الموضوع: إستطلاع رأي حول تشغيل السيارات الملاكي كأجرة

أولاً مفيش اى شىء يدعو للإحراج فى كلامك أنت فكرت بشكل عملى وأستغليت وقت فراغك فيما فيه النفع لنفسك ولغيرك لآن الناس بتتبهدل وخاصة فى موسم الدراسة مع التاكسيات
ثانياً من حيث المبدا أنا أرفض الموضوع ومن واقع تجربة تمر بها مدينتى نظراً لإنتشار الملاكى اللى شغال تاكسى ومعظمهم بيجيب عربية لادا بيضاء وفيه ألوان تانية لدرجة إن الناس بقت بتشاور لآى عربية لادا وزهقوا أصحاب الادا اللى مش شغالين اجرة دا غير إن فى إشارة ممكن تلاقى وحد فتح الباب وركب وبعدين يقولك الحتة الفلانية يا اسطى ( حصلت مع واحد زميلى والمشكلة إنه راكب معاه مراته ولابس بدلة ورايح فرح وفى الآخر يقوله يا اسطى النتيجة إنه خلال أسبوعين كان بايع العربية واشترى عربية جديدة قسط )
اسباب الرفض :
1- دايماً عربيتهم متبهدلة وطبعاً عشان المكسب مش بيصلحها لدرجة إنك ممكن تلاقى عربية إشاراتها مكسور وماشية عادى حضرتك مش حتعرف تعمل كده يبقى اللى حتلمه حتصرفه فى الصيانة
2- مفيش أى مراعاة للمرور أو تركيز فى السواقة ابداً لآنه عكس التاكسى هو اللى بيدور على الزبون فدايماً عينيه على الناس مش على الطريق وممكن يهدى فى نص الشارع فجأة ومش مهم مين وراه
3- دايماً فى خناقات مع أصحاب التاكسيات لآنهم مقهورين منهم عربية تمنها 10 أو 15 ألف ومش بيدفع ضرايب ولا تأمينات وبيقسمه فى الرزق وبيخطفوا الزباين من بعض
4- خطورة الموضوع على سائق الملاكى وفيه ناس كتير اتثبتت واتاخد فلوسها وعربياتها أو أتخانق مع الزبون بعد التوصيل
5- المسالة القانونية أفرض زبون أتخانق معاك وراح برقم العربية عمل فيك بلاغ يتبلى عليك فيه بأى حاجة
6- أما بالنسبة للمرور فى أى لجنة بيبص فى بطاقة السواق عشان يعرف مهنته وبيسأل الركاب إنتوا معاه ولا لاء طب هو إسمه أيه وساكن فين فلو اتأكد إنها شغالة أجرة بيسحب الرخصة ويعمله إيقاف لمدة 3 شهور أو شهر مش متذكر لإستخدام المركبة فى غير الأغراض المخصصة لها ولو شك وحب يرذل يسحب الرخصة ويدخل العربية فحص فنى
لكن لو اشتغلت فى مشاوير مخصوصة بالطلب فقط يعنى توصيل ناس لمدرسة أو شغل مثلاً دور ولا دورين فى اليوم وبأجرة شهرية معقولة فممكن يكون الضرر أخف والفايدة أكبر