اعتراف : أنا حاسس إني قليل الذوق في السواقة

**Ahmadhamza84** · 05-10-2013 03:52 AM

السلام عليكم :
بداية : أنا راجل أصولي جدا وبحب أعمل كل حاجة بأصولها ...
وده معيشني شوية في شوية وسواس في شغلي وحياتي بس مش بشكل مرضي ...
المهم إن من جملة أعراض ال Perfectionism اللي عندي إني مش راضي عن أدائي في القيادة ...
خليني أعرفك بعض المعطيات قبل ما تنصحني علشان تبقى النصيحة في الهدف :
أنا بطبيعة عملي مستعجل على طول المفروض اني أكون في المستشفى 8 ص وأنا بيني وبين المستشفى مسافات شاسعة يعني أنزل من بيتي 6 ونص علشان أوصل 8 !
أطلع من المستشفى على العيادة اللي في أزحم بقاع العالم (روكسي ) ومن العيادة للمنزل
عادة وقبل موضوع الحظر كنت بدخل بيتنا الساعة 2 بالليل وطبعا لازم أنام علشان ألحق أصحى للفجر ثم للشغل الساعة 6 ونص !!!!
فحاول تتخيل إن ده بيأثر على قيادتي إني مستعجل باستمرار ..
ثاني معطى هو إني مش صبور في وقت العمل لأني مربوط بأشياء أخرى مش بوسعي الصبر عليها
وبالتالي أي حد بيتمرقع قدامي في السواقة مابقدرش أصبر لازم أتجاوز وأكسر !!!!
ثالث معطى وهو الأهم : طباع الناس .
أنا كل يوم لازم أخش الأوتوستراد من أوله لاخره تقريبا مرورا بمنشية ناصر العظيمة ...
كل ما أحاول أبقى محترم ألاقي نفسي غصب عني أرجع أبقى قليل الذوق وأسوق بوقاحة !!!
تخيل معي الموقف التالي : ماشي في الأوتوستراد قبل المنصة وعاوز ألف أدخل الفنجري واخد شمالي باحترام ألاقي الشعب كله بيكسر عليا ويحرمني من دوري في اليوتيرن !!!
وألاقي سيدة محترمة بتمشي بقمة الهدوء العاطفي والروقان السينمائي !!!!!
ازاي ما أخدش يمين وأمشي وأكسر على الناس بقى !!!!
يبقى مش هوصل في سنيني البيضة !!!
طبعا أنا عارف إن الخطأ لا يبرر الخطيئة ( ماتحاولش تبحث عن المثل ده لأنه من تأليفي ) :)
لما أدخل أي شارع جانبي والطريق مزدوج بالليل .. من شبه المستحيل إن قائد الملاكي يطفي العالي اللي في وشك !!! طبعا المحترفين بتوع الأجرة والنقل حركة زي دي ماتفوتهمش
إجمالا : سواقين الملاكي متعبين ونادر تلاقي حد متقن لأصول القيادة خاصة السيدات ...
طبعا احنا لازم نستحمل بعض ...بس اللي يغيظك مثلا إنك تلاقي واحد أسرع منك وعاوز يعدي فتفتحله الطريق علشان ياخد الشمال وأنت تحدف يمين علشان تعديه تلاقيه لازقلك برضو !!!!!!!
ولما ربنا يكرم ويفهم وياخد الشمال يعدي ويشتم !!!!!!!!!!!!!
يعني هو مش فاهم وأنت مستحمله وهو فاكر نفسه فاهم وبيشتم !!!!!!
المهم بقى نيجي لزبدة الموضوع :
كيف تكون محترما في القيادة في ظل هذه الظروف !!!!

**مصطفى-حسن** · 05-10-2013 04:07 AM

هون على نفسك اخى الفاضل
انا واحد من الناس بيسوق بطريقة ( هش )
وبردو متدورش على معناها عشان انا اللى مخترعها
وهيا باختصار ارمى بوز العربية فى اى حتة وخش
وقلبك يبقى جامد ورجلك جاهزة للفرامل
بس المهم متبقاش رمية بغباء
يعنى مبكسرش على حد
وايدى الشمال متبطلش تكتة فى دراع الاشارات يمين وشمال
والطريق الدائرى فى مصر انسب مكان لممارسة البلاى ستيشن على الطبيعة
ورغم كل دة اخرى فى الجرى 140 فقط
يعنى انا مش من الناس اللى غاوية تفرك وتجرى وخلاص
بسوق عشان انجز واخلص مشوارى بسرعة
.....................
مش عارف لية بحس ان اللى بيسوق بالراحة دة اما راجل فاضى او بالة طويل او رايق ونازل يتمشى
لكن لو عربيتة قديمة شوية بلتمس لة العذر

**أبو آسر** · 05-10-2013 03:14 PM

هههههههههههه
بصراحة انت عندك حق وأنا على فكرة زيك تماما مبحبش المرقعة والبرود بتاعة بعض الناس وأكتر حاجة تفرسني إني ألاقي واحد ماسك الشمال ومهدي وتديله نور وكلاكسات ميعبركش وفي الآخر تبص تلاقي البيه ماسك الموبايل ومش واخد باله إن في بني آدمين وراه ماسكين الشمال عشان يمشوا بسرعة ويقضوا مصالحهم فعلطول بقوم معديه بدون تفاهم
بصراحة أنا من النوع اللي بحب احترام القواعد والقوانين لكن السواقة في مصر علمتني إني لو عملت كده هاخد على دماغي وهسمع كلام لا يرضيني زي مثلا لو إشارة حمرا والطريق فاضي لو وقفت اللي ورايا كلهم هيسمعوني ألفاظ لا تليق فبقول أنا في غنى عن كده وبكسر الإشارة لو الطريق أمان !
زائد إني برده مش بسيب مسافة بيني وبين اللي قدامي علشان الباردين اللي متخصصين ياخدوا مكان الناس ومفيش احترام لدور ولا طابور فبريح دماغي وألزق في اللي قدامي ولو اللي جنبي خاصة لو توكتوك أو ميكروباص أو تاكسي حاول ياخد مكاني مبيعرفش لأني بكون أسرع منه في الالتصاق باللي قدامي وبالتالي بفرسه ومش ببصله حتى مع إني عارف إنه عمال يشتم فيا ودي حصلتلي مرة من سواق توكتوك شتمني بأمي بس من حسن حظه إني مسمعتوش مراتي هي اللي سمعته وقالتلي بعدها بشوية !
يا عزيزي هذه هي مصر .. لا مكان للمثاليين فيها
يا إما تمشي على كيفهم يا إما هتاخد على دماغك
ربنا يتوب علينا يارب

**M.ABDOU** · 07-10-2013 05:09 PM

بعيد عن اصل الموضوع حضرتك ازاى مستحمل حياتك تنزل من بيتك كل يوم الساعه 6 صباحا ترجع الساعه 2 بالليل!!!!

هى دى اسمها حياه اصلا؟؟؟؟؟؟؟؟

**تامر.محمد** · 07-10-2013 05:30 PM

انا بابقى متسربع زيك بالظبط
غير ظروف الاستعجال لما بتحصل , لكن لما باكون لوحدي و بابقى وزهقان و عايز اخلص
فباسوق بسربعة شوية
بس بابقى حريص على حاجة واحدة , اني لما اكسر قدام حد , مارميش بوزي عليه بقلة ذوق و اخليه يفرمل او يتخض او او او , الا لو كان هو قليل الذوق اصلا و عمل معايا كده الاول
باحاول عموما استذوق و لما يكون حد عايز يكسر قدامي و مدي اشارة بذوق اني اهدي له
حد بيعدي الشارع بذوق و انا ماشي على مهلي باهدي له
واحد طالع من ركنة و مزنوق باحاول اقف له
و هكذا

**mostafa mahmod** · 09-10-2013 06:01 PM

الجرى ليه وقته
انما متخليهوش عاده
و لو قمت بدرى من نومك 10 دقايق بس هتوصل فى معادك و هتمشى هادى و مش هيجيلك ولا ضغط ولا العصب من ام السواقه
.
مهما جريت و مهما اخدت غرز مش هتفرق معاك الا فى ربع ساعه بالكتير اوى - الا لو طريق سفر -
فا على ايه بقى تعرض نفسك للخطر و حياه غيرك كمان للخطر و هى اصلا مش مستاهله