الموضوع: بتسخن العربيه قبل ما تتحرك الصبح؟

المشاركة الأصلية كتبت بواسطة a_samy

الهيونداى الأكسنت مش بتسخن أول ما بتدورها الصبح لمبة الحراره بتنور وتطفى على طول وتتحرك بيها من غير ما تستنى ثانبه زياده.
وكل العربيات اللى مفيهاش أمبير حراره نفس النظام.

المشاركة الأصلية كتبت بواسطة eng wael

مكتوب فى كتالوج الكورسا تمشى على طول من غير تسخين بس متقرص على العربيه

وفي الكتالوج بتاع البروتون برضه نفس القصة التسخين "لمدة 30 ثانية فقط وبعد كدة تتحرك بالراحة لغاية ما الحرارة توصل للمعدل الطبيعي"

وفي الكتالوج بتاع السوزوكي

وفي معظم كتالوجات العربيات دلوقتي بيتكتب نفس الكلام

حتى في العربيات اللى نازلة في دول الشمال ... يعني مالهاش أي علاقة بدرجة حرارة الجو

لأن مواصفات الزيوت دلوقتي وكمان مواصفات المواتير وأساليب ضخ الزيت فيها نفسها غير زمان خالص .. وقصة التسخين دي عفا عليها الدهر .. وأي ميكانيكي يقول كلام غير كدة يبقى مش فاهم القصة ماشية إزاي وعايش على معتقداته وخلاص

طبعا الكلام ده على المواتير الجديدة اللى بتستعمل زيوت تخليقية بالكامل ... لكن المواتير القديمة أو الزيوت المعدنية لها قصة تانية

يعني حتى لو الموتور جديد بس الزيت اللى محطوط معدني يبقى لازم تسخن الموتور لعدة دقائق قبل التحرك ... مع العلم إن الزيت المعدني بيقصف عمر الموتور الجديد بدري بدري

المشاركة الأصلية كتبت بواسطة yousefsemsem

فعلا لازم تسخن دقتين علي الاقل وتتحرك اخر مره كنت عند الميكانيكي بعمل صيانه فكان منسوب الزيت عندي بيقل بسيط وبيعرق علي الغطا اللبي يتحط الزيت منه بالرغم ان المكنه كويسه جدا عندي الحمد لله والشكمان بيجيب ميه وحريق البوجيهات تمام لقيته قبل مايعمل حاجه قالي انت بتدور وتمشي مش بتسخن قولتله اه قالي هو ده سببه لازم علي الاقل تسخن دقيتين

مع إحترامي للميكانيكي ولكن إستحالة بصراحة يكون عدم التسخين ليه تأثير على تعريق الزيت حوالين الغطاء بأي حال من الأحوال ... حتى بامنطق كدة إيه اللى هايطلع الزيت من الكارتيرة تحت لغاية الغطاء فوق عشان بتمشي من غير تسخين (طيب السؤال بقى هل الظاهرة دي اختفت بعد ما ابتديت تسخن العربية؟؟)

المشاركة الأصلية كتبت بواسطة soteer10

مع توتال مسخنتش ولا مره لاني علي ما بكون ظبطت نفسي و خرجت بالعربيه بتكون جابت الحراره الطبيعيه

لكن مع موبيل العربيه حاسس انها نايمه
اول دقيقه بيبقي في رجرجه جامده و بعد كده بتروح بس صوت الموتور عالي

ياباشا موبيل اللى بيتعمل في مصر بصراحة ما ينفعش نقول عليه زيت .. طبعا إنا ما جربتش اللى برة مصر (بس عندي أمل يكون مختلف وإلا تبقى موبيل واخدة السمعة دي كلها ليه)

توتال أفضل من موبيل وشل أفضل منهم هم الإثنين

اختفت بقالها يومين بس غيرت الزيت ﻻنه وحش فالمشكله من الزيت لانه كمان كان نقص ربع في الغيار ده والمكنه عندي سليمه ﻻفي دخنه وﻻ في تهريب كبس

المشاركة الأصلية كتبت بواسطة hesham.sma

تجربتى الشخصية كالاتى
لو مشيت من غير ما اسخن الصبح وانا ماشي على ار بى ام ٢ عمرها ماتجيب سرعة ٨٠ الا لو شديت مرة كدا
لو سخنت وماتحركتش بالعربية الا لو سخنت بالكامل بتجيب سرعة ٨٠ على ار بى ام ٢ او اعلى منه بحاجة بسيطة
الاستنتاج....التسخين اكيد بيفرق فى الاداء
التساؤل بقى هو التسخين اكيد بيفرق فى الاداء لكن مادام مكتوب فى الكتالوج ٣٠ ثانية وتمشي .....يبقى الكلام دا المفروض مايأثرش على المكنه على المدى البعيد....صح وللا ايه

التسخين عموما لمدة طويلة أو تشغيل السيارة على السلانسيه بصورة متكررة بيعمل رواسب كربون على الصبابات ودي في المدى البعيد مش كويسة وبتخنق المكنة ومع تنظيفها (بالفلاش مثلا) بتسبب تآكل

عشان كدة معظم العربيات الحديثة لا ينصح في كتالوجاتها بالتسخين لمدة كبيرة (خصوصا إن مواصفات الزيت أصبحت تسمح بكدة)

بالنسبة لموضوع إن العربية بتجيب سرعة 80 على آر بي إم 2 ... ما ده أساسا بسبب الكمبيوتر بتاع العربية هو اللى بيحدد سرعة العربية بالنسبة للآر بي إم طول ما الموتور لسة بارد وحسب درجة حرارته وسرعة السيارة ومقدار الدوسة على دواسة الوقود

وسرعة 80 أساسا والعربية لسة باردة مش حاجة حلوة كدة حضرتك قارص على العربية وهي باردة

لازم يكون التحرك بالعربية بأسلوب هادئ تماما (لا يتعدى سرعة 20 - 40 بالكتير قوي ودوسة بنزين هادئة جدا وتكون رجلك خفيفة على الدواسة) لغاية ما العربية تسخن بصورة كاملة وبعد كدة أمشي 80 - و 90 واللى انت عايزه

الصبح على فكرة لما بامشي بالعربية وهي باردة لسة (بعد ما أسخنها لمدة 30 ثانية أو دقيقة بالكتير) العربية مش بترضى تنقل للثاني طول ما هي باردة والآر بي إم بيفضل يعلى لغاية سرعة 20 وبعدها كمان بشوية من غير ما العربية تنقل

لأن قصة التسخين إنه بيعلي الآر بي إم عشان الزيت يوصل لكل أجزاء المكنة في أسرع وقت ممكن عشان ما يحصلش تآكل وفي نفس الوقت المكنة توصل لدرجة التشغيل المثالية أقل وقت ممكن بأقل خسارة ممكنة

وأول ما العربية تسخن شوية يبتدي الفتيس ينقل للتاني عادي جدا وبمجرد ما العربية تتحرك ومن غير ما الآر بي إم يعلي ولا حاجة