الحمد لله ...نجاتي من محاولة تثبيت فاشلة!
طبعا الموضوع ده علشان الناس تاخد بالها كويس اوي ...النهاردة الصبح وانا رايح شغلي في امان الله وماشي في الحتة بتاعت صفط اللبن علشان اخد الدائري من هناك الاقي بنت صغيرة طالعالي من تحت الأرض وشكلها كيوت ولابسة لبس مدرسة وبتقولي عمو عمو العجلة اليمين نايمة قولتلها ايه ده بجد ..قالتلي اه ...المهم انا صدقتها طبعا دي طفلة وبعدين اللي زود ايماني بصدقها ان العجلة دي كانت اتخرمت من شهر ولحمتها فقلت احتمال تكون اتخرمت تاني ..المهم حظي الحلو ان كان فيه سوق هناك فالدنيا زحمة ومفيش حتة اركن فيها عشان انزل ابص ع العجلة ..المهم مشيت قد 200 300 متر كده يدوب لقيت حتة فاضية وقمت نزلت ابص ع العجلة واذ بي افاجيء ان العجلة سليمة تماما !!!!! ...علطول جمعت انها كانت محاولة تثبيت وان البت دي حد زقها ع اساس انزل وابص والعربية تتقلب علطول ...ركبت طبعا وقلت اشهد ان لا اله الا الله وطرت بعدها ...الفكرة بقي ايه اللي احنا بقينا عايشين فيه ده ...معتقدش ان بقي فيه تجمع بشري اقذر من اللي احنا عايشين فيه ده ...تنزل من بيتك في امان الله تلاقي اللي عايز يسرقك واللي عايز يخبطك واللي عايز يتخانق معاك بسبب او بدون واللي يشعلق نفسه في عربيتك عشان تديله فلوس بالعافية..بحيث اصبح شعورك دائما وانت ماشي بالقلق والتوتر وكل املك توصل المكان اللي انت رايحه سليم