كاوتشة الاسكترا والكوبلن

**أحمد جودة** · 03-10-2013 11:24 AM

السلام عليكم ورحمة الله وبركاتة

الحكاية ومافيها امبارح بالليل قولت أنزل ابص على كوتشات الكوبلن لانها كانت مقطوعة قولت يمكن الاقي حل مؤقت لحد ماروح للميكانيكي لقيت الموضوع هيبقي صعب اللحام أو مش ممكن الف عليها كيس بلاستيك مثلا المهم

وكان عندي تنشيع زيت من كارتيرة الزيت من فترة فقولت انزل اشوف ممكن اعمل اية
جبت سليكون حراري علشان تنشيع الزيت ونزلت تحت العربية نضفت الكارتيرة بالبنزين وحتة قماشة وتمام بعد مانشفت عملت السليكون الحراري مابين جسم الموتور والكارتيرة بتاعت الزيت ومنتظر اشوف النتيجة

بعد ماخلصت لقيت خير اللهم أجعلة خير ...... لقيت كاوتشة الاسكترا اللى بيسموها المزيكا مقطوعة ومنزلة حتت شحم تحتها دي اللى تحت الكرسي اللى جمب السواق ....... فقررت أغير الكاوتشات كلها يمين وشمال بتاعت الاسكترا والكبالن

الاستفسارات ..... هل كاوتشة الاسكترا دي بتلف زي كاوتشة الكوبلن ولا وظيفتها بس تفتح شمال ويمين مع حركة الدريكسيون ........ هل بعد تغير كاوتشة الاسكترا لازم اضبط زوايا ........ والله يا جماعة أنا نفسي اعمل الحاجات دي بنفسي بس للاسف صعب شوية علشان أنا ساكن فى شارع عمومي وفيه حركة كتير ومش ببقي مركز ... والله امبارح كنت هموت تحت العربية (( واحد معدي من جمب العربية ولطش المرايا وكان هيخبط العربية والمصيبة ان العربية كانت مرفوعة على الكوريك وأنا نايم تحتها يعني لو كانت اتخبطط كانت العربية نزلت عجنتني بالظبط كدة الكارتيرة بتاعت الزيت كانت هتنزل على دماغي والحمد لله ربنا ستر ))

منتظر المشاركات والمرة دي حابب اعملها بنفسي وياريت حد يشرحلي خطوات فك الاسكترا

أسف على الاطالة ...... دمتم بكل خير

**المنسي** · 03-10-2013 12:24 PM

اللى هاقدر افيدك فيه كاوتش الكوبلن لانى لسه مغير اللى كانت مقطوعة عندى اولا هترفع العربية بالكوريك وهتفك العجلةوبعدها هتخلى حد يدوس فرامل علشان تفك الصامولة اللى ماسكة عامود الكردان وبعدها هتفك المسمار اللى ماسك المساعد بالطمبورة وده علشان نعرف نشد الطمبورة لبرة ونعرف نسحب عمود الكردان وبعد ماهتطلع عمود الكردان برده هيطلع معاك بالصليبة وطبعا هتفكها وهتلاقيها مقفول عليها بتيلة هتفكها بمفك عادة وتطلع الصليبةوتبص عليها لوفيها بوش والبلى بتاعها فارط يبقى محتاج تغيرها بس للاسف اللى موجود صينى ومش بتعيش المهم ان شاء الله تطلع سليمة هتفكها وتغسلها بالبنزين وهتركب الكاوتشة وتملاها شحم طبعا وتقفل الصليبة تانى وتتاكد ان التيلة قفلت مظبوط وبعد كده التركيب عكس الفك طبعا

**sakr_skoda** · 03-10-2013 08:53 PM

حودة منور مواضيعك فعلا جامدة وبتحفز الواحد ان يرد عليها........

بالنسبة للموضوع الأول قلنا ما ينفعش لحام جلدة الكوبلن ولا ينفع كيس بلاسنتيك ولا الا حاجة لابد من التغير وانتظر انا حغير جلدة الكوبلن الدداخلى اليمين ودى اللى على الزراع الطويل وانشاء الله انقل الموضوع بالصور....*

بالنسبة للموضع بتاع الكارتيرة فعلا ضحكتنى ياراجل سيلكون وحرارى وحشو ثلاثة فى واحد ههههههههههههههههههههههههه هههههههه الحل دا ميكلش معانا ياحودة انا حاقولك الحل مسامير الكارتيرة كلها مسامير 10 وبتهوى كل فترة وتحتاج الى تحريق عليها....لف عليهم ال19 مسمار حرك عليهم كلهم كدا على بعضهم بمفتاح بيبة 10 ....

بالنسبة للاكرديون بتاعة الاسكترا هى كدا علشان حركة المقصات ودوران الدريكسيون عاوز تغيرها بسيطة يامعلم....

حنفك الفردة اللى ناحية الجلدة ....

حنفك المسمار ال17 اللى ماسك زراع الاسكترا مع السمعدان خلى بالك المسمار دا مسلوب يعنى رفيع على تخين فام يعنى ايه مسلوب؟؟؟؟ يعنى لما حتفك الصامولة لابد من الدق بشاكوش ثقيل على زراع الاسكترا لتحريره من المسمار المسلوب دا....*

خلاص كدا عامود الاسكترا حر معانا شيل بقى الجلد القديمة وادخل المطبخ هات مفتاح الأمبوبة ال30 فك الصاولة الكبيرة حتشوفها تحت الجلدة بعد كدا ممكن تاخد الزراع لفة بالعجل هههههههههه ممكن تعملة لفيه اوعى تصدة ركب بقى الجلدة الجديدة ونظف وحط شحم جديد واربط الصامولة ال30 وسقك الزراع فى مكانة بالشمعدان واربط المسمار ال 17 وبالهنا والشفى لفليشتك....

اى خدمة تانية عاوز صور لا بقى انتا طماع!!!!!!!!!!!