توكيل السبع اوتو سيرفس ونيسان صني 2011 55000k
معايا نيسان صني 2011 اي اكس APS وعاملة معايا 54000من الزيرو الحمد لله ومحافظ عليها وبعمل جميع الصيانات في توكيل السبع بالمعادي.والحمد لله ربنا رزقني بيها عربية اعتمادية وحمالة اسية وشكلها وقور وكلاسيكي وماتور 1600 قوي وسحب ممتاز.
3- استهلاك بنزينها زي اي عربية 1600 لحد سرعة 100 ك بتعمل خوالي 240-250 في 20 لتر. بالتكيف. لكن ما بزودش rpm عن 3. عربية فيها مميزات كتير Aps-Ebd- ووسادة هوائية وشنطة كبيرة.
وكان حدث لي حادثة من الامام في الكابوت والرفرف وعملتها عند سمكري كويس جدا عملها على البارد وظبط الزوايا عند عمرو بدوي اللي في مدينة نصر وقالي مفيش اي مشاكل وكلو تمام.
في خلال سنتين و7 شهور تقريبا غيرت التيل الامامي والبوجيهات والسيور وفي صيانة ال 50 قولتلهم على المشاكل اللي في العربية
العيوب:
1-صوت في العفشة من الامام وكان ظاهر تخبيط حديد من الأمام. المهم قولتلهم وكشفو على العربية وقالولي انهم غيرو كاوتشات التراب في المساعدين لأنهم اتقطعو.
2- الباب اللي من ناحية السواق احيانا بيزيق وبيصدر اصوات وانا ماشي بالعربية وكل ما اقولهم ما يعملوش حاجة.
حطو شريط لحام على القفل اللي في الباب والمشكلة لازالت موجود
3- الأبواب بيقفل بالعافية لازم ارزع الباب جامد علشان يقفل
لم يحلوها ولازلت كما هي قالولي الكاوتش اللي في الباب ردئ.
4-الكراسي ألامامية بتزيق ولازم ترجعها من ناحية في المجر علشان الكرسي يرجع في مكانة يعني نقدر نقول مش متزن راجع من الشمال درجتين وكل مرة اقولهم وميعملوش حاجة
لم يحلوها ولازالت كما هي
وطبعا الاخوة كلهم نصحوني اروح اوتو ايجيبت خصوصا أن خلال باقي على الضمان حوالي 3 شهور وانا عاوز اظبط المشاكل ديه. المهم كلمت التوكيل وحجزت ميعاد لتظبيط المشاكل وكانت العربية السحب مش كويس معايا فقولتلهم على المشاكل وحجزت الساعة 2:30 مشيت من شغلي وروحت نيسان اوتو ايجيبت ابو رواش وبصراحة هما محترمين جدا وقالي فاضل وقت قليل لأنهم بيخلصو بدري المهم قلتلو اني جاي من مدينة العبور وقالي خلاص في حد حيجرب العربية معايا والحاجات الضرورية تنظيف البوابات لتسريع السحب وتربيط العفشة والكشف عليها تتعمل انهاردة والباقي زي الباب والكاسي الصيانة القادمة.
المهندس قالي انتظر في قاعة الأنتظار المهم لقيت العربية خلصت وروحت للمهندس وفوجئت انو بيقولي: (انت ما بتعملش صيانة خالص للعربية) قولتو ازي انا بعمل جميع الصيانات ولسة عامل صيانة 50000 المهم قالي ازاي مبيكتبوش لك حتى ملا حظات على العربية. قولتلو طب اي المشاكل فوجئت انو بيقولي على مشاكل في العفشة وهى
1- الكاوتش انتاج 2010 وقالي اغيرة ضروري
2-كاوتشمساعدين خلفي 420
3-قاعدة فتيس علوية شمال 320
4-قاعدة محرك علوية يمين اثار حادث280
5- 2مقص امامي 1700
6-كاتيرة فيبر اسفل المحرك يمين ودي كانت من طوبة عالية وكنت عارف انها مقطعة
7-علبة دركسيون صوت تخبيط+ ترشيح زيت بسيط .
قولتلو ازي انت مش بسمع اي تخبيط وبعدين دي 4000 قالي ممكن تكون حاجة بسيطة تتظبط
وقالي دخلها ورشة سمكرة ودهان الكشف 250 ونشوف الشاسية مظبوط من قدام ولا لا.
انا مش عارف اعمل ايه الاسعار دي كتير جدا ولسة حغير كمان ال 4 فرد الكاوتش.
ارجو من الأخوة تقولولي اعمل ايه
اصلحها فين واجيب القطع الغيار دي من برة التوكيل وفي حاجات استيراد ولا ايه وايه الأسعار برة التوكيل مش مصدق كل ده وتوكيل السبع مبيقوليش اي ملاحظات والعربية باقي لها حوالي شهرين ونص او 3 شهور وتخرج من الضمان ومش عارف اعمل ايه. الحمد لله على كل حال وانا عارف ان شوارعنا كلها مطبات في مصر بتقصر عمر العربيات ربنا يحفظ جميع سيارتنا وجزاكم الله خير.
