الموضوع: أفضل مكان ممكن تسكن فيه ؟؟؟ .... مرجع للشباب ومناقشة هادفة ومفيدة !

موضوع مهم بصراحة خاصة للي ربنا لسة متبش عليهم من العيشة في مصر !
أنا عن نفسي نقلت مدينة العبور من سنة و4 شهور بالضبط وساكن في منطقة تعتبر من أرقى مناطق الحي الأول اللي المفروض إنه لب المدينة وروحها لكن للأسف اكتشفت إن مدينة العبور في الكام سنة الأخيرة تحولت إلى مدينة شعبية وبدأت تستجذب الإخوة بتوع السلام والنهضة باعتبارها أقرب المناطق لمدينة العبور والسكان اللي عايشين هناك من سنين بيشتكوا منها ومن التدهور الرهيب اللي حصلها بسبب فشل جهاز المدينة وتخاذله فأصبحت الآن لو عايز تجيب حاجة من السنترز اللي في المدينة تحس إنك في مدينة النهضة فعلا من كمية الباعة الجائلين والبلطجية والسبرسجية اللي بتشوفهم ده غير التكاتك طبعا ! فبصراحة كرهتها بعد ما كانت أمنية حياتي إني أعيش في مدينة من المدن الجديدة واخترت العبور بالذات لأنها أقرب لشغلي زائد إنها من أقدم المدن الجديدة فمفروض إن الخدمات كلها متوفرة ومستقرة لكن للأسف المية دلوقتي أصبحت بتقطع بشكل شبه يومي علشان في ضغط لأن محطة العبور بتغذي القاهرة الجديدة والعبور فبدل ما يقطعوا عن القاهرة الجديدة والعبور بيقطعوا عن العبور بس علشان مش عايزين يزعلوا طبقة الupper class بتاعة القاهرة الجديدة على اعتبار إن العبور خلاص شبه شعبية دلوقتي ومحدش هيقدر يعملهم حاجة !
ده غير طبعا إن الخدمات تعبانة وعشان تشتري حاجة بتعاني إلى حد ما بالرغم من وجود جولف سيتي مول وكارفور لكن المحلات هناك قليلة وتعبانة ومش كل حاجة عايزها بتلاقيها فبضطر أحيانا أنزل روكسي أو عباس العقاد علشان أجيب هدوم للعيال وفعلا دلوقتي بعاني إني مش لاقي في العبور كلها جزمة نضيفة مقاس 28 لعمر ابني اللي لسة داخل KG1 تخيل ؟!!

فياريت فعلا حد يفيدنا في الموضوع ده ويقولنا عن تجربة أفضل مكان للعيش فيه يكون مكان محترم وراقي وآمن وفي نفس الوقت مش over في الأسعار وتكاليف المعيشة

المشاركة الأصلية كتبت بواسطة mahmoud naguib

العبور صعبة فعلا أخي !!
ولكن لو شغلك فيها تقدر تنقل لأقرب مدينة ليها وهي الشروق !
وهي فعلا راقية وجميلة بس قليله شوية ف الخدمات بتاعتها

ننتظر بقية الآراء .....

الشروق جميلة فعلا لكن مشكلتها ان الخدمات فيها فعلا ناقصة حتى كارفور اللي هناك لسة مفتحش !

المشاركة الأصلية كتبت بواسطة elmkaneeki

كارفور فتح وشغال وزي الفل ما شاء الله

كويس
طب أخباره إيه ؟ أكبر من فرع العبور ولا أصغر ؟ وهل كارفور لوحده بس ولا في محلات تانية معاه ؟