا وتقلوا نضفلي حتت الهبرة دي ياعم وشيلي الشغت. وحتت الدهن منها ... فالجزار يشفي اللحمة ... وتلاقي بيجمعها في جردل زبالة كده لونوا اخضر بس طبعاً للامانه جردل الزبالة ده مخصوص لبواقي اللحمه الي بتتنضف. المهم بيجمع تنضيف اللحمة دي كلها ويقوم يا ضربها وكبسها وعاملها سوجق. بلدي الكيلو ب ١٨ جنية او ٢٢ جنية. يا بيقوم فارمهم ويبيع الكيلو بمبلغ محترم طبعاً المحلات الفايف استار الي احنا فاكرينهم فايف استار بيجيبوا اللحمة المفرومة دي وبيضيفوا. عليها حتت اللية الضاني زي ما قال استاذ جل جل كده

بس المهم : انا عاوز اسئل سؤال. مالها اللحمة الاثيوبي او البرازيلي زي الفل
بالمناسبة دي انا معايا منيو بتاع منفذ بيع وزارة الزراعة شوفوا الاسعار الجديدة عندهم اللحمة بكام وعلى فكرة لحمه بلدي ونضيفة. وحمر. حمرة وزي الفل

فخدة كندوز ب ٤٠ جنية
مفروم هههههه ٤٠ جنية
موزة. ٤٠ جنية
بفتيك. ٤٠ جنية
شاورما ( هاهاها) ٤٠ جنية
كبدة ٣٠ جنية
سجق ( الي بالي بالك ) ٣٠ جنية
سوسيس. ٣٠ جنية
كفته شوي. ٣٠ جنية

لحوم بتلو :
وش فخدة ٤٥ جنية
موزة ٥٠ جنية
بفتيك ٦٠ جنية
كبدة ٤٠ جنية
ريش بالعضم ٤٥ جنية
مفروم بتلو ٤٥ جنية
مفروم ضاااااااااااااااااااااااا اااااااني ٦٠ جنية

ولسه بقة في اسعار الاسماك والطيور وعندهم عسل وزيت زتون وحبة حجات حلوة
عمار يا مصر ... بس الي يغيظك في المطاعم الغالية الحرامية يقولك مفيش حاجة اسمها كيلو كباب صافي لازم كباب وكفته يعني الكفته اجباري مع ان الكيلو ب ١٢٠ او ١٦٠ وده دليل. ان صاحب المطعم علي بابا رسمي .... وتحياتي

انت كده جوعتنى و ماليش دعوه

فين المنفذ ده يا باشا؟؟ يسترك

**محمد يوسف** · 01-10-2013 11:13 AM

المشاركة الأصلية كتبت بواسطة gelgel2004

احكيلك قصه
الكيلو الضانى البلدى ب 75 جم متوسط وبعد التنظيف و التقطيع الجيد بيصفى على 850 جرام
يتبل و مع السلطه و العيش و الخدمه و المكسب بيتباع ب 120 جم متوسط
و نفس ما سبق للبتلو - بيزيد شويه 10 الى 20 جنيه حسب المنطقه
اما الكفته

فمعرو ف انها جزء جملى من ابو الكيلو 50 جم على جزء كندو يعنى كندوز و لامواخذه من ابو الكيلو 65 جم على حته ضانى من ابو 75 جم و المحلات بتوفر الحتة الضانى برضه - لامواخذه - و بتحط حته ليه من ابو 10 جم علشان تشعوطنا و احنا معديين من امام الكببابجى .

دى المقدمه
القصه بعد اللى فات قدام المحل اكثر من اختيار حسب مايلى
1/ منطقه راقيه - يبالغ فى السعر علشان المبرر جاهز انا بلدى - اقصد لحمتى بلدى و الكيلو او العماله بتخسرنى وواع اهى سنيف
2/ منطقه متوسطه - فعلشان يبيع باسعار عاديه ذات مكسب كبير بيجيب مستورد و افر م يا معلم و برضه واع اهى سنيف
3/ منطقه شعبيه و لو قال هبيع الكيلو ب 70 جم مثلا - اهل المنطقه هيعملوا فيه اللى بيتعمل فى الدبيحه و هى متعلقه - للامواخذه - فيروح المدبح - هناك محلات بتبيع كيلو الكفته من اول 15 جم الى 50 جم جاهزه و على فكره هتلاقى هناك مندوبين من محلات كبيرة بيشترى الكيلو ب 30 جم و بيبيعوا ب 75 الى 80 جم على انه بلدى و دايما المبرر موجود اجيب منين فوس الصنايعية ...الخ و برضه واع اهئ سنيف
4/ و نظرا لان مفيش رخصه بتتطلع بناءا على نوع اللحمه المستخدمه - يعنى كبابجى و خلاص و لان اكثر من مره تم اغلاق محلات كبابجيه كبارو مشهورين لعد م المطابقه
فالحل سهل و انا ماشىعليه

اروح هايبر اللى فى طريق العاشر من رمضان
اشترى فلتو او ستيك شمبرى من الكيلو ابو 69 جم
اشترى التتبيله جاهزه من محل بالمربلاند صاحبى و اغمز الدكتور - اللى بيجهز التتبيله - و بيعاملها انها سر ب 15 جم
اسيب اللحمه فى التتبيله لمده يوم فى الثلاجه موش الفريزر
و اجهز الشوايه اللى بغطا فى البلكونه و البس عده الشغل - جوانتى بلاستيك و تى شيرت و بنتاكور
1/2 ساعه و مع رغفين محمصين احط فيهم اللحمه اللى هتتطلع علشان يتجانسوا مع بعض و ادعيلى
و اللى يحاول يمد ايده اغرس الشوكه بتاعه اللحمه فى ايد حضرته
و بالهنا و الشفا

مشاركة حضرتك قيمة بس ليا ملحوظتين :

1- يعنى ايه (واع اهى سنيف ) ؟؟؟؟؟؟؟؟؟؟ دى عربى ولا انجليزى؟

2- لو بتتكلم عن أسعر المناطق الشعبية فاحب أقول لك ان أغلى كفتة فى مصر كلها بتتباع فى السيدة زينب أقدم منطقة شعبية فى زقاق من جوه زقاق قدام جامع السيدة وده عند رفاعى الكبابجى حيث الكيلو ب 180 جنيه غير السلطات.

الموضوع: هل محلات الكباب والكفتة الرخيصة التمن بتبيع لحمة مستوردة او معشوشة؟

LinkBack

أدوات الموضوع

عرض

-

-

-

-

المواضيع المتشابهه

أرجوكم يا جماعة إلحقوني عاوز محلات بتبيع قطع غيار أونو أستعمال

اية رايكم فى محلات بتبيع بنزين 80؟؟

السيارات الرخيصة

هو فيه محلات بتبيع قطع غيار دايو اصلى بالتوفقية ؟

حد يعرف محلات فى الحرفيين بتبيع كارتة كمبيوتر

الكلمات الدلالية لهذا الموضوع

المفضلات

المفضلات

ضوابط المشاركة