صلاة التراويح وسلوك المصلين

**M_ashraf** · 10-09-2008 04:28 AM

السلام عليكم يا اخواننا
انا مش لاقي مكان اتكلم فيه براحتي الا هنا
لسعة صدركم و افقكم
بصراحة انا اكتشفت ان الواحد لازم لما ييجي يصلي التراويح في مسجد كبير
وليس مسجد في دائرة المناطق السكنية
المساجد اللي في المناطق السكنيه انا بحس ان بيبقى في
مجموعه من الناس مسيطرين على المسجد و الامام و الدرس اللي في نصف الصلاه
اولا لازم الناس تستنى بعض لحد لما الحاج فلان ييجي و الحاج علان ييجي
و الناس تتاخر وتتعطل مش مشكله
الدرس اللي في النص
تلاقيهم يطلبوا من اللي بيديه يطول و كان محدش وراه حاجة
و لو الواحد اتكلم يبقى مش قادر يقعد في الجامع شوية و اصلا بيبقى
الدرس في مواضيع ضعيفة ليس وقتها هو شهر رمضان
انا في رايي ان االدرس ده لازم يكون عن حاجه تحفز الناس على العباده
و هجر المعاصى مش عن كفارة اليمين مثلا
لازم الناس تعرف تختار المواضيع اللي يتكلموا فيها

الناس دي اكيد طالما وصلت انها تخطب وتصلي بالناس تبقى من العلماء
و ناس لها فضلها
لكن الاختيار و التوقيت و المده وغيرها لابد من اخذها بعين الاعتبار
و ان المصلين منهم المريض و منهو المرتبط بمواعيد عمل وغيرها

انتم ايه رايكم؟

**MoToRiZeR** · 10-09-2008 05:19 AM

و الله فيه حاجة كمان .. الشوارع اللي فيها زاوية صلاة (مسجد صغير) و بتبقي عايزة تعمل صلاة تراويح .. بيحطوا حصير في الشارع يقفلوا بيه الشارع و الناس تتعطل و معرفش حلال ولا حرام اللي بيعملوه ده .. و طبعا الواحد لو إتكلم بيتبصلوا علي إنه خلاص المارق عن الدين اللي مش عايز الناس تصلي .. مشكلة الناس المسيطرين عالمساجد اللي بيقفلوا الشوارع و اللي بيستنوا الحج فلان و الحج علان إنهم دايماَ فاكرين إن الحق معاهم و المعارض لهم سلوكه لا يرضي الله و رسوله !

معلش أصل انا برضه مضايق انا الشارع اللي فيه بيتي فيه زاوية بتقفله طول رمضان في التراويح و ساعات و الله في غير رمضان كمان تلاقيهم فارشين في الشارع و أضطر أعمل لفة مكوكية عشان أخرج عالشارع الرئيسي في شوارع مكسرة و مبهدلة و ضيقة.

**Mido80** · 10-09-2008 09:01 AM

فعلا يا جماعة انا لاحظت دايما ان صلاة التراويح عندنا في مصر بتكون طويلة جدا والكلام دة مش مصر بس لالالا. دة كمان الخطباء وائمة المساجد المصريين هنا في الخارج او قصدي برة مصربردو لازم يطولو في التراويح والخطبة اللي النصف وخطبة الجمعة مع انة بيكون هناك تعميم بتقصير خطبة الجمعة. عارفين هنا صلاة الجمعة والتراويح لازم تكون في مسجد كبير ومفيش حاجة اسمها فرش برة الجامع دي ابداً.

**sab3aawy** · 10-09-2008 11:15 AM

اما عن سيارات المصلين فحدث ولا حرج، يعنى الناس تقفل كل الشوراع اللى حوالين المسجد بسياراتها وليذهب الى الجحيم من اراد ان يخرج من بيته المجاور للمسجد او يعود اليه، وليذهب الى الجحيم من جاء مبكرا وركن سيارته صف اول واراد ان ينصرف بعد 8 ركعات فقط، لابد ان ينظر حتى تنتهى ال 20 ركعة ، ولو حد فتح بقه يبقى كافر وزنديق وخارج عن الملة

بصراحة انا بحس ان ده نوع من انواع التعبير عن عقد النقص المتأصلة عن كتير من اهل مجتمعنا، يعنى اى واحد يلاقى اى سلطة يتسند عليها يبلطج باسمها على مخاليق ربنا كلهم، وبالتالى فان من فاتته سلطة المنصب او المال يرتكز على سلطة الدين لكى يمارس بعض البلطجة على مخاليق ربنا مما يعوض له بعضا من احباطاته اليومية

**ahmed_su** · 10-09-2008 11:29 AM

المشاركة الأصلية كتبت بواسطة sab3aawy

بصراحة انا بحس ان ده نوع من انواع التعبير عن عقد النقص المتأصلة عن كتير من اهل مجتمعنا، يعنى اى واحد يلاقى اى سلطة يتسند عليها يبلطج باسمها على مخاليق ربنا كلهم، وبالتالى فان من فاتته سلطة المنصب او المال يرتكز على سلطة الدين لكى يمارس بعض البلطجة على مخاليق ربنا مما يعوض له بعضا من احباطاته اليومية

+100000000