الموضوع: تجارب الأعضاء مع زيوت المحرك المختلفة

موضوع رائع لكن مش شايف حد كتب حاجه .... عموما هبدأ انا

في الابيزا 98 محرك 1000سيسي من عمر 200 الف كيلومتر حتي 300 الف كيلومتر استخدمت شيل الاصفر المعدني فترة و كنت بنزله علي 5 الي 6 الاف كيلومتر تقريبا و دون مشاكل او نقص و في الاخر استخدمت فيسكو 2000 المعدني ايضا و كنت بنزله علي نفس الفترة و حسن معايا من صوت المحرك و اداؤه و فضلت استخدمه لحد ما بعت العربية و كان زي الفل

في الكوردوبا 2002 1000 سيسي 16 فالف اشتريتها فيها غيار زيت امارات مصر المعدني و العربية عموما وقتها مكنتش مظبوطه لأني مكنتش لسه ظبطتها علي مزاجي و بايدي و نزلته بعد 5 الاف كيلومتر و بعدها استخدمت غيار زيت كان عندي من فيسكو 2000 المعدني زي بواقي من غيارات الابيزا و نزلته بعد 5 الاف و العربية برضه كان اداؤها مش عاجبني معاه
و اخيرا بستخدم زيت فيسكو 5000 الاف التخليقي بقالي 50 الف كيلومتر و و بعد استخدامه تحسن ملحوظ في معدل استهلاك البنزين للعربية + هدوء و نعومه للمحرك و اداء ممتاز و لم اشتكي منه و لم ينقص نهائيا و بنزله علي 10 الي 12 الف كيلومتر

فقط اخر غيار منه (فيسكو 5000 التخليقي) اللي مازلت ماشي عليه بقاله 18 الف كيلومتر شغال و نقص قليلا علي المقاس و مبصتش عليه غير بعد 15 الف كيلومتر و كمان بسبب ان عندي تسريب من جوان غطاء الصبابات اللي سرب بعد عملية الصيانة وقت قطع سير كاتينة عربيتي .... و بعد الفترة الطويلة دي مش حاسس بأي تغيير و الاستهلاك ممتاز و المحرك هادي و لسه راجع من مشاوير سفر مرتين ورا بعض مره ماشي سرعات بين 160 و 170 و الثانية بين 140 الي 150 و كل ده بسبب ظروف ضغط شغل و التأخير و الحظر

بدأت اخيرا اقتنع بأن الزيوت ملهاش وقت محدد بالكيلومتر و بفكر احلل عينه من الزيت عند فيسكو في الدقي عشان اشوف نتائج حالته و اتأكد هكمل عليه ولا لأ لأني فاكر انهم قالو وقت بداية تسويقه انه ممكن استخدامه حتي 25 الف كيلومتر و علي ضمانتهم شرط حالة المحرك تكون جيده

بفكر استخدم زادو او وولف او شيل و بفكر افضل مع فيسكو !!! و مش عارف هعمل ايه حتي الأن ؟؟؟؟ ايه رأيكم
و الله المستعان