اهتزاز السيارة للامام وللخلف

**mohamedadelemam** · 07-10-2013 09:58 PM

بالتوفيق ان شاء الله .. العربيات الاوروبى عموما ضبط الكهربا والكبربيراتير على الشعره عمليه مش سهله ومحتاجه تتجرب كذا مره وبعد كدا يتسجل عدد فتحات مسمار ظبط الخليط ومستوى العوامه وخلوص البوجيهات اللى متعملش دخنه وفى نفس الوقت متقطعش وضبط الاسبيراتير على توقيت شراره مظبوط ويتعلم عليها بقلم الوان كل دا عشان لو حضرتك فكيت تانى متحتاجش تظبط كل دا تانى وعموما لو اتظبطت تمام حضرتك هتحس انها عربيه زيرو وممتعه جدا وربنا يبارك لحضرتك فيها

**المنسي** · 07-10-2013 10:05 PM

المشاركة الأصلية كتبت بواسطة ابوابراهيم323

عدنا بحمد الله من السفر والسيارة كانت اكثر من رائعة ورفعت رأسى أمام الناس
ماشاء الله استطعت التفوق فى السرعة على ميتسوبيشى 2103 بس ده اخويا وحمولته كانت كبيرة وهو مرديش يزعلنى (:
وهيونداى اكسنت 2003 وده بقى كان نفسه يسبقنى ولكن الحمد لله مقدرش طبعا ميمنعش ان انا تهورت شويه فى المطبات وفى السرعه بس كنت مستمتع لانكم عارفين الراجل بتاع مركز الصيانة كان سد نفسى عن العربيه بس بعد ظبط الكهرباء ما شاء الله حاسس ان انا عندى عربية

انا عملت كده حوالى 200 كيلو حروح افول تانى ونشوف حساب البنزين

منتظرين حساب البنزين

**أحمد جودة** · 09-10-2013 08:55 AM

المشاركة الأصلية كتبت بواسطة ابوابراهيم323

فولت اليوم
عدد الكيلو متر المقطوعه 206
عدد اللترات 27

عاوز اعرف كده الاستهلاك كويس ولا فيه مشكلة
مع العلم كان هناك حوالى 80 كيلو السرعه لم اتجاوز النقل التانى او الثالث بسب الزحمة والمطبات ونوعيه الارض فى البلد

يبقي كدة العربية أخدت 27 لتر فى مسافة 206 كم
206 ÷ 27 = 7.6 يبقي العربية بتمشي بــ لتر بنزين لكل 7.5 كيلو تقريباً

كدة بردو الاستهلاك يعتبر زيادة بس على كلام حضرتك 80 كيلو العربية ماشية على أقل من الغيار الرابع أى السرعة لم تتجاوز الــ 70
وكمان متنساش الحمولة فى العربية معاك كام واحد فى العربية ومحتويات الشنطة وطبيعة الارض وإتجهاة الهواء أعتقد هيا الفليشيا فى الزحمة بتستهلك كتير انما فى الطرق السريعة استهلاك معقولة

وانصحك لو تقدر تعمل مشوار بتاع 100 كيلو على سرعة مابين 90 الى 100 كم/س

تقبل تحياتي

**aw2100** · 09-10-2013 11:22 PM

المشاركة الأصلية كتبت بواسطة ابوابراهيم323

فولت اليوم
عدد الكيلو متر المقطوعه 206
عدد اللترات 27

عاوز اعرف كده الاستهلاك كويس ولا فيه مشكلة
مع العلم كان هناك حوالى 80 كيلو السرعه لم اتجاوز النقل التانى او الثالث بسب الزحمة والمطبات ونوعيه الارض فى البلد

معدل الأستهلاك ده معقول وخصوصا لو فى الزحمة ممكن تحرق 5 لتر فى 5ك
وفيه حاجة كمان انا لاحظت من 6 شهور ان البنزينة بتفول عدد لترات ازيد من الحقيقي بمعنى أخر تفويلة لعربيتى كانت 45 لتر وده رغم ان كان فى التانك حوالى 10 لتر ولمبة البنزين بتنور على 5 لتر كانت مطفية يعنى بالحسبة دى سعة التانك 57 لتر رغم ان الواقع تانك الفليشيا 47 لتر ؟؟؟
سرقة ياباشا المحطات بتسرقنا وتغالط فى حساب البنزين يعنى اللتر بيفوله 0.9 لتر ولاحظت ده فى اكتر من بنزينة وده بالنسبة للبنزين ال 80 و ال 90 لكن لما بافول 92 بيبقى الحساب مظبوط وربنا يعدل الميله !!!

**aw2100** · 30-10-2013 10:18 PM

المشاركة الأصلية كتبت بواسطة atamim

دا معناة ال 10% الفرق هو فرق بين ثمن بنزين 90 و 92 و شويه ولا اى رايكم؟

كمان قرآت فى الكتالوج ان تانك الكاربيراتير اكبر من تانك الانجكشن يمكن ب 5 او 6 لتر مش فاكر الرقم كان كام بالظبت بس فية فرق بين التانكين فيا ريت نعرف عربيه حضرتك كاربيراتير ولا انجكشن؟

التانك واحد فى الكاربراتير والأنجكشن هو 42 لتر بس فى الكاربراتير فية تانك احتياطى سعة 5 لتر فوق التانك الأصلى ماعرفش لية يبقى اجمالى سعة تانك الفليشيا كاربراتير 47 لتر !!